Orọ Ọsosuọ Ro Se Ahwo Kọrint 12:1-31
12 Inievo, mẹ gwọlọ nọ wha jọ igbori hi kpahe ekẹ ẹzi na.+
2 Wha riẹ nọ okenọ wha jọ ahwo erẹwho na,* a su owhai thọ wha tẹ jẹ gọ emedhọ nọ e rẹ ta ẹme he na,+ je kpohọ obonọ a su owhai nya kpobi.
3 Rekọ obọnana mẹ be jọ owhai riẹ nọ ohwo ọvo nọ ẹzi Ọghẹnẹ ọ be wọ ta ẹme nọ ọ rẹ ta nọ: “Jesu yọ ọnọ a bọwo ehao!” ọ rrọ họ, yọ ohwo ọvo ọ rẹ sae ta ha inọ: “Jesu họ Olori!” ajokpanọ ẹzi ọfuafo na ọ wọe.+
4 Whaọ ekẹ sa-sa e riẹ, rekọ ẹzi ọvona ọ riẹ;+
5 yọ odibọgba sa-sa e riẹ,+ ghele na Olori ọvona ọ riẹ;
6 yọ iruẹru* sa-sa e riẹ, ghele na Ọghẹnẹ ọvona o bi ru aikpobi evaọ oma ahwo kpobi.+
7 Rekọ okẹ ẹzi na nọ u bi dhesẹ oma via na a rehọ e riẹ kẹ omomọvo re o wha erere ze.+
8 Keme a rọ ẹkwoma ẹzi na kẹ ọjọ eme* areghẹ, ọfa kọ eme eriariẹ ẹkwoma ẹzi ọvona,
9 ọfa ẹrọwọ+ ẹkwoma ẹzi ọvona, rọkẹ ọfa okẹ nọ a re ro siwi ahwo+ ẹkwoma ẹzi ọvona,
10 yọ ọfa iruo igbunu nọ o re ru,+ ọfa aruọruẹ, ọfa evuhu eme nọ i no obọ Ọghẹnẹ ze,+ ọfa erọunu* sa-sa,+ ọfa kọ okẹ nọ a rẹ rọ fa otọ erọunu.+
11 Rekọ ẹzi ọvona o bi ru eware nana kpobi, be ghale ekẹ na kẹ omomọvo wọhọ epanọ u je ẹzi na.
12 Keme wọhọ epanọ ugboma na o rrọ ọvo rekọ u wo ekwakwa buobu na, yọ ekwakwa ugboma na kpobi, dede nọ e rrọ buobu, ugboma ovo+ e rrọ na, ere ọvona Kristi ọ rrọ.
13 Keme ẹzi ọvo a rọ họ omai kpobi ame fihọ ugboma ovo, makọ ahwo Ju hayo ahwo Griki, makọ erigbo hayo emuyẹ, yọ ẹzi ọvo a kẹ omai kpobi da.
14 Keme orọnikọ okwakwa ovo o rrọ ugboma na ha, rekọ ekwakwa buobu.+
15 Otẹrọnọ owọ o ta nọ, “Fikinọ mẹ yọ obọ họ, mẹ rrọ abọjọ ugboma na ha,” oyena u re ru ei nọ ọ gbẹ rọ jọ abọjọ ugboma na ha ha.
16 Yọ ozọ o tẹ ta nọ, “Fikinọ mẹ yọ ubiẹro ho, mẹ rrọ abọjọ ugboma na ha,” oyena u re ru ei nọ ọ gbẹ rọ jọ abọjọ ugboma na ha ha.
17 Ugboma na soso o hae jọ ubiẹro, diẹse a hai ro yo ẹme? Ugboma na soso o hae jọ ozọ, diẹse a hai ro se ore?
18 Rekọ Ọghẹnẹ ọ ruẹrẹ ekwakwa ugboma na ọvuọvo họ wọhọ epanọ o were riẹ.
19 O hae jọ nọ aikpobi yọ okwakwa ovona, kọ o hae ginẹ jọ ugboma?
20 Whaọ u wo ekwakwa buobu, rekọ ugboma ovo o rrọ.
21 Ubiẹro o sae ta kẹ obọ họ inọ, “Who wo iruo kẹ omẹ hẹ,” hayo, uzou o sae ta kẹ awọ họ inọ, “Who wo iruo kẹ omẹ hẹ.”
22 Ukpoye, ekwakwa ugboma na nọ e wọhọ nọ e ga tere he i wuzou,
23 yọ abọ ugboma na nọ ma roro nọ i wo ọghọ tere he, ma rẹ mai bru ọghọ họ,+ fikiere abọ ugboma mai nọ i wo erru tere he eye ma rẹ mai mu ọghọ kẹ,
24 rekọ abọ ugboma mai nọ i wo erru na e gwọlọ oware ovuovo ho. Rekọ ere Ọghẹnẹ ọ ruẹrẹ ugboma na họ, abọ ugboma na nọ i wo erru tere he na ọ mai bru ọghọ họ,
25 re ohẹriẹ o gbẹ jọ ugboma na ha, rekọ re ekwakwa riẹ i wo ọdawẹ kẹ ohwohwo.+
26 Otẹrọnọ uye o be bẹ okwakwa jọ, ekwakwa edekọ na kpobi a re lele iei ruẹ uye na;+ hayo otẹrọnọ a jiri okwakwa jọ, ekwakwa edekọ na kpobi a re lele iei ghọghọ.+
27 Whaọ, whai yọ ugboma Kristi,+ yọ whai omomọvo yọ okwakwa evaọ ugboma na.+
28 Yọ Ọghẹnẹ ọ rehọ ahwo mu kẹ iruo sa-sa evaọ ukoko na: erọ ọsosuọ, ikọ;+ erọ avọ ivẹ, eruẹaro;+ erọ avọ esa, iwuhrẹ;+ kẹsena okẹ iruo igbunu;+ kẹsena okẹ nọ a re ro siwi ahwo;+ iruo obufihọ; onaa nọ a rẹ rọ kpọ eware;+ erọunu sa-sa.+
29 Orọnikọ ahwo kpobi họ ikọ họ, manikọ ere he? Orọnikọ ahwo kpobi họ eruẹaro ho, manikọ ere he? Orọnikọ ahwo kpobi họ iwuhrẹ hẹ, manikọ ere he? Orọnikọ ahwo kpobi a re ru iruo igbunu hu, manikọ ere he?
30 Orọnikọ ahwo kpobi a wo okẹ nọ a re ro siwi ahwo ho, manikọ ere he? Orọnikọ ahwo kpobi a rẹ jẹ erọunu sa-sa ha, manikọ ere he?+ Orọnikọ ahwo kpobi a rrọ enọ e rẹ fa otọ ẹme he,* manikọ ere he?+
31 Rekọ wha gbẹ hae daoma re wha wo* ekẹ nọ e mae rro na.+ Ghele na me ti dhesẹ edhere nọ ọ mai woma kpaobọ kẹ owhai.+
Eme-Obotọ
^ Koyehọ, enọ e rọwo ho.
^ Hayo “iruo.”
^ Hayo “ovuẹ.”
^ Hayo “evẹrẹ.”
^ Hayo “a rrọ efefafa ha.”
^ Hayo “rọ ajọwha gwọlọ.”
