Orọ Ọsosuọ Ro Se Ahwo Kọrint 1:1-31

  • Uyere (1-3)

  • Pọl o yere Ọghẹnẹ kẹ inievo obọ Kọrint (4-9)

  • Uduotahawọ inọ a jọ ọvo (10-17)

  • Kristi họ ogaga gbe areghẹ Ọghẹnẹ (18-25)

  • Jihova ọvo ma re ro seha (26-31)

1  Pọl, ọnọ a se re ọ jọ ukọ+ Kristi Jesu wọhọ epaọ oreva Ọghẹnẹ, gbe Sostẹnes oniọvo mai,  ro se ukoko Ọghẹnẹ nọ o rrọ Kọrint,+ ro se owhai nọ a ru fo no evaọ usu kugbe Kristi Jesu,+ nọ a se re a jọ erẹri, kugbe ahwo kpobi nọ a rrọ oria kpobi bi se odẹ Olori mai, Jesu Kristi,+ Olori rai gbe ọmai:  Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.  Me re yere Ọghẹnẹ mẹ kẹ owhai ẹsikpobi fiki uwowou ulogbo nọ Ọghẹnẹ o dhesẹ kẹ owhai ẹkwoma* Kristi Jesu;  keme evaọ kabọ kabọ, wha rọ ẹkwoma riẹ wo eware buobu no, evaọ ẹme nọ wha rẹ riẹ ta ziezi, gbe evaọ eriariẹ nọ e gbunu,+  wọhọ epanọ isẹri ise kpahe Kristi+ o dowọ muotọ no evaọ udevie rai na,  fikiere okẹ ovuọvo o kare owhai hi, nọ wha be rọ ọwhọ hẹrẹ oke edhesẹvia Olori mai Jesu Kristi na.+  O ti je ru owhai ga rite urere, re a gbẹ ruẹ oware ovo rọ fuọ owhai hi evaọ ẹdẹ Olori mai Jesu Kristi.+  Ọghẹnẹ nọ o re ru ẹme riẹ gba*+ ọye o se owhai re wha wo usu* kugbe Ọmọ riẹ Jesu Kristi Olori mai na. 10  Inievo, mẹ be rọ odẹ Olori mai Jesu Kristi tuduhọ owhai awọ inọ whai kpobi wha jọ ọvo evaọ eme rai, wha jọ ohẹriẹ o jọ udevie rai hi,+ rekọ wha jọ okugbe ọvo evaọ iroro gbe eriwo rai.+ 11  Keme ahwo jọ evaọ uviuwou Kloe a vuẹ omẹ kpahe owhai, inievo mẹ, inọ ohẹriẹ o rrọ udevie rai. 12  Otọ ẹme mẹ na họ, whai omomọvo ọ be ta nọ: “Mẹ ọrọ Pọl,” “Mẹ ọrọ Apọlọs,”+ “Mẹ ọrọ Sifas,”* “Mẹ ọrọ Kristi.” 13  Kọ Kristi ọ ghale abọ? Kọ Pọl a kare fihọ ure kpe fiki rai? Hayo kọ odẹ Pọl a rọ họ owhai ame? 14  Me yere Ọghẹnẹ inọ mẹ họ owhai ọvuọvo ame he ajokpaọ Krispọs+ avọ Geyọs,+ 15  re whai ọvuọvo ọ gbẹ ta nọ odẹ mẹ ọ rọ họ-ame he. 16  Ẹhẹ, mẹ họ ahwo uwou Stẹfanas+ ame re. Rọkẹ owhai enọ i kiọkọ, mẹ riẹ hẹ sọ mẹ họ omọfa jọ ame. 17  Keme Kristi o vi omẹ, orọnikọ re mẹ họ ahwo ame he, rekọ re me whowho usi uwoma na;+ yọ orọnikọ avọ eme eriariẹ ikpehru hu,* re uwhu Kristi evaọ ure-oja* na o gbẹ jọ oware ufofe he. 18  Keme ẹme kpahe ure-oja* na yọ ugheghẹ kẹ enọ a te raha,+ rekọ rọkẹ omai enọ a ti siwi, o rrọ ogaga Ọghẹnẹ.+ 19  Keme a kere nọ: “Mẹ te raha areghẹ ezae iwareghẹ na no, yọ enọ e riẹ ikpebe na, mẹ te siọ eriariẹ rai.”*+ 20  Kọ owareghẹ na ọ rrọ? Kọ okere-obe* na ọ rrọ? Kọ ọgbavro uyero-akpọ* nana ọ rrọ? Kọ Ọghẹnẹ o gbe ru areghẹ akpọ na zihe ruọ ugheghẹ no? 21  Keme nọ orọnọ akpọ na ọ rehọ areghẹ riẹ rọ riẹ Ọghẹnẹ hẹ na,+ fiki areghẹ Ọghẹnẹ,+ o were Ọghẹnẹ re ọ rehọ ovuẹ nọ ma bi whowho nọ a rri fihọ ugheghẹ+ na ro siwi enọ e be rọwo. 22  Keme ahwo Ju a be gwọlọ eware eka,+ yọ ahwo Griki a be gwọlọ areghẹ; 23  rekọ ma bi whowho Kristi nọ a kare fihọ ure kpe, onọ o rrọ ezoruẹ kẹ ahwo Ju, o tẹ rrọ ugheghẹ kẹ erẹwho na.+ 24  Rekọ rọkẹ enọ a se na, te ahwo Ju gbe ahwo Griki, Kristi họ ogaga Ọghẹnẹ gbe areghẹ Ọghẹnẹ.+ 25  Keme oware Ọghẹnẹ nọ ahwo a rri fihọ ugheghẹ u wo areghẹ vi ahwo-akpọ, yọ oware Ọghẹnẹ nọ ahwo a rri nọ o ga ha o ga vi ahwo-akpọ.+ 26  Keme wha ruẹ evaọ use nọ o se owhai na, inievo, inọ orọnikọ ibuobu i wo areghẹ akpọ na ha,*+ orọnikọ ibuobu e ga ha, orọnikọ ibuobu i no iwou ikpahwo* ze he,+ 27  rekọ Ọghẹnẹ ọ salọ eware igheghẹ akpọ na re ọ ruẹsi ru oma vo iwareghẹ na; yọ Ọghẹnẹ ọ salọ eware nọ e ga ha evaọ akpọ na re ọ ruẹsi ru oma vuọ eware nọ e ga;+ 28  yọ Ọghẹnẹ ọ salọ eware nọ a se gboware he evaọ akpọ na gbe eware nọ a rri vo, eware nọ a rri nọ e rrọ oware ovo ho re o ru oma vuọ eware nọ a rri inọ e roja,+ 29  re ohwo* ọvo o gbe seha evaọ aro Ọghẹnẹ hẹ. 30  Fiki riẹ wha rọ rrọ usu kugbe Kristi Jesu, ọnọ ọ fere areghẹ Ọghẹnẹ gbe ẹrẹreokie riẹ via,+ gbe ọnọ a rọ ẹkwoma riẹ ru omai fo+ no jẹ hwa osa ẹtanigbo ro si omai no igbo,+ 31  re o jọ wọhọ epanọ a kere nọ: “Ọnọ o bi seha, jọ ọ rehọ Jihova* seha.”+

Eme-Obotọ

Hayo “kẹ owhai enọ e rrọ usu kugbe.”
Hayo “Ọghẹnẹ ọtẹruo.”
Hayo “ẹghale.”
A re je sei Pita.
Hayo “eme areghẹ hẹ.”
Rri oria Otofa Eme.
Rri oria Otofa Eme.
Hayo “me ti gele eriariẹ rai fihọ akotọ.”
Koyehọ, ọnọ ọ riẹ Uzi na lafi.
Rri oria Otofa Eme.
Hayo “i wo areghẹ evaọ aro ahwo-akpọ họ.”
Hayo “iviuwou nọ a riẹ odẹ.”
Evaọ Griki, “uwo.”