Ọtausiuwoma Na 1:1-18
1 Eme okokahwohọ na,*+ ọmọzae Devidi, ovie nọ ọ rrọ Jerusalẹm.+
2 Enẹ okokahwohọ na ọ ta: “Oware nọ o mae rrọ ofofe!*Oware nọ o mae rrọ ofofe! Oware kpobi ufofe!”+
3 Erere vẹ o te ohwo evaọ iruo egaga riẹ kpobiEnọ ọ be lahiẹ oma riẹ ru evaọ otọ ọre na?+
4 Oge jọ ọ be vrẹ yọ oge ọfa ọ be tha,Rekọ otọakpọ na o rẹ jọ* bẹdẹ bẹdẹ.+
5 Ọre ọ rẹ va ze,* yọ ọre o re kiediwi;Kẹsena ọ vẹ dhẹ ovovẹrẹ zihe* kpohọ oria nọ o rẹ jọ wariẹ va ze.+
6 Ofou na o re fou kpobọ obọze ovatha-ọre, o ve fou wariẹ họ kpobọ ẹkpẹlobọ ovatha-ọre;Ọ rẹ ruabọhọ fou wariẹ họ; ofou na o re fou wariẹ họ ẹsikpobi.
7 Iko-ame* na kpobi i re su kpobọ abade, ghele na abade na ọ rẹ vọ họ.+
Oria nọ iko-ame na i su no ze, etẹe i re su zihe kpohọ re e ruẹse wariẹ su ze.+
8 Oware kpobi o rẹ vẹso;Ohwo ọvo ọ sai tube gbiku riẹ hẹ.
Ughe o rẹ bẹ ibiaro ho;Yọ ezọ e rẹ vọ họ.
9 Oware nọ o rrọ no anwẹdẹ oye o rẹ gbẹ jọ,Yọ oware nọ a ru no ẹdẹ jọ oye a rẹ wariẹ ru;Oware okpokpọ ovo o rrọ otọ ọre na ha.+
10 Kọ oware jọ o riẹ nọ ohwo jọ ọ rẹ sae fodẹ inọ, “Rri, onana okpokpọ”?
O rrọ no anwọ anwae;O rrọ no taure a te ti yẹ omai.
11 Ohwo ọvo ọ rẹ kareghẹhọ ahwo oke anwae he;Yọ ohwo ọvo ọ rẹ kareghẹhọ enọ a yẹ uwhremu na ha;Yọ enọ a ti yẹ evaọ obaro e te kareghẹhọ ae he.+
12 Mẹ okokahwohọ na yọ ovie Izrẹl evaọ Jerusalẹm.+
13 Mẹ jọ udu mẹ gbaemu re mẹ romatotọ* wuhrẹ jẹ kiẹ+ eware kpobi nọ a ru no evaọ otọ idhiwu na,+ iruo omolahiẹ gheghe nọ Ọghẹnẹ ọ rọ kẹ emọ ahwo nọ a bi ru ẹsikpobi.
14 Me rri iruo kpobi nọ a be jọ otọ ọre na ru,Mẹ tẹ ruẹ nọ kpakọ oware kpobi ufofe, ofou nọ a bi le.+
15 Oware nọ o gẹle no a rẹ sai ru ei liọ họ,Yọ oware nọ o rrọ họ a rẹ sai kele iei hi.
16 Kẹsena mẹ tẹ jọ udu mẹ ta nọ: “Rri! me wo areghẹ gaga, me wo areghẹ vi ohwo kpobi nọ ọ kake rọ omẹ rria Jerusalẹm no,+ yọ mẹ jọ udu mẹ wo areghẹ ologbo gbe eriariẹ buobu.”+
17 Mẹ daoma mẹ kpobi re mẹ riẹ oware nọ areghẹ gbe ugberuo* avọ ugheghẹ o rrọ,+ onana yọ ofou nọ a bi le re.
18 Keme areghẹ obuobu nọ ohwo o wo o rẹ wha uzou-udhe ogaga ze,Fikiere ohwo kpobi nọ ọ be daoma wo eriariẹ ibuobu, o re wo edada buobu.+
