Ọnyano 28:1-43

  • Iwu ozerẹ (1-5)

  • Ẹfọd na (6-14)

  • Ẹwẹ-ohọ igbama na (15-30)

    • Yurim avọ Tumim (30)

  • Ukotu nọ u wo abọ họ na (31-35)

  • Etu-udhọfọ gbe ẹwẹ-odhe igoru (36-39)

  • Iwu efa rọkẹ ozerẹ (40-43)

28  “Whọ rẹ rehọ Erọn oniọvo ra avọ emezae riẹ no udevie ahwo Izrẹl ze re ọ jọ ozerẹ kẹ omẹ:+ Erọn,+ jegbe Nedab avọ Abaihu,+ Ẹlieza avọ Itama,+ emezae Erọn.+  Who re ru iwu ọrẹri kẹ Erọn oniọvo ra, nọ i re wo orro avọ erru.+  Whọ rẹ ta kẹ ahwo kpobi nọ a wo onaa iruo,* enọ mẹ kẹ ẹzi areghẹ no,+ re a ru iwu Erọn na nọ i re ru ei fo,* re ọ ruẹse jọ ozerẹ kẹ omẹ.  “Enana họ iwu nọ a re ru: ẹwẹ-ohọ igbama,+ ẹfọd,*+ ukotu nọ u wo abọ họ,+ ewu othethei echẹke,* etu-udhọfọ,+ gbe umueku;+ a re ru iwu ọrẹri nana kẹ Erọn oniọvo ra avọ emezae riẹ, re ọ ruẹse jọ ozerẹ kẹ omẹ.  Ahwo nọ a wo onaa iruo na a rẹ rehọ eware nana ru iruo na: igoru, olulu iburu, iwhulu ogorurẹ, ilulu ewawae egbagba, gbe emamọ ehọ-elọlọhọ na.  “Eware nọ a re ro ru ẹfọd na họ igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi, yọ a re zuo ai kugbe ro ru ei.+  U re wo abọ ikoko ivẹ nọ a re ru fihọ iẹe ro ku ei gbe evaọ oka avọ oka riẹ.  Eware nana evona a re ro zuo umueku*+ nọ a re ru fihọ ẹfọd na nọ a re ro mu ei ga na: igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi.  “Whọ rẹ rehọ itho oniks ivẹ+ whọ vẹ kare edẹ emezae Izrẹl fihọ ae,+ 10  edẹ ezeza evaọ utho ọvo jọ, edẹ ezeza nọ i kiọkọ evaọ utho odekọ, lele othotha nọ a ro yẹ ai. 11  Ọwena nọ ọ rẹ kare itho ọ rẹ kare edẹ emezae Izrẹl fihọ itho ivẹ na oghẹrẹ nọ ọ rẹ kare oka fihọ oware.+ Kẹsena who ve fi ai họ tamu emeware igoru. 12  Who re fi itho ivẹ na họ abọ ikoko erọ ẹfọd na re e jọ itho ekareghẹhọ kẹ emezae Izrẹl,+ yọ Erọn ọ rẹ wha edẹ rai hrọ evaọ aro Jihova evaọ abọ ikoko ivẹ riẹ na wọhọ oware ekareghẹhọ. 13  Who re ru emeware igoru 14  gbe icheni ivẹ erọ emamọ igoru* nọ a thahe wọhọ ufi,+ yọ whọ rẹ jẹ icheni nọ a thahe wọhọ ufi na mu emeware igoru na.+ 15  “Whọ rẹ ta kẹ ohwo nọ o re zuo iwu re o ru ẹwẹ-ohọ igbama oziẹobro na.+ Wọhọ ẹfọd na, eware nọ a re ro ru ei họ: igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi.+ 16  Abọ ene riẹ e rẹ jọ ẹrẹrẹe nọ a te kpiri ei ibro ivẹ, u re theri te okẹkẹe evabọ* jẹ kẹre te okẹkẹe evabọ. 17  Whọ rẹ ta itho mu ei, itho na e rẹ jọ ihie ene. Itho uhie ọsosuọ họ rubi, topaz, gbe ẹmerald. 18  Itho uhie avọ ivẹ họ tọkwọes, safaya, gbe jaspa. 19  Itho uhie avọ esa họ leshẹm,* ageti, gbe ametist. 20  Itho uhie avọ ene họ krisolaet, oniks, gbe jed. A rẹ ta ai mu emeware igoru. 21  Unu itho na o rẹ rọwokugbe edẹ emezae ikpegbivẹ Izrẹl. A rẹ kare odẹ fihọ ọvuọvo wọhọ epanọ a rẹ kare oka fihọ oware, odẹ ọvuọvo u re dikihẹ kẹ erua ikpegbivẹ na ọvuọvo. 22  “Who re ru icheni nọ a zuo wowoma fihọ ẹwẹ-ohọ igbama na, wọhọ ifi emamọ igoru.+ 23  Who re ru emero igoru ivẹ kẹ ẹwẹ-ohọ igbama na, whọ vẹ ta emero ivẹ na mu oka avọ oka ẹwẹ-ohọ igbama na. 24  Whọ rẹ thọrọ ifi igoru ivẹ na họ emero ivẹ na nọ e rrọ oka avọ oka ẹwẹ-ohọ igbama na. 25  Whọ rẹ thọrọ eka ivẹ erọ ifi ivẹ na họ emeware igoru ivẹ na, yọ who re kru rai kugbe abọ ikoko ẹfọd na hrọ, evaọ obaro riẹ. 26  Who re ru emero igoru ivẹ whọ vẹ ta ai mu oka avọ oka obeva ẹwẹ-ohọ igbama na, rẹriẹ ovao ku ẹfọd na.+ 27  Who re ru emero igoru ivẹ efa fihọ aro ẹfọd na, evaọ obotọ abọ ikoko ivẹ na, kẹle oria nọ a jọ zuẹe kugbe na, evaọ ehru umueku* ẹfọd na nọ a zuo na.+ 28  A rẹ rehọ ufi iburu kru ẹwẹ-ohọ igbama na, a rẹ thọrọ ufi na họ emero riẹ lafi emero ẹfọd na a ve thuru iei. Onana u re kru ẹwẹ-ohọ igbama na fihọ ẹfọd na, evaọ obehru umueku* nọ a zuo na. 29  “Erọn ọ rẹ wha edẹ emezae Izrẹl hrọ evaọ ẹwẹ-ohọ igbama oziẹobro na evaọ udu riẹ okenọ ọ te nyaze Oria Ọrẹri na wọhọ oware ekareghẹhọ kẹse kẹse evaọ aro Jihova. 30  Who re fi Yurim avọ Tumim* na+ họ ẹwẹ-ohọ igbama oziẹobro na, e rẹ jọ udu Erọn hrọ okenọ ọ te nyaze aro Jihova, Erọn ọ rẹ wha eware nọ a re ro bruoziẹ ahwo Izrẹl hrọ evaọ udu riẹ evaọ aro Jihova kẹse kẹse. 31  “Olulu iburu ọvo who re ro ru ukotu nọ u wo abọ họ orọ ẹfọd na.+ 32  U re wo oria nọ u rovie fihọ evaọ obehru riẹ evaọ udevie.* Oria nọ u rovie fihọ na u re wo akọ nọ a zuo wariẹe họ nọ ohwo nọ o re fi ilulu họ ekpọ ro zuo ehọ o re zuo fihọ iẹe. O rẹ jọ wọhọ uriohọ ewu-ẹmo, re o gbẹ bẹre he. 33  Whọ rẹ rehọ olulu iburu, iwhulu ogorurẹ, gbe ilulu ewawae egbagba ro ru pọmegranet* wariẹ akọ obotọ riẹ họ, avọ igogo igoru evaọ ududevie rai. 34  Who re fi ẹgogo igoru avọ pọmegranet họ lele ohwohwo, ẹgogo igoru ọvo avọ pọmegranet ọvo nọ o re lele iei, wariẹ akọ obotọ ukotu nọ u wo abọ họ na kpobi. 35  Erọn o re ku ei họ hrọ re ọ ruẹse gbodibo, yọ a re yo edo riẹ hrọ nọ ọ tẹ be ruọ eva aruẹri na evaọ aro Jihova gbe okenọ ọ be ruọ otafe, re o gbe whu hu.+ 36  “Who re ru ẹwẹ-odhe ọnwranwra ọrọ emamọ igoru, whọ vẹ kare eme nana fihọ iẹe epanọ a rẹ kare oka fihọ oware: ‘Jihova họ ọrẹri.’+ 37  Whọ rẹ rehọ ufi iburu thuru iei fihọ etu-udhọfọ na hrọ;+ o rẹ jọ aro etu-udhọfọ na ẹsikpobi. 38  O rẹ jọ aruezo Erọn, abe-ọriọ ọ rẹ jọ uzou Erọn nọ ohwo jọ ọ tẹ thọ uzi kpahe eware ọrẹri na,+ enọ ahwo Izrẹl a re ru fihọ ọrẹri evaọ okenọ a tẹ rehọ ae kẹ ekẹ ọrẹri. O rẹ jọ aruezo riẹ hrọ ẹsikpobi, re a ruẹsi wo ọjẹrehọ Jihova. 39  “Whọ rẹ rehọ emamọ ehọ-elọlọhọ zuo ewu othethei echẹke* na, rọ emamọ ohọ-olọlọhọ ru etu-udhọfọ, je zuo umueku.+ 40  “Who re je ru iwu ithethei, imueku, gbe itu kẹ emezae Erọn,+ nọ i re wo orro avọ erru.+ 41  Who re ku ai họ Erọn oniọvo ra avọ emezae riẹ, who ve wholo ai+ jẹ rehọ ae mu*+ je ru ai fo,* a vẹ jọ izerẹ kẹ omẹ. 42  Whọ rẹ jẹ rehọ ohọ-olọlọhọ ru ehọ nọ a rẹ rọ gba-ọgọdọ* kẹ ae re a ro ruru ẹba rai.+ Enana i re theri no eku te obọ ikpekpawọ. 43  Erọn avọ emezae riẹ a re ku ai họ hrọ nọ a tẹ be nyaziọ uwou-udhu omakugbe na hayo nọ a tẹ be nyaziọ agbada-idhe na te gbodibo evaọ oria ọrẹri na, re a gbẹ reabe he re a seba ewhu. Onana yọ ujaje nọ o rẹ jọ ribri kẹe avọ emọ* riẹ nọ i ti lele iei nọ u te noi no.

Eme-Obotọ

Evaọ Hibru, “nọ a wo udu areghẹ.”
Hayo “fihọ ọrẹri.”
Ubro-ewu nọ o wọhọ eprọno. Rri oria Otofa Eme.
Koyehọ, ewu nọ o si isi nya ohwohwo vrẹ.
Hayo “ufi.”
Koyehọ, igoru nọ oware ofa o gua ha.
Koyehọ, oware wọhọ 22.2 cm (8.75 in.). Rri Ẹme-Ofiba B14.
Utho oghaghae jọ nọ a ri vuhumu dẹẹ hẹ, o sae jọ nọ oye họ amba, hayasint, opal, hayo tọmalin.
Hayo “ufi.”
Hayo “ufi.”
Rri oria Otofa Eme.
Hayo “nọ a re ro dhe uzou họ iẹe.”
Rri oria Otofa Eme.
Koyehọ, ewu nọ o si isi nya ohwohwo vrẹ.
Evaọ Hibru, “kwa obọ rai vọ.” A rẹ rehọ ẹme nana ta kpahe epanọ a rẹ rehọ ogaga na kpobi kẹ ahwo nọ a te jọ ọkwa ozerẹ na.
Hayo “wo ohẹriẹ; jọ ọrẹri.”
Oghẹrẹ ehọ otọ eku jọ.
Evaọ Hibru, “ubi.”