Ọnyano 15:1-27

  • Ole obokparọ nọ Mosis avọ ahwo Izrẹl a so (1-19)

  • Miriam ọ so ozaa ole na (20, 21)

  • Ame nọ ọ be yare nọ a ru were (22-27)

15  Evaọ oke yena Mosis avọ ahwo Izrẹl a tẹ so ole nana kẹ Jihova:+ “Jomẹ so ole kẹ Jihova, keme ọ kpare omariẹ kpehru gaga no.+ O gbolo anyenya na avọ ọnọ ọ be dhẹe fihọ abade na no.+   Jah* họ ẹgba mẹ gbe ogaga mẹ, nọ orọnọ o zihe ruọ osiwi*+ mẹ no na. Ọghẹnẹ mẹ ọna, me re jiri ei;+ Ọghẹnẹ ọsẹ mẹ,+ mẹ rẹ kẹe orro.+   Jihova yọ ọgbaẹmo ọgaga.+ Jihova họ odẹ riẹ.+   O gbolo ekẹkẹ Fẹro avọ ogbaẹmo riẹ fihọ abade na no,+Yọ egbaẹmo riẹ nọ e mai woma* i kiediwi fihọ Abade Ọwawae na no.+   Ame nọ o bi fi ẹkporo na o ruru i rai; a kiediwi kpobọ otọ edidi na wọhọ utho.+   Obọze ra, O Jihova, u wo ogaga ulogbo;+Obọze ra, O Jihova, o rẹ sae whọlọ ọwegrẹ.   Evaọ oruaro ulogbo ra whọ rẹ sai gbolo enọ e kpareso owhẹ fihọ otọ;+Who vi ofu ọgaga ra nọ ọ be to, o tẹ to ae wọhọ ẹbe ọyaya.   Ẹwẹ nọ o no ighogho-inwe ra ze o lẹliẹ ame kokohọ kugbe;O mudhe oria ovo, o te bru ẹkẹre na dhe;Ame nọ o bi fi ẹkporo o dhẹmu evaọ udevie abade na.   Ọwegrẹ na ọ ta nọ: ‘Me re le ai! Me ti le ai mu! Mẹ te ghale egbo-ẹmo bẹsenọ o rẹ bẹ omẹ!* Me ti yolo ọgbọdọ mẹ lahwe! Obọ mẹ o te ga vi ai!’+ 10  Who ku ẹwẹ ra, abade na o te ruru ai;+A kiediwi wọhọ elẹdi evaọ ame odidi.* 11  Ono evaọ usu eghẹnẹ na ọ wọhọ owhẹ, O Jihova?+ Ono ọ wọhọ owhẹ, whẹ nọ o bi dhesẹ via nọ whẹ ọ mae rrọ ọrẹri?+ Ọnọ a rẹ dhozọ riẹ avọ ile ujiro nọ a rẹ so kẹe, Ọnọ o bi ru eware igbunu.+ 12  Whọ rriẹ obọze ra, otọakpọ na o tẹ lọ ai no.+ 13  Fiki uyoyou ra nọ o rẹ hiẹ hẹ who su ahwo nọ whọ ta zihe ze;+Whọ te rọ ẹgba ra su ai kpohọ oria ọrẹri ra nọ whọ be rria. 14  Ahwo a ti yo hrọ;+ a ti guegue;Ahwo nọ a be rria Filistia a te rova.* 15  Evaọ oke yena, iguegue e te ruọ iletu-orua Edọm oma,Yọ isu ilogbo* Moab a ti nuhu.+ Udu u ti no ahwo nọ a be rria Kenan kpobi awọ.+ 16  Ozọ avọ idudu e te ruọ ae oma.+ Fiki ugbobọ oruaro ra, a ti mudhe wọhọ uthoBẹsenọ ahwo ra a rẹ nyavrẹ, O Jihova,Bẹsenọ ahwo nọ who wo+ a rẹ nyavrẹ.+ 17  Whọ te rehọ ae ze jẹ kọ ae fihọ ugbehru ukuoriọ ra,+Uzedhe oria nọ whọ ruẹrẹhọ no kẹ omara nọ whọ rẹ rria, O Jihova,Oria aruẹri nọ abọ ra o ru, O Jihova. 18  Jihova họ ovie nọ o ti su bẹdẹ bẹdẹ.+ 19  Nọ enyenya Fẹro gbe ekẹkẹ ẹmo riẹ gbe egbaẹmo riẹ nọ e be dhẹ enyenya a ruọ eva abade na,+Jihova o te zihe ame abade na ze hwẹ ruru ai,+Rekọ ahwo Izrẹl a nya otọ oyaya vrẹ evaọ udevie abade na.”+ 20  Kẹsena Miriam ọruẹaro-aye na, oniọvo-ọmọtẹ Erọn, ọ tẹ tọlọ ojẹjẹ họ obọ, eyae na kpobi a tẹ rọ kpahe iẹe avọ ejẹjẹ yọ a bi gbile. 21  Miriam ọ tẹ so ozaa lele ezae na nọ: “So ile kẹ Jihova, keme ọ kpare omariẹ kpehru gaga no.+ O gbolo anyenya na avọ ọnọ ọ be dhẹe fihọ abade na no.”+ 22  Kẹsena Mosis o te su Izrẹl vrẹ no Abade Ọwawae na, a tẹ nyavrẹ kpobọ udhude Shọ, a tẹ nya edẹ esa evaọ udhude na, rekọ a ruẹ ame he. 23  A te te Mara,*+ rekọ a sae da ame Mara ha, keme ọ jẹ yare. Oyejabọ nọ o ro se odẹ riẹ Mara. 24  Fikiere ahwo na a te muhọ ẹgo kpahe Mosis,+ be ta nọ: “Eme ma te da?” 25  O te bo se Jihova,+ Jihova o te dhesẹ ure jọ kẹe. Nọ o gbolo iei fihọ ame na, ame na ọ tẹ were. Ọ jọ etẹe fi ujaje gbe otọhotọ ẹdhoguo họ otọ kẹ ae, yọ ọ jọ etẹe dawo ae.+ 26  Ọ ta nọ: “Otẹrọnọ wha rẹ gaviezọ kẹ urru Jihova Ọghẹnẹ rai evaọ oware kpobi je ru oware nọ u kiehọ evaọ aro riẹ jẹ kezọ kẹ izi riẹ je koko ijaje riẹ kpobi,+ mẹ te rehọ ẹyao ọvuọvo nọ me ro te ahwo Ijipti na te owhai hi,+ keme mẹ Jihova me bi siwi owhai.”+ 27  Nọ oyena o vrẹ no, a tẹ nyate Ilim, oria nọ iyeri-ame ikpegbivẹ gbe iriẹ udhosa-gbikpe e jọ. Fikiere a te wohọ etẹe kẹle ame na.

Eme-Obotọ

“Jah” yọ ubro odẹ na Jihova.
Hayo “esiwo.”
Hayo “nọ e mae ga.”
Evaọ Hibru, “nifẹsh mẹ.” Rri oria Otofa Eme.
Evaọ Hibru, “ọruaro.”
Evaọ Hibru, “a ti wo edada eyẹ.”
Hayo “isu egaga.”
Otofa riẹ họ “Ẹyayare.”