Ahwo Hibru 6:1-20

  • Daoma nyaharo te ọkpako (1-3)

  • Enọ i kie a wariẹ tehe Ọmọ na họ ure na (4-8)

  • Ru re ẹruore ra u muẹro (9-12)

  • Eyaa Ọghẹnẹ e rẹ seba erugba ha (13-20)

    • Eyaa Ọghẹnẹ gbe iyei nọ o duwu i re nwene he (17, 18)

6  Fikiere, nọ ma wuhrẹ kparo vrẹ iwuhrẹ esese Kristi no na, joma daoma ziezi nyaharo te ọkpako, orọnikọ ma rẹ wariẹ mu eware esese họ ewuhrẹ hẹ, eware wọhọ, ekurẹriẹ no iruo ifofe gbe ẹrọwọ nọ a re fihọ Ọghẹnẹ,  uwuhrẹ kpahe oghoghẹrẹ ame-ọhọ gbe abọ nọ a rẹ rọ kpahe ahwo uzou, ẹkparomatha enọ i whu no gbe ẹdhoguo ebẹdẹ bẹdẹ.  Ẹhẹ, ma ti ru onana, otẹrọnọ Ọghẹnẹ ọ kuvẹ riẹ.  Rọ kpahe enọ e ruẹ elo na no vẹre, enọ okẹ ọvọvẹ obọ odhiwu u te obọ, enọ ẹzi ọfuafo o te obọ,  enọ emamọ ẹme Ọghẹnẹ o te obọ, gbe enọ e ruẹ ogaga uyero-akpọ* nọ o be tha na no,  rekọ nọ i kie no, o lọhọ họ re a ru ai wariẹ kurẹriẹ, keme ae omarai a wariẹ tehe Ọmọ Ọghẹnẹ fihọ ure na jẹ wha omovuọ sei evaọ ẹgbede.  Keme otọ na u re wo oghale no obọ Ọghẹnẹ ze nọ u te bi se ame oso nọ ọ rẹ rrọ fihọ iẹe kẹse kẹse rehọ, kẹsena u ve ru ekakọ mọ ibi nọ a rẹ re kẹ enọ e kọ rai.  Rekọ otẹrọnọ idhigbo gbe enwẹnwẹ i di noi ze, a re gbabọkẹe, yọ o kẹle oke nọ a rẹ rọ bọwo iẹe ehao no, ukuhọ riẹ a vẹ mahe iẹe.  Rekọ kpahe owhai, iyoyou, u mu omai ẹro nọ wha bi ru eware iwoma, eware nọ e rẹ wha esiwo ze, dede nọ ma be ta ẹme enẹ. 10  Keme Ọghẹnẹ ọ rrọ ohwo nọ o kiẹrẹe hẹ hẹ nọ iruo rai gbe uyoyou nọ wha dhesẹ kẹ odẹ riẹ e rẹ rọ thọrọ iẹe ẹro, nọ wha rọ gbodibo jẹ be ruabọhọ gbodibo kẹ erezi na. 11  Rekọ ma gwọlọ nọ whai omomọvo o gbe dhesẹ ajọwha ọvona re ẹruore rai o muẹro rite urere, 12  re wha gbẹ moyẹlẹ hẹ, rekọ re wha rọ aro kele enọ e rọ ẹkwoma ẹrọwọ gbe odiri wo eyaa na. 13  Keme okenọ Ọghẹnẹ ọ ya eyaa kẹ Abraham, nọ orọnọ omọfa ọ rro vrẹ ọyomariẹ nọ ọ sai ro duwu iyei he na, ọ rehọ omobọ riẹ duwu iyei, 14  inọ: “Ababọ avro, mẹ te ghale owhẹ je ru owhẹ vihọ.” 15  Fikiere, nọ Abraham o wo odiri oke krẹkri no a rọ ya eyaa nana kẹe. 16  Ohwo nọ ọ rro vi ai ọye ahwo a re ro duwu iyei, yọ a te duwu iyei no yọ ẹwhọ kpobi o kuhọ no, keme oyena o rẹ kẹ imuẹro ẹme nọ a ta. 17  Ere ọvona re, nọ Ọghẹnẹ ọ jiroro nọ ọ rẹ kẹ ereuku eyaa na imuẹro viere inọ ẹjiroro riẹ o re nwene he, o te duwu iyei rọ kẹ imuẹro na. 18  Ẹjiroro onana họ, re ẹkwoma eware ivẹ* nana nọ i re nwene he nọ Ọghẹnẹ ọ sae jọ ta ọrue he na, mai nọ ma dhẹ ziọ oria adhẹzọ na no ma sai wo uduotahawọ ogaga nọ ma rẹ rọ dadabọ mu ẹruore nọ a fihọ aro mai na. 19  Ẹruore nana nọ ma wo na o wọhọ umuokọ rọkẹ uzuazọ mai, u muẹro jẹ rrọ gaga, yọ u re su omai ruọ obemu ekọtini na, 20  oria nọ Jesu ọnọ ọ kobaro kẹ omai ọ ruọ eva fiki mai, ọnọ o zihe ruọ ozerẹ okpehru wọhọ epaọ Mẹlkizẹdẹk bẹdẹ bẹdẹ.

Eme-Obotọ

Rri oria Otofa Eme.
Koyehọ, eyaa Jihova gbe iyei nọ o duwu.