Kpohọ eme nọ e riẹ eva

Kpohọ oria izoẹme

Ahwo Hibru 5:1-14

  • Jesu ọ rro vi izerẹ ikpehru ahwo-akpọ (1-10)

    • Wọhọ epaọ Mẹlkizẹdẹk (6, 10)

    • O wuhrẹ ẹmeoyo no eware nọ ọ ruẹ uye rai ze (8)

    • A rẹ rọ ẹkwoma riẹ wo esiwo ebẹdẹ bẹdẹ (9)

  • Unuovẹvẹ re ma siọ ọmaha ba ẹjọ (11-14)

5  Keme ohwo kpobi nọ a rehọ no udevie ahwo ze ro mu ozerẹ okpehru a rehọ e riẹ mu fiki ahwo na re ọ rẹrote iruo Ọghẹnẹ, re ọ rehọ ekẹ rai se Ọghẹnẹ je dhe idhe fiki izieraha rai.  Ọ rẹ sae re ohrọ enọ e rrọ igbori gbe enọ e raha uzi keme ọ riẹ nọ ọyomariẹ ọ rẹ raha uzi re,  fikiere o gba riẹ họ nọ o re dhe idhe fiki izieraha obọriẹ wọhọ epanọ o re dhe idhe fiki izieraha ahwo na.  Ohwo ọ rẹ rehọ omobọ riẹ mu ọkwa ọghọ nana ha ajokpanọ Ọghẹnẹ ọ rehọ e riẹ mu wọhọ epanọ ọ rehọ Erọn mu.  Epọvo na re, orọnikọ Kristi ọvo ọ kẹ omobọ riẹ oruaro nọ ọ rọ rrọ ozerẹ okpehru hu, rekọ ọnọ ọ kẹ riẹ oruaro yena họ Ọnọ ọ ta kẹe nọ: “Whẹ yọ ọmọ mẹ; me zihe ruọ ọsẹ ra no nẹnẹ.”  Wọhọ epanọ ọ jọ oria ofa ta re inọ, “Whẹ yọ ozerẹ bẹdẹ bẹdẹ wọhọ epaọ Mẹlkizẹdẹk.”  Okenọ Kristi ọ jọ otọakpọ, ọ lẹ elẹ-ayare avọ urru oruarua gbe irui-oviẹ se Ọnọ ọ rẹ sai siwi ei no uwhu, yọ o yo olẹ riẹ fikinọ o wo ozodhẹ Ọghẹnẹ.  Dede nọ ọmọ riẹ ọ rrọ, o wuhrẹ ẹmeoyo no eware nọ ọ ruẹ uye rai ze.  Kẹsena nọ a ru ei te gbagba no, o te zihe ruọ ọnọ ahwo nọ a bi yoẹme kẹe a rẹ rọ ẹkwoma riẹ wo esiwo ebẹdẹ bẹdẹ, 10  keme Ọghẹnẹ ọ rehọ e riẹ mu ozerẹ okpehru wọhọ epaọ Mẹlkizẹdẹk. 11  Eware buobu e riẹ nọ ma rẹ ta kpahe iẹe, rekọ e be bẹ omai ẹta keme wha rrọ kpẹlẹ kpẹlẹ evaọ iyayo rai.* 12  Keme dede nọ u te epanọ wha hae rọ jọ iwuhrẹ no enẹna, wha wariẹ gwọlọ ohwo nọ o re wuhrẹ owhai eware esese erọ Ọghẹnẹ no emuhọ ze, wha tẹ wariẹ zihe ruọ enọ a rẹ kẹ ame-ivie orọnikọ emu ọgaga ha. 13  Keme ohwo kpobi nọ ọ gbẹ be da ame-ivie ọ riẹ ẹme ẹrẹreokie Ọghẹnẹ hẹ keme ọmaha ọ rrọ. 14  Rekọ emu ọgaga ọ rrọ kẹ ahwo nọ a kpako, enọ i wuhrẹ ẹgba otoriẹ rai no ẹkwoma iruo nọ a be rehọ iẹe ru, re a sai vuhu oware uwoma gbe uyoma.

Eme-Obotọ

Hayo “wha be kaki wo otoriẹ hẹ.”