Ahwo Hibru 3:1-19

  • Jesu ọ rro vi Mosis (1-6)

    • Ọghẹnẹ ọ ma eware kpobi (4)

  • Wha yọroma re wha gbẹ kare ẹrọwọ họ (7-19)

    • “Nẹnẹ otẹrọnọ wha yo urru riẹ” (7, 15)

3  Fikiere, inievo nọ e rrọ ọrẹri, nọ e rrọ usu enọ i wo use* obọ odhiwu, wha roro kpahe ọnọ a vi ze na* nọ ọ rrọ ozerẹ okpehru nọ ma bi whowho via nọ ọye ma fi ẹrọwọ họ—Jesu.  O yoẹme kẹ Ọghẹnẹ ọnọ ọ rehọ e riẹ mu, wọhọ epanọ Mosis o ru re evaọ uwou Ọghẹnẹ soso.  Keme oruaro riẹ* u vi orọ Mosis, nọ orọnọ ohwo nọ ọ bọ uwou o re wo ọghọ vi uwou na.  Ẹhẹ, uwou kpobi u wo ohwo nọ ọ bọ riẹ, rekọ ọnọ ọ ma eware kpobi họ Ọghẹnẹ.  Whaọ Mosis ọ jọ ọgbodibo nọ o yoẹme evaọ uwou Ọghẹnẹ soso onọ o jọ isẹri orọ eware nọ a te ta kpahe evaọ obaro,  rekọ Kristi yọ ọmọ nọ o yoẹme nọ ọ be rẹrote uwou Ọghẹnẹ. Mai họ uwou Ọghẹnẹ otẹrọnọ ma be ginẹ ruabọhọ ru eware nọ e rẹ kẹ omai uvẹ ta ẹme ududu je kru ẹruore nọ ma bi ro seha na gaga rite urere.  Fikiere, wọhọ epanọ a rọ ẹkwoma ẹzi ọfuafo na ta, “Nẹnẹ otẹrọnọ wha yo urru mẹ,  wha ru udu rai gaga ha wọhọ epanọ a ru nọ o wha evedha egaga ze, evaọ ẹdẹ nọ a rọ dawo omẹ evaọ udhude na,  oria nọ esẹ-ode rai a jọ dawo omẹ, dede nọ a ruẹ iruo mẹ evaọ ikpe udhuvẹ. 10  Oyejabọ nọ oge nana o ro tu omẹ oma, mẹ tẹ ta nọ: ‘A be jọ udu rai nya no edhere na ẹsikpobi, yọ a re riẹ idhere mẹ hẹ.’ 11  Fikiere me te duwu iyei fiki eva nọ e dha omẹ na nọ: ‘A te ruọ evaọ eriosehọ mẹ hẹ.’” 12  Inievo, wha yọroma re whai ọvuọvo o gbe wo udu umuomu nọ o kare ẹrọwọ vievie he ẹkwoma oma-usino Ọghẹnẹ nọ ọ rrọ uzuazọ na; 13  rekọ wha gbẹ hae tuduhọ ohwohwo awọ kẹdẹ kẹdẹ nọ oke nọ a re se “Nẹnẹ” o gbẹ riẹ na, re ogaga eviẹhọ uzioraha o gbẹ lẹliẹ udu rai ọvuọvo jọ gaga ha. 14  Keme ma te ginẹ jọ usu enọ i bi wobọ kugbe Kristi otẹrọnọ ma kru evaifihọ nọ ma wo evaọ emuhọ na gaga rite urere. 15  Wọhọ epanọ a ta nọ, “Nẹnẹ otẹrọnọ wha yo urru riẹ, wha ru udu rai gaga ha wọhọ epanọ a ru nọ o wha evedha egaga ze.” 16  Amono a yo, ghele na a ru Ọghẹnẹ eva dha gaga? Kọ ogbẹrọnọ ahwo kpobi nọ Mosis o su no Ijipti ze? 17  Ofariẹ, amono a tu Ọghẹnẹ oma ikpe udhuvẹ? Kọ ogbẹrọnọ enọ e raha uzi, enọ i whu evaọ udhude na? 18  Kọ amono o duwu iyei inọ a te ruọ evaọ eriosehọ riẹ hẹ? Kọ ogbẹrọnọ enọ e ghẹmeeyo? 19  Fikiere ma ruẹ nọ a sae ruọ evaọ eriosehọ riẹ hẹ fikinọ a kare ẹrọwọ.

Eme-Obotọ

Hayo “uzizie.”
Hayo “ọnọ ọ rrọ ukọ.”
Koyehọ, Jesu.