Ahwo Hibru 10:1-39

  • Idheidhe erao e sai si izieraha no ho (1-4)

    • Uzi na o jọ uwoho oware nọ o be tha (1)

  • Kristi o dhe idhe ẹsiẹvo rọkẹ oke kpobi (5-18)

  • Edhere ọkpokpọ nọ o re su kpohọ uzuazọ (19-25)

    • Ma re gbabọkẹ omakokohọ mai hi (24, 25)

  • Unuovẹvẹ kpahe uzi nọ a re keke aro fihọ raha (26-31)

  • O gwọlọ udu gbe ẹrọwọ re ma sai thihakọ (32-39)

10  Keme nọ orọnọ Uzi na yọ uwoho eware iwoma nọ e te tha na, orọnọ ugogo eware na dẹẹ hẹ na, o* rẹ sae rọ ẹkwoma idheidhe nọ a re dhe ẹsikpobi kukpe kukpe na ro ru enọ e be gọ Ọghẹnẹ jọ gbagba vievie he.  O hae jọnọ ere o rrọ, kọ a gbẹ hae siọ idheidhe nọ a jẹ hai dhe na ba? Keme enọ e be gọ Ọghẹnẹ nọ a ru fo no a gbẹ hai wo udu obrukpe fiki izieraha rai hi.  Ukpoye, idheidhe nana i je ru ae kareghẹhọ izieraha rai kukpe kukpe,  keme o lọhọ họ re azẹ iruẹ gbe ọrọ ewe o si izieraha no.  Fikiere, nọ ọ nyaze akpọ na, ọ ta nọ: “‘Whọ gwọlọ idheidhe erao gbe idhe efa ha, rekọ whọ ruẹrẹ ugboma họ kẹ omẹ.  Who wo evawere kpahe idhe emahọ gbe idhe uzioraha ha.’  Fikiere mẹ tẹ ta nọ: ‘Rri! Mẹ nyaze no (a kere kpahe omẹ evaọ uko-obe na) re me ru oreva ra, O Ọghẹnẹ.’”  Nọ ọ kake ta no nọ: “Whọ gwọlọ hayo wo evawere kpahe idheidhe erao gbe idhe efa gbe idhe emahọ gbe idhe uzioraha ha”—idheidhe nọ a re dhe wọhọ epanọ Uzi na o ta—  kẹsena ọ tẹ ta nọ: “Rri! Mẹ nyaze no re me ru oreva ra.” O si ọruẹrẹfihotọ ọsosuọ na no re ọ ruẹse rehọ ọrọ avọ ivẹ na mu. 10  A rọ ẹkwoma “oreva” nana ru omai fo no ẹkwoma ugboma Jesu Kristi nọ o ro dhe idhe ẹsiẹvo rọkẹ oke kpobi. 11  Ofariẹ, ozerẹ kpobi ọ rẹ ruọ oria iruo riẹ kẹdẹ kẹdẹ re o ru iruo ọrẹri je dhe oghẹrẹ idhe evona ẹsikpobi, enọ e rẹ sai si izieraha no riẹriẹriẹ vievie he. 12  Rekọ ọzae nana o dhe idhe ẹsiẹvo fiki izieraha onọ aghare riẹ o rrọ bẹdẹ bẹdẹ, ọ tẹ keria obọze Ọghẹnẹ, 13  no oke yena vrẹ, ọ tẹ be hẹrẹ bẹsenọ a re ru ewegrẹ riẹ họ oria nọ ọ rẹ rọ awọ riẹ kpahe. 14  Keme ẹkwoma idheidhe ẹsiẹvo nọ aghare riẹ o rrọ bẹdẹ bẹdẹ o ro ru enọ a bi ru fo na rrọ gbagba. 15  Ofariẹ, ẹzi ọfuafo na o se isẹri onana kẹ omai re, keme nọ ọ ta no inọ: 16  “‘Onana họ ọvọ nọ mẹ te re kugbe ae nọ edẹ yena e tẹ vrẹ no,’ ere Jihova* ọ ta. ‘Me ti fi izi mẹ họ udu rai, yọ me ti kere ai fihọ iroro rai.’” 17  Kẹsena ọ tẹ ta nọ: “Mẹ te gbẹ kareghẹhọ izieraha rai gbe iruẹru iyoma rai ofa ha.” 18  Whaọ nọ a tẹ rọ enana rọvrẹ ae no, o gbẹ gwọlọ idheidhe fiki uzioraha ha. 19  Fikiere, inievo, ma rẹ sae nya edhere nọ a rẹ rọ ruọ oria ọrẹri na ududu fiki azẹ Jesu, 20  onọ o rrọ edhere ọkpokpọ nọ o re su kpohọ uzuazọ, nọ o rovie kẹ omai ẹkwoma ekọtini na nọ ọ nyavrẹ, koyehọ, uwo riẹ. 21  Yọ ma wo ozerẹ ologbo nọ ọ be rẹrote uwou Ọghẹnẹ. 22  Fikiere, joma rehọ udu ofuafo gbe ẹrọwọ ọgaga nya bru Ọghẹnẹ, nọ orọnọ a ru udu mai gbe obruoziẹ-iroro omuomu mai fo no na ẹkwoma oware* nọ a frẹ ku omai gbe ugboma mai nọ a rọ ame ọfuafo họ fo no. 23  Joma dadamu ewhowho via ẹruore mai na ababọ ewhrehe, keme ọnọ ọ ya eyaa na o re ru ẹme riẹ gba. 24  Joma roro kpahe* ohwohwo re ma sai ru ohwohwo dhesẹ uyoyou je ru ohwohwo ru iruo iwoma, 25  ma re gbabọkẹ omakokohọ mai hi wọhọ epaọ uruemu otujọ, rekọ ma rẹ tuduhọ ohwohwo awọ, maero enẹna nọ wha be ruẹ nọ ẹdẹ na o bi si kẹle na. 26  Keme nọ ma te bi keke aro fihọ raha uzi nọ ma wuhrẹ eriariẹ egbagba uzẹme na no na, idheidhe ọfa kẹ izieraha o gbẹ riẹ hẹ, 27  rekọ oware nọ a re rẹro riẹ họ ẹdhoguo imuozọ gbe ofu ọgaga nọ ọ be te raha enọ e be wọso. 28  Ohwo kpobi nọ o dhesẹ orivo kẹ Uzi Mosis, a rẹ re iẹe ohrọ họ, o re whu nọ imava hayo imasa a te se isẹri kpahe iẹe. 29  Kọ ẹvẹ wha roro nọ uye nọ u re te ohwo nọ o rri Ọmọ Ọghẹnẹ vo o rẹ rro te, ọnọ o rri azẹ ọvọ na nọ a ro ru ei fo na fihọ oware evere, jẹ rọ orivo wha ekela se ẹzi na nọ Ọghẹnẹ ọ be rọ ẹkwoma riẹ dhesẹ uwowou ulogbo riẹ via? 30  Keme ma riẹ Ọnọ ọ ta nọ: “Orukele ọmẹ; mẹ te hwa zihe.” Gbe nọ: “Jihova* o ti bruoziẹ ahwo riẹ.” 31  O rrọ oware imuozọ re ohwo o kie ruọ obọ Ọghẹnẹ nọ ọ rrọ uzuazọ na. 32  Rekọ wha hae kareghẹhọ oke nọ u kpemu, okenọ wha ruẹ elo uzẹme na no, nọ wha ro thihakọ edawọ egaga avọ iye sa-sa. 33  Evaọ ẹsejọ a jẹ poviẹ owhai jẹ kẹ owhai uye evaọ ẹgbede,* yọ ẹsejọ wha jọ kugbe* enọ e jẹ ruẹ uye utioye. 34  Keme wha je weri kẹ inievo nọ e jọ uwou-odi, yọ wha jẹ ghọghọ dede nọ a gboro eware rai rehọ, keme wha riẹ nọ wha wo ukuoriọ nọ o rẹ raha ha nọ u woma vi eware yena. 35  Fikiere wha ku uvẹ nọ wha rẹ rọ ta ẹme ududu na fiẹ hẹ, onọ wha te jọ wo osohwa ulogbo. 36  Keme o gwọlọ nọ wha re thihakọ, re nọ wha te ru oreva Ọghẹnẹ no, wha vẹ sai wo orugba eyaa na. 37  Keme “omoke kakao gheghe” u kiọkọ, yọ “ọnọ ọ be nyaze na ọ te ze, ọ te raha oke he.” 38  “Rekọ odibo okiẹrẹe mẹ o ti wo uzuazọ fiki ẹrọwọ riẹ,” yọ, “otẹrọnọ o si uke kpemu, eva riẹ e te were omẹ hẹ.” 39  Whaọ ma rrọ oghẹrẹ ahwo nọ a re si uke kpemu kpohọ ọraha ha, rekọ oghẹrẹ ahwo nọ a wo ẹrọwọ nọ o re siwi uzuazọ mai.

Eme-Obotọ

Hayo o sae jọ nọ, “ahwo.”
Rri oria Otofa Eme.
Koyehọ, azẹ Jesu.
Hayo “daezọ; muẹrohọ.”
Rri oria Otofa Eme.
Evaọ Griki, “wọhọ ahwo nọ a fihọ afe-ughe.”
Hayo “wha dikihẹ gba.”