Kpohọ eme nọ e riẹ eva

Kpohọ oria izoẹme

Ahwo Hibru 1:1-14

  • Ọghẹnẹ ọ be rọ ẹkwoma Ọmọ riẹ ta ẹme (1-4)

  • Ọmọ na ọ rro vi ikọ-odhiwu (5-14)

1  Evaọ oke krẹkri nọ u kpemu, Ọghẹnẹ ọ rehọ ẹkwoma eruẹaro na ta ẹme kẹ esẹ-ode mai unuẹse buobu gbe evaọ idhere buobu.  Whaọ evaọ urere edẹ nana ọ rehọ ẹkwoma Ọmọ riẹ ta ẹme kẹ omai no, ọnọ o ro mu ọreuku eware kpobi jẹ rọ ẹkwoma riẹ ma eware nọ e rrọ obọ odhiwu gbe otọakpọ.*  Ọye họ uwoho oruaro Ọghẹnẹ gbe oghẹrẹ ohwo nọ ọ rrọ dẹẹ, ọ be rọ ẹme riẹ nọ o wo ẹgba ru eware kpobi jọ uzuazọ. Yọ nọ o ru omai fo no izieraha mai no, ọ tẹ keria obọze Ọghẹnẹ evaọ obọ odhiwu.  Fikiere ọ rro vi ikọ-odhiwu no, te epanọ o ro wo odẹ nọ u woma vi odẹ rai.  Wọhọ oriruo, ukọ-odhiwu vẹ Ọghẹnẹ ọ ta kẹ ẹdẹjọ no nọ: “Whẹ yọ ọmọ mẹ; me zihe ruọ ọsẹ ra no nẹnẹ”? Gbe inọ: “Mẹ te jọ ọsẹ riẹ, ọ vẹ te jọ ọmọ mẹ”?  Rekọ ọ ta kpahe okenọ ọ te rọ wariẹ vi Ọmọ ọsosuọ riẹ ziọ otọakpọ na inọ: “Jọ ikọ-odhiwu Ọghẹnẹ kpobi a rọ uzou kpotọ kẹe.”  Ofariẹ, ọ ta kpahe ikọ-odhiwu na nọ: “O ru ikọ-odhiwu riẹ emama ẹzi je ru egbodibo* riẹ ebrerae.”  Rekọ ọ ta kpahe Ọmọ na nọ: “Ọghẹnẹ họ agbara-Uvie ra bẹdẹ bẹdẹ, yọ ọkpọ-isuẹsu ra ọkpọ-isuẹsu ẹrẹreokie.*  Who you ẹrẹreokie, who te mukpahe emuemu. Oyejabọ nọ Ọghẹnẹ, Ọghẹnẹ ra, ọ rọ rehọ ewhri oghọghọ wholo owhẹ vi ibe ra.”* 10  Ofariẹ: “Evaọ emuhọ, O Olori, who fi otọhotọ otọakpọ na họ, idhiwu na e tẹ jẹ rrọ iruo abọ ra. 11  E te raha no, rekọ whọ te gbẹ jariẹ; yọ wọhọ ewu, aikpobi e te who no, 12  who ti kpiri ai wọhọ epanọ a re kpiri ogbru, yọ who ti nwene ai wọhọ ewu. Rekọ whọ rrọ epọvo na, yọ ikpe ra i ti wo ekuhọ họ.” 13  Rekọ ukọ-odhiwu vẹ ọ ta kẹ ẹdẹjọ no nọ: “Keria obọze mẹ bẹsenọ me re ru ewegrẹ ra họ oria nọ whọ rẹ rọ awọ ra kpahe”? 14  Kọ ogbẹrọnọ emama ẹzi nọ i bi ru iruo ọrẹri* aikpobi a rrọ, enọ a bi vi re a gbodibo kẹ enọ i ti wo esiwo?

Eme-Obotọ

Hayo “uyero-akpọ.” Rri oria Otofa Eme.
Hayo “enọ e be gbodibo kẹ ahwo.”
Hayo “uvioziẹ.”
Koyehọ, ivie efa erọ uyẹ Devidi.
Hayo “nọ e be gbodibo kẹ ahwo.”