Kpohọ eme nọ e riẹ eva

Kpohọ oria izoẹme

Ahwo Galesha 3:1-29

  • Ekoko Uzi na gbe ewo ẹrọwọ (1-14)

    • Fiki ẹrọwọ ohwo okiẹrẹe o ti ro wo uzuazọ (11)

  • Orọnọ fiki ekoko Uzi na a rọ ya eyaa kẹ Abraham ho (15-18)

    • Kristi họ ọmọ Abraham (16)

  • Epanọ Uzi na u ro te ahwo obọ gbe ẹjiroro riẹ (19-25)

  • Fiki ẹrọwọ a rọ rrọ emọ Ọghẹnẹ (26-29)

    • Enọ e rrọ erọ Kristi yọ emọ Abraham (29)

3  O whai ahwo Galesha nọ i wo areghẹ hẹ! Ono ọ viẹ owhai họ ruọ uyero uyoma nana, whai nọ a dhesẹ Jesu Kristi vevẹ kẹ inọ a tehe riẹ fihọ ure?  Mẹ be nọ owhai onọ nana: Kọ fiki ekoko Uzi na ẹzi na o ro te owhai obọ manikọ fiki ẹrọwọ nọ wha fihọ ẹme nọ wha yo?  Kọ ere wha ghẹ te? Nọ wha mu edhere nana họ ẹnya wha je lele ekpakpọ ẹzi ọfuafo na, kọ eware otọakpọ na wha be rẹroso enẹna nọ i ti fiobọhọ kẹ owhai nya te urere?  Kọ uye sa-sa nọ o bẹ owhai na, o bẹ owhai kufiẹ? Me roro ere he.  Nọ o rrọ ere na, kọ ọnọ ọ be kẹ owhai ẹzi na je bi ru iruo igbunu evaọ udevie rai na o bi ru enana kpobi fiki Uzi na nọ wha bi koko manikọ fiki ẹrọwọ nọ wha fihọ ẹme nọ wha yo?  Wọhọ epanọ Abraham “o fi ẹrọwọ họ Jihova,* a tẹ rọ fiki oyena rri rie nọ o kiẹrẹe.”  Ababọ avro, wha riẹ nọ enọ i wo ẹrọwọ eye họ emọ Abraham.  Whaọ nọ ikereakere na e jẹ ta kpahe oware nọ o te via evaọ obaro inọ Ọghẹnẹ o ti kuenu kẹ ahwo erẹwho na inọ a kiẹrẹe fiki ẹrọwọ, i whowho usi uwoma na kẹ Abraham kpahotọ inọ: “Ẹkwoma ra erẹwho na kpobi a ti ro wo oghale.”  Fikiere enọ i wo ẹrọwọ a bi wo eghale nọ i te Abraham nọ o wo ẹrọwọ na. 10  Ahwo kpobi nọ a rẹroso ekoko uzi na uye o rrọ ae uzou, keme a kere nọ: “Rọ kpahe eware kpobi nọ a kere fihọ Uzi na, otẹrọnọ ohwo jọ ọ be ruabọhọ koko ai hi, uye u tei.” 11  Ofariẹ, o rrọ vevẹ nọ Ọghẹnẹ ọ rẹ rọ ẹkwoma ekoko Uzi na kuenu kẹ ohwo inọ o kiẹrẹe he, keme “fiki ẹrọwọ ohwo okiẹrẹe o ti ro wo uzuazọ.” 12  Whaọ, u du gwọlọ nọ ohwo o re wo ẹrọwọ re o te koko Uzi na ha. Ukpoye, “ohwo kpobi nọ o bi ru eware nana o ti wo uzuazọ fikinọ o bi ru ai.” 13  Kristi ọ dẹ omai, o te si omai no uye Uzi na, ọ tẹ rọ enẹ zihe ruọ ọnọ uye o rrọ uzou viukpọ omai, keme a kere nọ: “Ohwo kpobi nọ a kare fihọ ure yọ ọnọ uye u te.” 14  Ẹjiroro onana họ re eghale nọ a ya eyaa rai kẹ Abraham na i te erẹwho na obọ ẹkwoma Kristi Jesu, re ẹzi nọ a ya eyaa riẹ na o te omai obọ fiki ẹrọwọ mai. 15  Mẹ be rọ oware nọ ahwo-akpọ a riẹ rọ kẹ ọtadhesẹ: A tẹ whobọhọ ọvọ no, o tẹ make rọnọ ohwo-akpọ ọ whobọhọ iẹe, omọfa ọ rẹ sae raha iẹe hayo fibae he. 16  Whaọ Abraham avọ ọmọ* riẹ a ya eyaa na kẹ. Orọnikọ o ta nọ “avọ emọ* ra” ha, wọhọ ẹsenọ e rrọ buobu. Ukpoye, o ta nọ, “avọ ọmọ ra,” koyehọ omọvo, ọnọ ọ rrọ Kristi. 17  Ofariẹ, mẹ be ta onana: Uzi na, onọ Ọghẹnẹ ọ kẹ nọ ikpe egba ene gbe ọgba (430) e vrẹ no, o raha ọvọ nọ Ọghẹnẹ ọ re kugbe Abraham na ha, u si eyaa na no otọ họ. 18  Keme otẹrọnọ fiki ekoko uzi a re ro wo ukuoriọ na, kiyọ o gbẹ rrọ fiki eyaa ha; rekọ Ọghẹnẹ ọ rehọ ukuoriọ na kẹ Abraham ẹkwoma eyaa. 19  Kọ fikieme a rọ kẹ Uzi na? A kẹ Uzi na re u ru iruthọ dhesẹ oma via, bẹsenọ ọmọ* nọ a ya eyaa na kẹ ọ rẹ nyaze; Ọghẹnẹ ọ rehọ e riẹ kẹ ikọ-odhiwu, a tẹ rehọ iẹe kẹ obruthe ro se ahwo na. 20  Nọ ahwo a te bu vrẹ omọvo a jẹ gwọlọ obruthe, rekọ Ọghẹnẹ ọvo ọ ya eyaa na. 21  Kọ Uzi na o wọso eyaa Ọghẹnẹ? Vievie! Keme otẹrọnọ a kẹ ahwo uzi nọ o rẹ sae wha uzuazọ ze no, kiyọ uzi na o hai ru ahwo kiẹrẹe. 22  Rekọ Ikereakere na i fi ahwo kpobi họ otọ igbo uzioraha, re eghale nọ a ya eyaa rai nọ i re te ohwo nọ o fi ẹrọwọ họ Jesu Kristi e ruẹsi te enọ i wo ẹrọwọ obọ. 23  Rekọ taure ẹrọwọ na ọ tẹ te ze, Uzi na o jẹ kpọ omai, ma jọ igbo riẹ, yọ ma je rẹro ẹrọwọ nọ ọ be tha na. 24  Fikiere Uzi na o jọ ọsẹro* mai nọ o su omai bru Kristi re a sae rọ fiki ẹrọwọ kuenu kẹ omai nọ ma kiẹrẹe. 25  Rekọ nọ ẹrọwọ na ọ ze no na, ma gbẹ rrọ otọ ọsẹro ho. 26  Evaọ uzẹme, whai kpobi emọ Ọghẹnẹ fiki ẹrọwọ nọ wha fihọ Kristi Jesu. 27  Keme whai kpobi nọ e họ-ame fihọ Kristi a wọhọ Kristi no. 28  Fikiere ohẹriẹ o rrọ udevie ohwo Ju avọ ohwo Griki hi, ọrigbo avọ ọmuyẹ hẹ, ọzae avọ aye he, keme whai kpobi ọvo evaọ usu kugbe Kristi Jesu. 29  Ofariẹ, wha tẹ rrọ erọ Kristi, whai ginọ emọ* Abraham, ereuku fiki eyaa.

Eme-Obotọ

Rri oria Otofa Eme.
Evaọ Griki, “ubi.”
Evaọ Griki, “ibi.”
Evaọ Griki, “ubi.”
Hayo “oriwi-ọmọ.”
Hayo “ubi.”