Taitọs 3:1-15

  • Romakpotọ kẹ isu gbe ilori (1-3)

  • Ruẹrẹ oma kpahe kẹ iruo iwoma (4-8)

  • Who wobọ kugbe avro-ọvro gbe iwuhrẹ erue he (9-11)

  • Eme kpahe ugogo ahwo jọ gbe uyere (12-15)

3  Hae kareghẹhọ ae inọ a romakpotọ je yoẹme kẹ egọmeti gbe enọ i wo udu-esuo, inọ a ruẹrẹ oma kpahe kẹ iruo iwoma kpobi,  inọ a ta ẹme oyoma kpahe ohwo ọvo ho, a jọ enọ e rẹ whọ ẹwhọ họ, rekọ a jọ enọ i wo iroro,* jọ wolẹ evaọ kabọ kabọ kugbe ahwo kpobi.  Keme mai omamai re ma jọ igheghẹ okejọ, ma jẹ ghẹmeeyo, a je su omai thọ, ma jọ erigbo kẹ isiuru gbe omaweromẹ sa-sa, ma je zue evaọ eyoma, ma jẹ re ihri, ma je ru eware etọtọ, ma je mukpahe ohwohwo.  Rekọ nọ Osiwi mai, Ọghẹnẹ o dhesẹ uwowou gbe uyoyou riẹ kẹ ahwo-akpọ,  o siwi omai fiki ohrọ-oriọ riẹ, orọnọ fiki iruo ikiẹrẹe jọ nọ ma ru hu. O siwi omai ẹkwoma ẹhọ nọ ọ họ omai fo nọ u ru omai ziọ uzuazọ gbe ẹkwoma ẹzi ọfuafo nọ o ro ru omai kpokpọ.  Ọ rọ ẹkwoma Jesu Kristi Osiwi mai ku ẹzi nana ku omai ziezi,  re nọ ọ tẹ rọ ẹkwoma uwowou ulogbo riẹ* kuenu kẹ omai nọ ma kiẹrẹe no, ma vẹ jọ ereuku uzuazọ ebẹdẹ bẹdẹ wọhọ epaọ ẹruore mai.  Nọ eme nọ a re fievahọ, yọ mẹ gwọlọ nọ whọ rẹ hae ta kpahe eme nana ẹsikpobi, re enọ i fi ẹrọwọ họ Ọghẹnẹ a gbẹ sai fi iroro rai họ eruo iruo iwoma. Eware nana i woma yọ e rẹ kẹ ahwo erere.  Rekọ who wobọ vievie he evaọ avro-ọvro ogheghẹ gbe iku uyẹ-ukele gbe ẹwhọ gbe ohọre fiki Uzi na, keme e rẹ kẹ erere he, e tẹ jẹ rrọ eware ifofe. 10  Ohwo nọ ọ be vaha iwuhrẹ erue, siomanoi nọ whọ tẹ kẹe ohrẹ* te isiava no, 11  keme whọ riẹ nọ ohwo otiọye ọ nyasiọ edhere na ba no, ọ be raha uzi yọ ọ wha obrukpe se omariẹ no. 12  Okenọ me te vi Atẹmas hayo Tikikọs bru owhẹ ze, dawo ẹgba ra kpobi re whọ nya bru omẹ ze obọ Nikọpọlis, keme etẹe mẹ jiroro nọ mẹ te jọ evaọ oke uriri na. 13  Kẹ Zinas ọnọ ọ riẹ Uzi na ziezi na gbe Apọlọs eware nọ a gwọlọ re oware ovo o gbẹ kare ae evaọ erẹ rai na ha. 14  Rekọ jọ ahwo mai a wuhrẹ epanọ a re ru iruo iwoma re, re a sai fiobọhọ evaọ eware nọ a jọ gwọlọ obufihọ kpata kpata, re a gbẹ jọ enọ e be mọ ibi hi hi. 15  Inievo kpobi nọ e rrọ kugbe omẹ a bi yere owhẹ. Yere enọ i you omai evaọ ẹrọwọ na kẹ omẹ. Jọ Ọghẹnẹ o dhesẹ uwowou ulogbo riẹ kẹ owhai kpobi ẹsikpobi.

Eme-Obotọ

Hayo “enọ e rẹ kpairoro vrẹ orai, a vẹ rọwo orọ amọfa, enọ i re si eware kekeke he.”
Koyehọ, uwowou ulogbo Ọghẹnẹ.
Hayo “unuovẹvẹ.”