Kpohọ eme nọ e riẹ eva

Kpohọ oria izoẹme

Jọn 17:1-26

  • Olẹ urere Jesu kugbe ikọ riẹ (1-26)

    • Re a wo uzuazọ ebẹdẹ bẹdẹ a rẹ riẹ Ọghẹnẹ (3)

    • Ileleikristi a wo obọ kugbe akpọ na ha (14-16)

    • “Ẹme ra họ uzẹme” (17)

    • ‘Me dhesẹ odẹ ra via no’ (26)

17  Nọ Jesu ọ ta eme nana no, ọ tẹ kpare ovao rri ehru ọ tẹ ta nọ: “Ọsẹ, auwa na ọ ze no. Kẹ ọmọ ra oruaro re ọmọ ra ọ kẹ owhẹ oruaro,  wọhọ epanọ whọ kẹ riẹ udu re o wuzou ahwo-akpọ kpobi na, re ọ rọ uzuazọ ebẹdẹ bẹdẹ kẹ ahwo kpobi nọ whọ kẹ riẹ na.  Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ,* Ọghẹnẹ uzẹme ọvo na, gbe ọnọ who vi ze na, Jesu Kristi.  Mẹ kẹ owhẹ oruaro no evaọ otọakpọ na, keme me ru iruo nọ whọ kẹ omẹ re no.  Fikiere, Ọsẹ, kẹ omẹ oruaro evaọ abotọ ra, oghẹrẹ oruaro nọ mẹ jọ abotọ ra wo taure akpọ na o te ti muhọ.*  “Me dhesẹ odẹ ra via no kẹ ahwo nọ whọ kẹ omẹ evaọ akpọ na. Era a jọ, whọ tẹ rehọ ae kẹ omẹ, yọ a ru lele ẹme ra.  A riẹ no inọ whẹ họ ọnọ ọ kẹ omẹ eware kpobi;  keme mẹ ta eme nọ whọ ta kẹ omẹ kẹ ai no, yọ a jẹ rae rehọ no a te ti vuhumu no inọ obọ ra me no ze, jẹ rọwo nọ whẹ o vi omẹ ze.  Mẹ be lẹ kpahe ae; mẹ be lẹ kpahe akpọ na ha, rekọ kpahe enọ whọ rọ kẹ omẹ, keme era a rrọ; 10  eware mẹ kpobi era, era yọ emẹ, yọ me wo oruaro no evaọ udevie rai. 11  “Mẹ gbẹ be te jọ akpọ na ha, rekọ a rrọ akpọ na yọ mẹ be nya bru owhẹ ze. Ọsẹ ọrẹri, sẹro rai fiki odẹ ra nọ whọ kẹ omẹ,* re a ruẹse jọ ọvo* wọhọ epanọ ma rrọ ọvo* na. 12  Nọ mẹ jọ kugbe ai, mẹ jẹ sẹro rai fiki odẹ ra nọ whọ kẹ omẹ; yọ mẹ sẹro rai, ọvuọvo rai o vru hu ajokpaọ ọmọ ọraha na, re Ikereakere na e ruẹsi rugba. 13  Rekọ enẹna mẹ be nya bru owhẹ ze, yọ mẹ be ta eme nana nọ mẹ gbẹ rrọ akpọ na re a ruẹse jọ omarai wo oghọghọ nọ me wo vọvọ. 14  Mẹ kẹ rai ẹme ra no, rekọ akpọ na o mukpahe ae, keme a wo obọ kugbe akpọ na ha wọhọ epanọ me wo obọ kugbe akpọ na ha na. 15  “Orọnikọ mẹ be lẹ owhẹ nọ who si ai no akpọ na ha, rekọ inọ whọ sẹro rai fiki omuomu na. 16  A wo obọ kugbe akpọ na ha wọhọ epanọ me wo obọ kugbe akpọ na ha na. 17  Ru ai fo* ẹkwoma uzẹme na; ẹme ra họ uzẹme. 18  Wọhọ epanọ who vi omẹ ziọ akpọ na, ere me vi rai ruọ akpọ na re. 19  Me bi ru oma mẹ fuafo fiki rai, re uzẹme na o sai ru ai fo re. 20  “Mẹ be lẹ, orọnikọ kpahe enana ọvo ho, rekọ te enọ i bi fi ẹrọwọ họ omẹ ẹkwoma ẹme rai, 21  re aikpobi a sae jọ ọvo, wọhọ epanọ whẹ, Ọsẹ, ọ rrọ usu kugbe omẹ, mẹ tẹ jẹ rrọ usu kugbe owhẹ na, re a sae jọ usu kugbe omai re, re akpọ na ọ sae rọwo nọ whẹ o vi omẹ ze. 22  Mẹ kẹ rai oruaro nọ whọ kẹ omẹ no, re a sae jọ ọvo wọhọ epanọ ma rrọ ọvo na. 23  Mẹ rrọ usu kugbe ai, yọ whọ rrọ usu kugbe omẹ, re a sai zihe ruọ ọvo,* re akpọ na ọ sae riẹ nọ whẹ o vi omẹ ze gbe nọ who you rai wọhọ epanọ who you omẹ. 24  Ọsẹ, mẹ gwọlọ nọ enọ whọ kẹ omẹ na a jọ kugbe omẹ evaọ oria nọ mẹ rrọ, re a ruẹse ruẹ oruaro mẹ nọ whọ kẹ omẹ, keme who you omẹ taure akpọ na o te ti muhọ.* 25  Ọsẹ okiẹrẹe, evaọ uzẹme, akpọ na ọ re riẹ owhẹ hẹ, rekọ mẹ riẹ owhẹ, yọ enana a riẹ no inọ whẹ o vi omẹ ze. 26  Me dhesẹ odẹ ra via kẹ ae no yọ me ti gbe dhesẹ iẹe via, re a ruẹsi dhesẹ oghẹrẹ uyoyou nọ who wo kẹ omẹ na, mẹ vẹ jọ usu kugbe ae.”

Eme-Obotọ

Hayo “a re wuhrẹ kpahe owhẹ.” Ẹme Griki nọ a fa na u dhesẹ oware nọ a rẹ ruabọhọ.
Onana u dhesẹ okenọ Adamu avọ Ivi a ro mu emọ họ eyẹ.
Otofa Jesu họ “Jihova họ esiwo.”
Hayo “okugbe ọvo.”
Hayo “okugbe ọvo.”
Hayo “wo ohẹriẹ; jọ ọrẹri.”
Hayo “jọ okugbe ọvo evaọ kabọ kabọ.”
Onana u dhesẹ okenọ Adamu avọ Ivi a ro mu emọ họ eyẹ.