Kpohọ eme nọ e riẹ eva

Kpohọ oria izoẹme

Iruẹru 3:1-26

  • Pita o siwi ọyareware nọ ọ ko (1-10)

  • Ẹme nọ Pita ọ ta evaọ Ogebara Solomọn (11-26)

    • “Ẹruẹrẹhọ eware kpobi” (21)

    • Ọruẹaro wọhọ Mosis (22)

3  Ẹdẹjọ Pita avọ Jọn a je kpobọ etẹmpol na evaọ auwa olẹ, onọ o rrọ auwa avọ izii,*  yọ ahwo a jẹ wọ ọzae jọ ze ọnọ ọ ko anwẹnọ a ro yẹi. Kẹdẹ kẹdẹ a jẹ hae wọe kẹle unuẹthẹ etẹmpol na nọ a re se Owowoma, re ọ sae yare igho* mi enọ e be ruọ evaọ etẹmpol na.  Nọ ọ ruẹ Pita avọ Jọn nọ a be gwọlọ ruọ etẹmpol na, ọ tẹ be yare ae ugho.*  Rekọ Pita avọ Jọn a te rri rie a tẹ ta kẹe nọ: “Rri omai.”  Fikiere ọ tẹ tẹrovi ai, bi rẹro nọ a be te kẹe oware jọ.  Rekọ Pita ọ tẹ ta nọ: “Me wo isiliva gbe igoru hu, rekọ mẹ be te kẹ owhẹ oware nọ me wo. Evaọ odẹ Jesu Kristi ohwo Nazarẹt na, kpama re whọ nya!”  Pita o te kru obọze riẹ rọ kpare iẹe kpama. Ẹsiẹvo na evawọ gbe ekuawọ riẹ e tẹ ga;  ọ tẹ nwani dikihẹ, o te muhọ ẹnya. O te lele ai ruọ evaọ etẹmpol na, be nya, bi duola, je bi jiri Ọghẹnẹ.  Ahwo na kpobi a ruẹ e riẹ nọ ọ be nya je bi jiri Ọghẹnẹ na. 10  A te mu ei họ evuhu, inọ ọzae nana họ ohwo nọ ọ jẹ hae keria re a kẹe igho* evaọ akotọ unuẹthẹ etẹmpol na nọ a re se Unuẹthẹ Owowoma na, oware nọ o via kẹe na u te gbe ai unu thesiwa jẹ lẹliẹ ae ghọghọ gaga. 11  Nọ ọzae na o gbe kru Pita avọ Jọn obọ na, ahwo na kpobi a tẹ dhẹ bru rai ze evaọ oria nọ a re se Ogebara Solomọn* avọ akpọ nọ o gbe rai unu thesiwa. 12  Nọ Pita ọ ruẹ onana, ọ tẹ ta kẹ ahwo na nọ: “Whai ahwo Izrẹl, fikieme onana u bi ro gbe owhai unu, kọ fikieme wha bi ro rri omai wọhọ nọ ogaga obọmai ma ro ru ei nya hayo fiki epanọ ma roma kẹ Ọghẹnẹ te? 13  Ọghẹnẹ Abraham gbe Aiziki gbe Jekọp, Ọghẹnẹ esẹ-ode mai, ọ kẹ Jesu Odibo riẹ oruaro no, ọnọ wha rehọ kẹ Pailet jẹ se evaọ iraro riẹ dede nọ ọ jiroro nọ o re siobọnoi. 14  Ẹhẹ, wha siọ ohwo yena nọ ọ rrọ ọrẹri je kiẹrẹe na, wha tẹ yare nọ o siobọno ogbulegbu kẹ owhai, 15  rekọ wha te kpe Ọnọ a rẹ rọ ẹkwoma riẹ wo uzuazọ na. Rekọ Ọghẹnẹ ọ kpare riẹ no uwhu ze, yọ ma rọ ẹro ruẹ e riẹ. 16  Yọ ẹkwoma odẹ riẹ, avọ ẹrọwọ nọ ma fihọ odẹ riẹ oye u ru nọ oma ọzae nana nọ wha be ruẹ jẹ riẹ na o rọ ga. Ẹrọwọ nọ ma fihọ iẹe oye u ru nọ oma ọzae nana nọ ọ rrọ aro rai na o rọ ga. 17  Whaọ inievo, mẹ riẹ nọ ogbori wha ro ru onana, wọhọ epanọ isu rai a ru re. 18  Rekọ Ọghẹnẹ ọ rọ enẹ ru eware nọ ọ rehọ eruẹaro na kpobi whowho via anwẹdẹ gba, inọ Kristi na ọ te ruẹ uye. 19  “Fikiere, wha kurẹriẹ, wha nwene idhere rai* re a rọ izieraha rai rọvrẹ owhai, re ezi omosasọ ọ ruẹsi no obọ Jihova* omariẹ* bru owhai ze 20  re o vi Kristi nọ a ro mu kẹ owhai na ze, koyehọ Jesu. 21  Ọnana ọ rẹ jọ obọ odhiwu hrọ bẹsenọ oke ẹruẹrẹhọ eware kpobi u re te no, onọ Ọghẹnẹ ọ rehọ eruẹaro anwae riẹ ta kpahe na. 22  Evaọ uzẹme, Mosis ọ ta nọ: ‘Jihova* Ọghẹnẹ rai ọ te jọ udevie inievo rai rọ ọruẹaro nọ ọ wọhọ omẹ ro mu. Wha rẹ gaviezọ kẹ oware kpobi nọ ọ ta kẹ owhai hrọ. 23  Evaọ uzẹme, ohwo kpobi nọ ọ gaviezọ kẹ Ọruẹaro ọyena ha a re ti kpei kufiẹ no udevie ahwo na.’ 24  Yọ eruẹaro na kpobi, no Samuẹle ze rite enọ e rọ kpahe iẹe kpobi a ta vevẹ kpahe edẹ nana re. 25  Whai yọ emọ eruẹaro na gbe ereuku ọvọ nọ Ọghẹnẹ ọ re kugbe esẹ-ode rai, nọ ọ ta kẹ Abraham nọ: ‘Ẹkwoma ọmọ* ra iviuwou otọakpọ na kpobi a ti ro wo oghale.’ 26  Nọ Ọghẹnẹ ọ rọ Odibo riẹ mu no, ọ tẹ kaki vi ei se owhai re ọ ghale owhai ẹkwoma obọ nọ o re fihọ kẹ owhai kurẹriẹ no iruẹru imuomu rai.”

Eme-Obotọ

Koyehọ, oware wọhọ ighọjọ esa uvo.
Hayo “ekẹ ohrọ.”
Hayo “ekẹ ohrọ.”
Hayo “ekẹ ohrọ.”
Idhere esese nọ a bọ wọhọ ogebara nọ i wo edẹẹ evaọ tabọ tabọ nọ a tehe ehru rai ruru.
Evaọ Griki, “kuomarẹriẹ.”
Rri oria Otofa Eme.
Evaọ Griki, “no ovao Jihova.”
Rri oria Otofa Eme.
Evaọ Griki, “ubi.”