Kpohọ eme nọ e riẹ eva

Kpohọ oria izoẹme

Iruẹru 2:1-47

  • A ku ẹzi ọfuafo ku ae evaọ Pẹntikọst (1-13)

  • Ẹme nọ Pita ọ ta (14-36)

  • Ogbotu a kurẹriẹ fiki ẹme Pita (37-41)

    • Ahwo 3,000 a họ-ame (41)

  • Ilele na a je kuomagbe (42-47)

2  Whaọ evaọ ẹdẹ Ehaa Pẹntikọst, ilele na kpobi a kokohọ oria ovo.  Idudhe na, edo jọ o te do no obọ odhiwu ze, wọhọ edo ofou ọgaga, o tẹ vọ uwou nọ a keria na.  A tẹ ruẹ eware jọ nọ e wọhọ ẹrọo nọ e be ware wọhọ erae, e tẹ ghale oma fihọ ehru uzou rai omomọvo,  ẹzi ọfuafo ọ tẹ vọ ai kpobi oma, a te mu evẹrẹ* sa-sa họ ẹjẹ wọhọ epanọ ẹzi na ọ kẹ rai ẹgba.  Evaọ oke oyena, ahwo Ju nọ a rrọ egba-egagọ nọ a no erẹwho akpọ na kpobi ze a jọ Jerusalẹm.  Fikiere nọ edo nana ọ romavia, ogbotu ahwo a tẹ dhẹ kuku, u te gbe ai unu keme a be jọ unu ilele na yo ọvuọ ẹvẹrẹ riẹ.  Evaọ uzẹme, u gbe rai unu thesiwa a tẹ ta nọ: “Rri, kọ ogbẹrọnọ ahwo nana kpobi nọ a be ta ẹme na ahwo Galili?  Kọ ẹvẹ ma be rọ jọ unu rai yo ọvuọ ẹvẹrẹ ẹwho riẹ?*  Ahwo Pathia, ahwo Midia, ahwo Elam; enọ e be rria Mẹsopotemia, Judia, Kapadosia, Pọntọs, gbe ubrotọ Esia, 10  Frijia, Pamfilia, Ijipti, gbe ubrotọ Libia, onọ o rrọ ofẹ Sairini; enọ i no obọ Rom ze, te ahwo Ju gbe enọ i kurẹriẹ ruọ egagọ ahwo Ju; 11  ahwo Kriti; gbe ahwo Arebia, ma bi yo nọ a be rọ evẹrẹ mai ta kpahe iruo urirẹ Ọghẹnẹ.” 12  Ẹhẹ, u gbe rai kpobi unu gaga, a tẹ jẹ ta kẹ ohwohwo nọ: “Eme onana u dhesẹ?” 13  Rekọ amọfa a te je se ae ẹkoko nọ: “A da idi bẹ no.” 14  Rekọ Pita avọ ikọ Ikpegbọvo edekọ na a tẹ kpama, ọ tẹ be rọ urru oruarua ta kẹ ae nọ: “Whai ahwo Judia gbe enọ e be rria Jerusalẹm kpobi, wha gaviezọ ziezi kẹ eme mẹ re wha wo otoriẹ onana. 15  Ahwo nana a da idi hi, wọhọ epanọ wha bi roro na, keme auwa avọ esa* oke o rrọ na. 16  Ukpoye, onana yọ oware nọ a rọ ẹkwoma Joẹl ọruẹaro na ta: 17  ‘Ọghẹnẹ ọ ta nọ, “Yọ evaọ edẹ urere na, me ti ku ẹzi mẹ ku oghẹrẹ ahwo kpobi, emezae gbe emetẹ rai e rẹ te ruẹaro, ighele emezae rai e rẹ te ruẹ eruẹaruẹ, ekpako rai e rẹ te wezẹ ewezẹ, 18  yọ me ti tube ku ẹzi mẹ ku erigbo ezae gbe erọ eyae mẹ dede evaọ edẹ eyena, a vẹ te ruẹaro. 19  Me ti ru eware igbunu* evaọ obọ ehru, jẹ jọ otọakpọ na ru eware eka: azẹ, gbe erae gbe iwiri egaga. 20  Ọre o ti zihe ruọ ebi, ọvẹre o ve ti zihe ruọ azẹ taure ẹdẹ ologbo avọ urirẹ ọrọ Jihova* ọ tẹ te ze. 21  Yọ ohwo kpobi nọ o bi se odẹ Jihova* a re ti siwi ei.”’ 22  “Whai ahwo Izrẹl, wha gaviezọ: Jesu ohwo Nazarẹt na yọ ohwo nọ Ọghẹnẹ o dhesẹ via kẹ owhai ẹkwoma iruo ilogbo, eware igbunu, gbe eware eka nọ Ọghẹnẹ ọ rehọ e riẹ ru evaọ udevie rai, wọhọ epanọ whai omarai wha riẹ na. 23  Wha mu ọzae nana, wọhọ epanọ Ọghẹnẹ ọ riẹ anwẹdẹ, o tẹ jẹ rrọ oreva riẹ nọ ọ jiroro riẹ kpahotọ, wha tẹ rehọ iẹe kẹ enọ e riẹ Ọghẹnẹ hẹ re a tehe iẹe fihọ ure, wha te gine kpei. 24  Rekọ Ọghẹnẹ ọ kpare riẹ no uwhu ze ẹkwoma edada* uwhu nọ o si rie no, keme uwhu u wo ẹgba nọ u re ro kru rie ribri hi. 25  Keme Devidi ọ ta kpahe iẹe nọ: ‘Me fi Jihova* họ aro mẹ ẹsikpobi, fikinọ ọ rrọ obọze mẹ, udu u re bru omẹ hẹ. 26  Fiki onana udu mẹ o tẹ vọ avọ evawere, ẹrọo mẹ o te bo ubo oghọghọ. Yọ mẹ te rria avọ ẹruore; 27  keme whọ te nyasiọ omẹ ba Uki* hi, yọ whọ te kuvẹ re ugboma odibo ra u gbo ho. 28  Who dhesẹ edhere nọ o re su kpohọ uzuazọ kẹ omẹ no, who ti ru omẹ wo oghọghọ ulogbo evaọ aro ra.’ 29  “Whai ahwo, inievo, jọ mẹ ta ẹme kẹ owhai ududu kpahe Devidi ọsẹ-ode mai, inọ o whu a te ki ei, yọ uki riẹ o rrọ kugbe omai rite inẹnẹ. 30  Fikinọ ọ jọ ọruẹaro ọ tẹ jẹ riẹ nọ Ọghẹnẹ ọ ya eyaa kẹe nọ ọ te rehọ ọmọ* riẹ jọ keria agbara-uvie riẹ, 31  ọ kparo ruẹ ẹkparomatha Kristi na jẹ ta ẹme kpahe iẹe, inọ a nyase iẹe ba Uki* hi, yọ ugboma riẹ u gbo ho. 32  Ọghẹnẹ ọ kpare Jesu nana no uwhu ze, yọ mai enana kpobi ma ruẹ e riẹ. 33  Whaọ fikinọ a kpare riẹ kpehru kpohọ obọze Ọghẹnẹ no, yọ Ọsẹ na ọ kẹ riẹ ẹzi ọfuafo nọ ọ ya eyaa riẹ na no, o te ku ẹzi na ku omai, oye wha be ruẹ je yo eme nọ ọ be wọ omai ta na. 34  Keme Devidi o muvrẹ kpobọ odhiwu hu, rekọ ọyomariẹ ọ ta nọ, ‘Jihova* ọ ta kẹ Olori mẹ nọ: “Keria obọze mẹ 35  bẹsenọ me re ru ewegrẹ ra họ oria nọ whọ rẹ rọ awọ ra kpahe.”’ 36  Fikiere jọ uwou Izrẹl soso a riẹ vevẹ inọ Ọghẹnẹ o ru Jesu nana nọ wha kpe, nọ wha kare fihọ ure kpe na họ Olori gbe Kristi.” 37  Whaọ nọ a yo eme nana o tẹ kẹ ae uye gaga, a tẹ ta kẹ Pita avọ ikọ edekọ na nọ: “Inievo, kọ eme ma re ru?” 38  Pita ọ tẹ ta kẹ ae nọ: “Wha kurẹriẹ, re whai omomọvo ọ họ-ame evaọ odẹ Jesu Kristi re wha sai wo erọvrẹ izieraha rai, wha ve ti wo okẹ ọvọvẹ orọ ẹzi ọfuafo na. 39  Keme whai gbe emọ rai a ya eyaa na kẹ, gbe ahwo kpobi nọ a rrọ ugbothabọ, ahwo kpobi nọ Jihova* Ọghẹnẹ mai o ti se bru omariẹ.” 40  Yọ ọ rọ eme efa buobu se isẹri vevẹ jẹ tuduhọ ae awọ nọ: “Wha siomano oge omuomu nana re wha sae zọ.” 41  Fikiere enọ e rehọ evawere dede eme riẹ rehọ a tẹ họ-ame, yọ evaọ ẹdẹ ọyena ahwo nọ a bu te oware wọhọ idu esa (3,000) a kuomagbe ai. 42  A tẹ ruabọhọ jẹ roma kẹ iwuhrẹ ikọ na, jẹ hai kuomagbe,* jẹ re emu kugbe, jẹ hae lẹ ẹsikpobi. 43  Fikiere ozọ u te mu ahwo na kpobi họ emu, eware igbunu gbe eware eka buobu e tẹ jẹ romavia ẹkwoma ikọ na. 44  Enọ i kurẹriẹ na kpobi a jọ kugbe je wo eware kpobi kugbe, 45  a jẹ zẹ ekwakwa rai gbe etọ rai a vẹ ghale igho nọ a rọ zẹ ai na kẹ ahwo kpobi, wọhọ epanọ ẹgwọlọ omomọvo ọ rrọ. 46  Yọ kẹdẹ kẹdẹ a je kuomagbe evaọ etẹmpol na avọ ẹjiroro ọvo, yọ a jẹ hae re emu evaọ iwou ohwohwo jẹ ghale emu rai kẹ ohwohwo avọ oghọghọ ulogbo gbe eva efuafo, 47  bi jiri Ọghẹnẹ yọ ahwo kpobi a jẹ ta ẹme ezi rai. Yọ kẹdẹ kẹdẹ Jihova* o je ku enọ o bi ti siwi kugbe ai.

Eme-Obotọ

Hayo “erọunu.”
Hayo “ẹvẹrẹ ẹwho nọ a jọ yẹi?”
Oware wọhọ ighọjọ izii ohiohiẹ.
Hayo “eka.”
Rri oria Otofa Eme.
Rri oria Otofa Eme.
Hayo o sae jọ nọ, “ifi.”
Rri oria Otofa Eme.
Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
Evaọ Griki, “ọmọ otorẹ.”
Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
Rri oria Otofa Eme.
Rri oria Otofa Eme.
Hayo “a jẹ ghale eware nọ a wo kugbe ohwohwo.”
Rri oria Otofa Eme.