Kpohọ eme nọ e riẹ eva

Kpohọ oria izoẹme

Ahwo Kọlọsi 4:1-18

  • Ohrẹ kẹ ilori nọ i wo erigbo (1)

  • “Wha ruabọhọ olẹ” (2-4)

  • Rọ areghẹ yerikugbe ahwo obọ otafe (5, 6)

  • Uyere urere (7-18)

4  Whai ilori, wha yerikugbe erigbo rai evaọ edhere okiẹrẹe gbe oghẹrẹ nọ u fo, keme wha riẹ nọ whai omarai wha wo Olori nọ ọ rrọ obọ odhiwu.  Wha ruabọhọ olẹ, hae jaja aro vi evaọ olẹ avọ uyere-okẹ.  Wha hae lẹ kẹ omai re, inọ Ọghẹnẹ o rovie ẹthẹ kẹ omai nọ ma rẹ rọ ta ẹme riẹ, re ma sai whowho oware udidi ọrẹri nọ u kiekpahe Kristi na, onọ mẹ rọ fiki riẹ rrọ uwou-odi na,  gbe re mẹ sai whowho iei vevẹ wọhọ epanọ u fo nọ me re ru.  Wha hae rọ areghẹ yerikugbe ahwo obọ otafe, hae rehọ oke rai ruiruo ziezi.  Jọ eme rai e hae jọ wowou ẹsikpobi, wọhọ ẹsenọ a fi uwhei họ ae, re wha riẹ epanọ wha rẹ rọ kẹ ohwo kpobi uyo.  Tikikọs, oniọvo oyoyou mẹ gbe odibo nọ ọ vọ avọ ẹrọwọ gbe ọnọ ma gbẹ rrọ ọrigbo evaọ Olori na, o ti gbiku eware kpobi nọ i kiekpahe omẹ kẹ owhai.  Me bi vi ei bru owhai ze re wha riẹ epanọ ma rrọ, ọ vẹ sasa owhai oma.  Ọyomariẹ avọ Onẹsimọs, oniọvo oyoyou mẹ nọ o wo ẹrọwọ, ọnọ o no oborai ze; a ti gbiku eware kpobi nọ e rrọ obonẹ via kẹ owhai. 10  Aristakọs nọ ma gbẹ rrọ uwou-odi o bi yere owhai, ere ọvona Mak ọnọ avọ Banabas a rrọ emọ-inievo (ọnọ ma vuẹ owhai nọ wha dede rehọ nọ ọ tẹ nya bru owhai ze), 11  gbe Jesu ọnọ a re se Jọstọs, enọ e rrọ usu enọ e yawo. Ahwo nana ọvo họ ibe iruiruo mẹ evaọ iruo Uvie Ọghẹnẹ, yọ a rrọ omosasọ ulogbo kẹ omẹ. 12  Ẹpafras, ọrigbo Kristi Jesu nọ o no oborai ze o bi yere owhai. Ọ be lẹ gaga roro owhai ẹsikpobi, re wha sai dikihẹ ga ziezi je wo imuẹro egaga kpahe oreva Ọghẹnẹ kpobi. 13  Me bi se isẹri kẹe inọ ọ be daoma gaga fiki rai gbe fiki inievo nọ e rrọ Laodisia gbe Haerapọlis. 14  Luk edọkita oyoyou na o bi yere owhai, ere Dimas re. 15  Wha yere inievo obọ Laodisia kẹ omẹ, wha yere Nimfa oniọvo-ọmọtẹ mai gbe ukoko nọ o rrọ uwou riẹ. 16  Wha te se ileta nana no, wha ru re a je sei evaọ ukoko obọ Laodisia, wha ve je se onọ me kere se ahwo Laodisia. 17  Wha vẹ jẹ ta kẹ Akipọs nọ: “Muẹrohọ iruo odibọgba nọ whọ jẹrehọ evaọ Olori na, re whọ sai ru ei gba.” 18  Mẹ Pọl ọ be rọ obọ mẹ kere eme uyere nana ro yere owhai. Wha hae kareghẹhọ omẹ evaọ uwou-odi nọ mẹ rrọ na. Jọ Ọghẹnẹ o dhesẹ uwowou ulogbo kẹ owhai ẹsikpobi.

Eme-Obotọ