Kpohọ eme nọ e riẹ eva

Kpohọ oria izoẹme

2 Ahwo Tẹsalonika 1:1-12

  • Uyere (1, 2)

  • Ẹrọwọ inievo Tẹsalonika o bi dhe ẹgẹga (3-5)

  • A te rọ uye kẹ enọ i bi yoẹme he (6-10)

  • Olẹ rọkẹ ukoko na (11, 12)

1  Mẹ Pọl, Silvanọs,* gbe Timoti, ro se ukoko obọ Tẹsalonika nọ o rrọ usu kugbe Ọghẹnẹ Ọsẹ mai gbe Olori na Jesu Kristi:  Jọ Ọghẹnẹ Ọsẹ na gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.  Inievo, o gba omai họ ẹsikpobi re ma yere Ọghẹnẹ fiki rai. Onana u kiehọ, keme ẹrọwọ rai o bi dhe ẹgẹga, yọ uyoyou nọ whai kpobi wha wo kẹ ohwohwo u bi dhe ẹgẹga.  Fikiere ma be rọ owhai seha evaọ udevie ikoko Ọghẹnẹ fiki ithihakọ gbe ẹrọwọ nọ wha wo evaọ udevie ikpokpoma rai kpobi gbe iye nọ wha be ruẹ.*  Onana yọ imuẹro ẹdhoguo okiẹrẹe Ọghẹnẹ, onọ u ru nọ a ro rri owhai nọ wha te kẹ Uvie Ọghẹnẹ, onọ wha be rọ fiki riẹ ruẹ uye na.  Evaọ uzẹme, u kiehọ re Ọghẹnẹ ọ rehọ uye hwosa kẹ enọ e be wha uye se owhai.  Rekọ whai nọ e be ruẹ uye na, a te kẹ owhai ufuoma kugbe omai evaọ okenọ Olori na Jesu ọ te romavia no odhiwu ze avọ ikọ-odhiwu egaga riẹ evaọ ebrerae,  nọ ọ te rehọ uye kẹ enọ e riẹ Ọghẹnẹ hẹ gbe enọ i bi yoẹme kẹ usi uwoma kpahe Olori mai Jesu hu.  Ahwo nana a te ruẹ uye obrukpe ọrọ ọraha ebẹdẹ bẹdẹ, a vẹ te rọ ere no aro Olori na je no ogaga ulogbo riẹ. 10  Onana o te via okenọ ọ te nyaze re o wo oruaro kugbe erezi riẹ, yọ evaọ ẹdẹ yena oma o te were ahwo kpobi nọ a fi ẹrọwọ họ iẹe. Nọ orọnọ wha rọwo isẹri nọ ma se na, wha te jọ usu rai. 11  Fiki onana ma be hae lẹ roro owhai ẹsikpobi inọ Ọghẹnẹ mai o rri owhai nọ wha te kẹ use riẹ jẹ rehọ ogaga riẹ ru eware iwoma kpobi nọ ọ gwọlọ ru je fiobọhọ kẹ owhai ru iruo ẹrọwọ rai te urere. 12  Ẹjiroro onana họ re oruaro u te odẹ Olori mai Jesu ẹkwoma rai, re wha je wo oruaro fiki usu nọ wha rrọ kugbei, wọhọ epaọ uwowou ulogbo Ọghẹnẹ mai gbe ọrọ Olori na Jesu Kristi.

Eme-Obotọ

Nọ a re je se Saelas.
Hayo “nọ wha bi thihakọ rai.”