Kpohọ eme nọ e riẹ eva

Kpohọ oria izoẹme

2 Ahwo Kọrint 13:1-14

  • Unuovẹvẹ urere gbe uduotahawọ (1-14)

    • “Wha hae dawo sọ wha gbẹ rrọ ẹrọwọ na” (5)

    • Wha kpọ iroro rai vi; wha wo iroro evo (11)

13  Onana họ orọ avọ esa nọ mẹ be rọ wọ nọ mẹ rẹ nya bru owhai ze. “Evaọ unu isẹri ivẹ hayo esa a rẹ jọ vuhu uzẹme ẹme kpobi.”  Dede nọ mẹ rrọ kugbe owhai obọnana ha, o wọhọ ẹsenọ mẹ rrọ kugbe owhai orọ avọ isiava, yọ mẹ be kẹ enọ e raha uzi vẹre na gbe otu nọ i kiọkọ kpobi unuovẹvẹ kpahotọ inọ, mẹ tẹ sae wariẹ nyaze, mẹ te lọhọ obọ kẹ ae he,  nọ orọnọ wha be gwọlọ imuẹro nọ i re dhesẹ nọ Kristi ọnọ ọ rrọ ọyẹlẹ kẹ owhai hi rekọ ọgba evaọ udevie rai ọye ọ be ginẹ rọ omẹ ta ẹme na.  Uzẹme, a kare riẹ fihọ ure kpe evaọ okenọ ọ ga ha, rekọ ọ rrọ uzuazọ fiki ogaga Ọghẹnẹ. Obọnana ma ga ha wọhọ epanọ ọ jọ, rekọ ma ti lele iei rria fiki ogaga Ọghẹnẹ nọ o rrọ oma rai ru iruo.  Wha hae dawo sọ wha gbẹ rrọ ẹrọwọ na; wha hai dhesẹ oghẹrẹ ohwo nọ wha rrọ via. Hayo kọ wha gbẹ riẹ nọ Jesu Kristi ọ rrọ usu kugbe owhai? Ajokpanọ wha gbe wo ọjẹrehọ Ọghẹnẹ hẹ.  Me bi rẹro nọ wha ti vuhumu nọ Ọghẹnẹ ọ jẹ omai rehọ.  Ma be lẹ se Ọghẹnẹ inọ jọ wha ru oware ovo thọ họ, orọnikọ re amọfa a rri omai nọ a jẹ omai rehọ no ho rekọ re wha sai ru oware uwoma, o tẹ make rọnọ amọfa a jẹ omai rehọ họ.  Keme ma sai ru oware ovo wọso uzẹme na ha, rekọ rọkẹ uzẹme na.  Ma rẹ ghọghọ oke kpobi nọ ma ga ha rekọ nọ wha tẹ rrọ gaga. Yọ ma be lẹ inọ wha te kpọ iroro rai vi. 10  Oyejabọ nọ me bi ro kere eware nana se owhai nọ mẹ rrọ kugbe owhai hi na, re nọ mẹ tẹ nyaze, me gbe ru owhai gaga ha evaọ eroruiruo udu nọ Olori na ọ kẹ omẹ nọ mẹ rẹ rọ bọ owhai ga orọnikọ re me ro whrehe owhai hi. 11  Ukuhọ riẹ, inievo, wha hae ghọghọ, wha hae kpọ iroro rai vi, wha hai wo omosasọ, wha hai wo iroro evo, wha hae rria dhedhẹ; Ọghẹnẹ uyoyou gbe ọrọ udhedhẹ ọ te jọ kugbe owhai. 12  Wha rọ ẹviọlọ ọrẹri yere ohwohwo. 13  Erezi na kpobi a vi uyere rai se owhai. 14  Jọ Olori na Jesu Kristi o dhesẹ uwowou ulogbo riẹ kẹ owhai kpobi, jọ Ọghẹnẹ o dhesẹ uyoyou kẹ owhai kpobi, jẹ kẹ owhai kpobi ẹzi ọfuafo na nọ wha bi wo erere no ze kugbe na.

Eme-Obotọ