Kpohọ eme nọ e riẹ eva

Kpohọ oria izoẹme

1 Jọn 5:1-21

  • Ẹrọwọ nọ ma re fihọ Jesu o re fi akpọ na kparobọ (1-12)

    • Oware nọ u re dhesẹ nọ ohwo o you Ọghẹnẹ (3)

  • Imuẹro inọ Ọghẹnẹ o re yo olẹ (13-17)

  • Yọroma evaọ akpọ omuomu nana (18-21)

    • Akpọ na soso ọ rrọ otọ ogaga omuomu na (19)

5  Ohwo kpobi nọ ọ rọwo nọ Jesu họ Kristi na yọ ọmọ Ọghẹnẹ, yọ ohwo kpobi nọ o you Ọghẹnẹ o re you emọ Ọghẹnẹ.  Ẹkwoma onana ma rẹ rọ riẹ nọ ma you emọ Ọghẹnẹ, nọ ma te you Ọghẹnẹ je bi koko ijaje riẹ.  Keme enẹ ma re ro dhesẹ nọ ma you Ọghẹnẹ, ma re koko ijaje riẹ; yọ ijaje riẹ e rrọ owha ogbẹgbẹdẹ hẹ,  keme ohwo kpobi nọ ọ rrọ ọmọ Ọghẹnẹ* o re fi akpọ na kparobọ. Yọ oware nọ ma ro fi akpọ na kparobọ no họ, ẹrọwọ mai.  Ono ọ rẹ sai fi akpọ na kparobọ? Kọ ogbẹrọnọ ọnọ o wo ẹrọwọ inọ Jesu họ Ọmọ Ọghẹnẹ?  Ọnana họ ọnọ ọ nyaze ẹkwoma ame gbe azẹ, ọye họ Jesu Kristi, orọnọ avọ ame ọvo ho, rekọ avọ ame gbe azẹ. Yọ ẹzi na o bi se isẹri, keme ẹzi na o bi dhesẹ uzẹme na via.  Keme isisẹri esa e riẹ:  ẹzi na gbe ame na gbe azẹ na; yọ isẹri eware esa nana e rọwokugbe.  Otẹrọnọ ma rẹ rọwo isẹri ahwo, isẹri nọ Ọghẹnẹ o se oye o mae rro. Keme onana họ isẹri nọ Ọghẹnẹ o se, isẹri nọ o se kpahe Ọmọ riẹ. 10  Ohwo nọ o fi ẹrọwọ họ Ọmọ Ọghẹnẹ ọ jọ eva riẹ rọwo isẹri na. Ohwo nọ o fi ẹrọwọ họ Ọghẹnẹ hẹ o ru Ọghẹnẹ họ ọtọrue, keme o fi ẹrọwọ họ isẹri nọ Ọghẹnẹ o se kpahe Ọmọ riẹ hẹ. 11  Yọ onana họ isẹri na, inọ Ọghẹnẹ ọ kẹ omai uzuazọ ebẹdẹ bẹdẹ, yọ ẹkwoma Ọmọ riẹ ma re ro wo uzuazọ nana. 12  Ohwo nọ ọ jẹ Ọmọ na rehọ o re wo uzuazọ nana; ohwo nọ ọ jẹ Ọmọ Ọghẹnẹ rehọ họ o re wo uzuazọ nana ha. 13  Me bi kere eware nana se owhai re wha riẹ nọ wha wo uzuazọ ebẹdẹ bẹdẹ, whai nọ i fi ẹrọwọ họ odẹ Ọmọ Ọghẹnẹ. 14  Ma wo imuẹro nana kpahe Ọghẹnẹ inọ, ọ rẹ gaviezọ kẹ omai evaọ oware kpobi nọ ma be yare nọ o rọwokugbe oreva riẹ. 15  Nọ ma riẹ nọ ọ rẹ gaviezọ kẹ omai evaọ oware kpobi nọ ma be yare iẹe na, ma riẹ nọ ma re wo eware nọ ma yare tobọ nọ orọnọ ma yare rai mi ei na. 16  Ohwo jọ ọ tẹ ruẹ oniọvo riẹ nọ ọ be raha uzi nọ a rẹ jọ reabe uwhu hu, ọ rẹ lẹ fiki riẹ, Ọghẹnẹ ọ vẹ te kẹe uzuazọ, ẹhẹ, onana u kiekpahe enọ e be raha uzi nọ a rẹ jọ reabe uwhu hu. Uzioraha jọ o riẹ nọ a rẹ jọ reabe uwhu. Orọnikọ oghẹrẹ uzioraha yena mẹ be ta kẹe nọ ọ rọ fiki riẹ lẹ na ha. 17  Oware uyoma kpobi nọ ohwo o ru yọ uzioraha, rekọ uzioraha jọ o riẹ nọ a rẹ jọ reabe uwhu hu. 18  Ma riẹ nọ ohwo kpobi nọ ọ rrọ ọmọ Ọghẹnẹ ọ rẹ ruabọhọ uzioraha ha, rekọ ọnọ o no obọ Ọghẹnẹ ze* na ọ rẹ sẹro riẹ, yọ omuomu na ọ rẹ sai kru rie he. 19  Ma riẹ nọ abọ Ọghẹnẹ ma rrọ, rekọ akpọ na soso ọ rrọ otọ ogaga omuomu na. 20  Ma riẹ nọ Ọmọ Ọghẹnẹ ọ nyaze, yọ ọ kẹ omai otoriẹ re ma sai wo eriariẹ Ọghẹnẹ uzẹme na. Yọ ma rrọ usu kugbe Ọghẹnẹ uzẹme na ẹkwoma Ọmọ riẹ Jesu Kristi. Ọye họ Ọghẹnẹ uzẹme na gbe ọnọ ọ rẹ kẹ uzuazọ ebẹdẹ bẹdẹ. 21  Emọ esese, wha kẹnoma kẹ emedhọ.

Eme-Obotọ

Evaọ Griki, “oware kpobi nọ o no obọ Ọghẹnẹ ze.”
Koyehọ, Jesu Kristi, Ọmọ Ọghẹnẹ.