Kpohọ eme nọ e riẹ eva

Kpohọ oria izoẹme

1 Ahwo Tẹsalonika 3:1-13

  • Pọl ọ jẹ hẹrẹ evaọ Athẹns (1-5)

  • Timoti ọ wha emamọ iyẹrẹ ze (6-10)

  • Ọ lẹ kẹ inievo Tẹsalonika (11-13)

3  Fikiere nọ ma gbẹ jẹ sai thihakọ riẹ hẹ, ma tẹ jiroro nọ o mai woma re mai ọvo ma gbẹ jọ Athẹns;  ma te vi Timoti bru owhai ze, oniọvo mai gbe ọgbodibo* Ọghẹnẹ evaọ iruo usi uwoma kpahe Kristi, re ọ bọ owhai ga jẹ sasa owhai oma evaọ ẹrọwọ rai,  re ikpokpoma nana i gbe ru ohwo ọvo whrehe he. Keme whai omarai wha riẹ nọ ma rẹ siọ uye eware nana ba ẹruẹ hẹ.  Keme nọ ma jọ kugbe owhai, ma vuẹ owhai kpahotọ nọ ma te ruẹ uye ukpokpoma, yọ oye o via no na wọhọ epanọ wha riẹ.  Oyejabọ nọ, okenọ mẹ gbẹ jẹ sai thihakọ riẹ hẹ, me ro vi ohwo ze re mẹ riẹ epanọ wha bi kru ẹrọwọ rai te, keme o sae jọnọ Ọdawo-Ahwo na ọ dawo owhai no, yọ ẹsejọhọ iruo mai i zihe ruọ uvrẹvru no.  Rekọ Timoti nọ ọ nwani no oborai ze na ọ vuẹ omai emamọ usi kpahe ẹrọwọ gbe uyoyou rai no, inọ wha be hae kareghẹhọ omai avọ evawere ẹsikpobi, gbe nọ u bi si owhai urru re wha ruẹ omai wọhọ epanọ u bi si omai urru re ma ruẹ owhai re na.  Fikiere inievo, evaọ ebẹbẹ gbe ukpokpoma mai kpobi, ma bi wo omosasọ fiki rai gbe ẹrọwọ nọ wha bi dhesẹ.  Keme o rẹ kẹ omai ẹgba otẹrọnọ wha dikihẹ ga evaọ Olori na.  Ma be sae ruẹ unu yere Ọghẹnẹ fiki rai hi rọkẹ oghọghọ ulogbo nọ ma be jọ aro Ọghẹnẹ wo fiki rai. 10  Ma be lẹ gaga taso tuvo re ma sae ruẹ owhai je fiobọhọ kẹ owhai evaọ oria nọ ẹrọwọ rai ọ jọ ga tere he. 11  Jọ Ọghẹnẹ Ọsẹ mai gbe Olori mai Jesu ọ gbẹ edhere kẹ omai re ma sae nya bru owhai ze. 12  U te no ere no, jọ Olori na o ru owhai vihọ, ẹhẹ, re wha vọ avọ uyoyou kẹ ohwohwo jẹ rọkẹ ahwo kpobi, wọhọ epanọ ma you owhai na, 13  re ọ ruẹsi ru udu rai ga, kare afuẹwẹ jẹ jọ ọrẹri evaọ aro Ọghẹnẹ Ọsẹ mai evaọ oke ọzino* Olori mai Jesu gbe erezi riẹ kpobi.

Eme-Obotọ

Hayo o sae jọ nọ, “ibe oruiruo.”
Rri oria Otofa Eme.