“Erae! Erae!” Ere aye jọ nọ a re se Sandra nọ ọ jẹ re emu evaọ obọ uwou ọsọrọo riẹ o bo nọ ọ ruẹ erae nọ e be to evaọ uwou jọ nọ ọ kẹle uwou nọ ọ rrọ na. Tei te ọzae riẹ nọ a re se Thomas a tẹ dhẹ ruọ otafe be gwọlọ epanọ a re ro furie erae na. Nọ Sandra ọ be dhẹ nyae wọ oware nọ a re ro furie erae na, ọzae riẹ ọ tẹ họrọ nyai rri oware nọ o be to evaọ uwou na. Sandra ọ tẹ rehọ oware nọ a re ro furie erae na kẹ ọzae riẹ vẹrẹ vẹrẹ, kẹsena ọzae riẹ o te furie erae na. Sandra ọ ta nọ: “Ma gbẹ hae jowọ kpata kpata ha, uwou na kpobi o hae te to muẹkpẹ.”

Ẹvẹ Thomas avọ Sandra a sai ro furie erae na ababọ ozọ nọ u mu rai? Aimava na a rrọ usu ahwo nọ i bu te odu ọvo (1,000) nọ i bi ru iruo evaọ uwou ogha Isẹri Jihova nọ o rrọ obọ Selters evaọ Germany. A wuhrẹ i rai epanọ a re ro furie erae nọ erae i te muhọ ẹto idudhe.

Uwou ogha nọ o rrọ Selters o rro te oware wọhọ ogege ebọro-efa 30. Orọnikọ ifisi gbe iwou nọ a rẹ rria ọvo e rrọ uwou ogha na ha, rekọ eria efa nọ e rẹ sae kake wha erae ze wọhọ eria nọ a rẹ jọ fọrọ eware, eria nọ a rẹ jọ printi ebe, gbe eria sa-sa nọ a rẹ jọ ruẹrẹ ijini gbe imoto e riẹ re. Fikiere evaọ uwou ogha na, u wo ẹko-iruo ahwo jọ nọ a re furie erae nọ a ro mu nọ a re se Safety and Environment Department. Owha iruo ẹko-iruo nana họ, re a wuhrẹ ahwo epanọ a sai ro furie erae ababọ omonwa. Orọ ọsosuọ, ẹko-iruo ahwo nọ a re furie erae evaọ ẹwho na o rẹ kaki wuhrẹ utu ahwo jọ nọ a rẹ dhogbo nọ a re se Emergency Response Team. Orọ avivẹ, a ve wuhrẹ ahwo nọ a bi ru iruo evaọ uwou ogha na epanọ a re ro ru eware nọ e rrọ obotọ na noke toke:

• Epanọ a rẹ rọ dhẹ ruọ otafe vẹrẹ nọ uwou o tẹ be to.

• Oware nọ a re ru nọ erae e tẹ be to re a sae whaha omonwa.

• Epanọ a sai ro furie erae nọ i te muhọ obọ.

Fikiere a re wuhrẹ ahwo nọ a bi ruiruo evaọ uwou ogha na kpobi re a riẹ oware nọ a re ru nọ erae i te muhọ ẹto idudhe.

A re wuhrẹ ae epanọ a re ro furie erae ababọ omonwa. Evaọ okenọ Christin ọ gbẹ maha a ro wuhrẹ iẹe epanọ a re ro furie erae evaọ obọ isukulu. Ọ ta kpahe eware nọ a wuhrẹ i rie evaọ obọ uwou ogha na inọ: “Mẹ wọ oware nọ a re ro furie erae na, rovie iei, je kiuke ku ofẹ nọ ofou o bi fou no ze. Me gbe kiuke ku ofou na ha, ofou na ọ hai ti fou erae fihọ omẹ oma. Mẹ ọvo me te furie erae na. Me te je wuhrẹ epanọ mẹ avọ ahwo nọ a bu te imane hayo imasoi ma sai ro kuomagbe furie erae.”

Daniel nọ o re wuhrẹ ahwo epanọ a sai ro furie erae evaọ uwou ogha na ọ ta nọ, “Ewuhrẹ na o re si ozọ no ohwo ẹro. Nọ erae i te muhọ ẹware idudhe, ahwo a re reghe no. Ozọ u re mu ahwo buobu, yọ a be ta nọ, ‘Kọ eme ma ti ru na? Kọ ẹvẹ ma te sae rọ rehọ oware nọ a re ro furie erae na ru iruo?’ Rekọ otẹrọnọ a riẹ oware nọ a re ru, a sai furie erae esese lọlọhọ taure erae na e tẹ te to ruọ uwou soso.” Ọ ta haro nọ, “Ma rẹ daoma ruẹ nọ ahwo nọ ma bi wuhrẹ na a riẹ epanọ a re kru oware nọ a re ro furie erae na ziezi jẹ rehọ iẹe furie erae. U re ru nọ a re ro wo udu jẹ jowọ kpata kpata nọ erae i te muhọ ẹto idudhe.”

Ahwo buobu a ta epanọ ewuhrẹ na o were rai te. Christin nọ ma fodẹ ẹsiẹe na ọ ta nọ: “Onana họ orọ ọsosuọ nọ me ro kru oware nọ a re ro furie erae. Me roro nọ u fo re a wuhrẹ ohwo kpobi epanọ a re ro furie erae.” Nadja nọ o re ru iruo ubroke evaọ uwou ogha na je bi ru iruo evaọ oria nọ irupre e rẹ kpahe ọ ta nọ: “Anwọ ikpe 10 nọ e vrẹ na, evaọ obe ọvo a re jo wuhrẹ omai epanọ a re ro furie erae evaọ oria nọ irupre e rẹ kpahe nọ mẹ be jọ ru iruo na. Rekọ a jọ obọ uwou ogha na wuhrẹ omẹ epanọ a sai ro gine furie erae dẹẹ, fikiere o lẹliẹ omẹ wo udu no enẹna. Erae i te muhọ ẹto obọnana, mẹ riẹ oware nọ me re ru.”

Sandra o roro nọ oware nọ u ru nọ ọ sae rọ jowọ kpata kpata evaọ obọ uwou ọsọrọo riẹ na họ, fiki oware nọ a wuhrẹ i rie evaọ obọ uwou ogha na. Ọ ta nọ, “Enẹna ozọ u gbe bi mu omẹ tere he re mẹ rehọ oware nọ a re ro furie erae na ro furie erae. U fo re a hai wuhrẹ ohwo kukpe kukpe. Ewuhrẹ na u gine fiobọhọ kẹ omẹ.”

Noke toke, ẹko-iruo ahwo nọ a re furie erae evaọ ẹwho Selters a rẹ nyaze obọ uwou ogha na ti wuhrẹ ahwo nọ a bi ruiruo evaọ etẹe epanọ a re ro furie erae. Ohwo nọ o wuzou ẹko-iruo na nọ a re se Theo Neckermann ọ ta nọ: “Ẹko-iruo mai oye o rẹ rẹrote ẹwho Selters. Mai họ ahwo nọ a rẹ dhogbo nyai furie erae evaọ iwou nọ e rrọ okegbe na. U woma gaga inọ uwou ogha na o rrọ ẹwho mai keme ọ rrọ ruaro, iwou ilogbo e rrọ eva riẹ, yọ eware nọ a be jọ eva riẹ ru e rrọ buobu. O gwọlọ nọ ma re wuhrẹ ahwo buobu re a riẹ epanọ a re ro furie erae nọ erae i te muhọ ẹto idudhe. Fikiere eva e rẹ were omai re ma wuhrẹ ahwo epanọ a re ro furie erae evaọ ogba uwou ogha na.”

Ahwo nọ a rrọ utu ogbodhẹ uwou ogha na nọ a re se Emergency Response Team a bu vi 100. Ahwo nana a rẹ kaki lele ẹko-iruo ahwo nọ a re furie erae evaọ ẹwho na wuhrẹ epanọ a sai ro siwi ahwo nọ erae i kohọ uwou gbe epanọ a sai ro furie erae na. Neckermann ọ ta nọ: “Utu ahwo rai nọ e rẹ dhogbo nọ a re se Emergency Response Team na o were omai gaga. Ababọ obufihọ rai, eware nọ ma bi ru kpobi na e hae te riẹ nya enẹ hẹ.”

Evaọ owọwọ ẹdẹjọ, ọrọ amara Ava 2014, ẹko-iruo ahwo nọ a re furie erae evaọ ẹwho na gbe utu ogbodhẹ uwou ogha na a dhesẹ nọ a gine ruẹrẹ oma kpahe ziezi. Iwiri i kuye vọ oria kpobi evaọ uwou ologbo jọ nọ a be rria evaọ uwou ogha na. Daniel nọ ma fodẹ ẹsiẹ na ọ ta nọ: “Iwiri na e ga te epanọ whọ gbẹ sae rọ ruẹ obọ ra ha nọ whọ tẹ make kpare iẹe kpehru dede. Ababọ oke oraha ma te bo se ahwo nọ a re furie erae evaọ ẹwho na. Ma te je ru re ahwo nọ a rrọ ibruwou nọ i bu te udhone gbe eree a dhẹ ruọ otafe. Taure ahwo ẹko-iruo nọ a re furie erae a tẹ te dhẹ ze, yọ ahwo nọ a jọ evaọ uwou na kpobi a dhẹ ruọ otafe no.” Neckermann ọ ta nọ: “O lọhọ họ re ahwo a sae ruọ otafe vẹrẹ tenẹ evaọ uwou ologbo otiọna evaọ ẹwho Frankfurt. Ahwo rai na a ru lele ekpọvio nọ a kẹ rai yọ utu ogbodhẹ rai nọ a re se Emergency Response Team na a daoma gaga!” Ahwo nọ a re furie erae na a tẹ nyai si oware nọ o bi kuye iwiri na no. Ohwo ọvo ọ nwoma ha yọ emamọ oware ọvo o raha gbe he.

Ahwo nọ a rrọ uwou ogha nọ o rrọ Selters na a gwọlọ nọ erae e rẹ to te epanọ a rẹ rọ dhogbo ho. Rekọ e tẹ make to te ere, a ruẹrẹ oma kpahe no keme a wuhrẹ epanọ a re ro furie erae no.