Ahwo buobu nọ e kpako no a rrọ orẹwho Australia wọhọ epanọ o rrọ evaọ erẹwho efa. Ejọ rai e rẹ kwa kpohọ iwou nọ a rẹ jọ rẹrote ahwo nọ a kpako no re a jọ etẹe rẹrote ai.

U te no omarai nọ a rẹ rẹrote no, ahwo nọ a kpako no a wo ẹgwọlọ ọfa re. Ẹsejọ, fikinọ a bi ru oware ovo ho, ẹkeria na o rẹ bẹ ae no, a rẹ jọ goli jẹ jọ ọkọkora. Koka koka, Isẹri Jihova a re weze kpohọ iwou ivẹ jọ nọ a rẹ jọ rẹrote enọ e kpako no evaọ ẹwho Portland, nọ o rrọ ubrotọ Victoria evaọ Australia. Iweze nana i re fiobọhọ kẹ enọ e kpako no na wo ẹruore jẹ lẹliẹ oma sasa ae.

A be rọ Ebaibol Fiobọhọ kẹ Ahwo nọ E Be Rria Iwou nọ A rẹ jọ Rẹrote Enọ Ekpako No

Isẹri Jihova nọ e be rria okegbe yena a re kpohọ eria nọ a rẹ jọ rẹrote enọ e kpako no re a gbiku Ebaibol kẹ ai, wọhọ iku eware nọ e via evaọ uzuazọ Jesu. Osẹri Jihova jọ nọ a re se Jason ọ ta nọ: “Ma re se Ebaibol na kẹ ahwo nọ e kpako no na, je lele ae ta kpahe oware nọ a wuhrẹ no iku na ze.” Nọ orọnọ ekpako na buobu a be mọ eyao sa-sa na, ma rẹ rọ Ebaibol na tuduhọ ae awọ jẹ vuẹ ae kpahe eyaa nọ Ọghẹnẹ ọ ya inọ o ti si ẹyao gbe uwhu no otọ no.

Osẹri Jihova jọ nọ a re se Tony ọ ta nọ: “Nọ ma kaki muhọ, ma jẹ hae lele ai ta ẹme te iminiti 30, rekọ uwhremu na ekpako na a tẹ gwọlọ nọ o re kri vrẹ ere. Fikiere enẹna auwa ọvo ma bi ro lele ae ta ẹme, rekọ omọvo jọ evaọ usu rai ọ gwọlọ nọ ma kri te euwa ivẹ!” Ekpako na jọ i tuaro, yọ efa a be sae kpama hayo kru oware ovo ho, fikiere Isẹri Jihova na a re fiobọhọ kẹ ae evaọ etoke ẹmeọta na kpobi jẹ tuduhọ ae awọ re a kpahe fihọ ewuhrẹ na nọ o tẹ lọhọ.

Oke kpobi nọ a weze nya, Isẹri na a rẹ so ole ọvo hayo ivẹ jọ nọ a re ro jiri Ọghẹnẹ kugbe ekpako na, yọ ekpako na a rẹ gwọlọ nọ a rẹ so bu vrẹ ere dede. Ọkpako jọ nọ a re se John  * nọ ọ be rria etẹe ọ ta nọ: “Ile nọ wha re lele omai so na e rẹ were omai gaga. I re fiobọhọ kẹ omai riẹ oghẹrẹ ohwo nọ Ọghẹnẹ ọ rrọ je wo adhẹẹ odidi kẹe.” Ọkpako jọ nọ a re se Judith nọ ọ be rria etẹe nọ o tuaro ọ riẹ eme ile nọ e mae were iẹe kpobi fihọ uzou.

Isẹri na a gwọlọ nọ a re fiobọhọ kẹ ekpako na kpobi. Osẹri Jihova jọ nọ a re se Brian ọ ta nọ ekpako na jọ e tẹ be mọ, Isẹri Jihova na a re weze kpohọ ubruwou nọ a rrọ na. Brian ọ ta nọ: “Ma re lele ai gbiku, ta emiehwẹ jẹ nọ ae epanọ oma rai o rrọ. Ẹsejọ nọ ma te zihe nya ẹdẹfa, ma rẹ ruẹ nọ omarai o sasa no.”

“Ọghẹnẹ O Vi Owhai Bru Omai ze Na”

Eva e rẹ were ekpako na jọ buobu fiki iweze Isẹri Jihova na. Ọzae jọ nọ a re se Peter nọ o re kuomagbe ẹkeria na koka koka ọ ta nọ: “Oma o rẹ kpakpa omẹ re mẹ nya.” Judith ọ rẹ ta kẹ ahwo nọ a be rẹrotei evaọ uwou ekpako na inọ: “Nẹnẹ na Edesa-Oka, ivie wha ruẹrẹ omẹ kpahe re me kuomagbe uwuhrẹ Ebaibol na. Mẹ gwọlọ nya leti hi!”

Eware nọ a bi wuhrẹ ekpako na e be hae were ae gaga, yọ a roro nọ enẹna a mae kẹle Ọghẹnẹ. Nọ a wuhrẹ ọzae jọ nọ a re se Robert kpahe iwuhrẹ Jesu jọ no, ọ tẹ ta nọ: “Me ri wo otoriẹ oria Ebaibol nana vẹre he, rekọ enẹna me wo otoriẹ riẹ vevẹ no.” Ọzae jọ nọ a re se David o wuhrẹ epanọ olẹ u wuzou te. Ọ ta nọ: “Olẹ u fiobọhọ kẹ omẹ mu usu kugbe Ọghẹnẹ, je ru nọ mẹ rọ riẹ nọ Ọghẹnẹ ọ ginẹ rrọ.”

Eva e rẹ were enọ e kpako no na re a jọ Ebaibol na wuhrẹ kpahe ẹruore nọ Ọghẹnẹ ọ kẹ omai kpahe obaro na. Aye jọ nọ ọ kpako no nọ a re se Lynette ọ ta kẹ Isẹri Jihova nọ: “Me yere owhai nọ wha be rọ rehọ Ebaibol na sasa omai oma.” Ọkpako ọfa jọ ọ ta nọ: “Ọghẹnẹ o vi owhai bru omai ze na!”

Fiki epanọ iweze Isẹri Jihova na e were ọkpọkuaye jọ nọ a re se Margaret te, ọ be hai kpohọ iwuhrẹ Isẹri Jihova evaọ obọ Ọgwa Uvie rai koka koka. Onana o gwọlọ omodawọ gaga keme oma riẹ o ga tere he. Ọ ta kẹ Isẹri Jihova nọ: “Eware nọ wha bi wuhrẹ omai na e be kẹ omai ẹruore.”

‘Emamọ Oware Wha bi Ru Na’

Iweze Isẹri Jihova na e be were ahwo nọ a bi ru iruo evaọ iwou nọ a be jọ rẹrote ekpako na gaga re. Osẹri Jihova jọ nọ a re se Anna ọ ta nọ: “Ahwo nọ a bi ru iruo evaọ uwou ẹruorote ekpako na a rẹ tuduhọ ekpako na awọ re a kuomagbe iwuhrẹ Ebaibol na keme a muẹrohọ nọ eva e rẹ were ae gaga nọ a te wuhrẹ no.” Brian nọ ma fodẹ ẹsiẹ na ọ ta nọ: “Ahwo nọ a bi ru iruo evaọ iwou ẹruorote ekpako na a rrọ wowou gaga. A rẹ daoma fiobọhọ kẹ omai.”

Eva e be were ahwo uviuwou ekpako nọ e rrọ iwou ẹruorote na gaga inọ esẹgbini rai nọ e kpako no a bi wuhrẹ Ebaibol na. Ọmọtẹ aye jọ nọ ọ kpako no o jiri Isẹri Jihova gaga. Ọ ta nọ: “Emamọ oware wha bi ru kẹ oni mẹ na.”

^ edhe-ẹme 7 A nwene edẹ ahwo nọ e be rria iwou nọ a rẹ jọ rẹrote ahwo nọ a kpako no na.