Evaọ Asoi 6, 2017, Isẹri Jihova nọ i bu te oware wọhọ udhozeza gbikpe (130) a fiobọhọ ru owhawho Bryukhovychi fo, onọ o kẹle Lviv evaọ Ukraine. Ahwo nọ a fialoma via ru iruo na a jọ unuikpe sa-sa, no umuo ikpe 22 rite 80. Aikpobi a be rria je ru iruo evaọ uwou ogha Isẹri Jihova nọ o rrọ Ukraine nọ o kẹle owhawho na. Oria nọ a ru fo na o rro te oware wọhọ ogege ebọro-efa 50. Evaọ euwa esa ọvo, a kwa ezuzu nọ e gbẹdẹ te ekpa isimeti ikpegbivẹ noi ze.

Ọzae jọ nọ a re se Mykhailo Splavinskyi nọ o wuzou gaga evaọ Lviv Forest Breeding and Drilling Center, ọ ta nọ: “Isẹri Jihova họ ahwo ọsosuọ nọ a bi fiobọhọ evaọ iruo orufuọ nọ a rẹ jọ owhawho na ru kukpe kukpe na, yọ anwọ ukpe 2014 ze a bi ro fiobọhọ evaọ orufuọ na.”

Oware nọ U je Fo re A Ru Owhawho na Fo

Splavinskyi ọ ta nọ, “Ẹkwoma idhere ivẹ a bi ro ku ezuzu fihọ owhawho na. Orọ ọsosuọ, ahwo nọ a ziọ ugheriwo evaọ etẹe a rẹ nyasiọ ezuzu eware nọ a wha lele oma bae. Orọ avivẹ, ekọmpene buobu a bi ku eware nọ a ro ru iruo ebabọ no gbe eware ezuzu efa sa-sa fihọ etẹe re.”

Ezuzu nọ a re ku fihọ owhawho o rẹ raha iẹe. Splavinskyi ọ ta nọ, “O rẹ rehọ oke krẹkri re ezuzu o te ti gbo zihe ruọ ẹkpẹ.” Kẹsena eware nọ i gbo no na e vẹ te “nua ame nọ ọ rrọ otọ na jẹ wha ebẹbẹ efa ze.” Ilolo gbe ewẹ ighẹgbe nọ a gbolo fihọ owhawho e rẹ sae lẹliẹ otọ na rrorro ga jẹ wha erae ze. Ofariẹ, ewẹ ilolo gbe iduwo nọ a re gbolo fihọ eria itieye na e rẹ wha enwoma se ahwo maero kọ emaha na. Ọzae na ọ ta nọ: “Eware nana kpobi e rẹ via ha otẹrọnọ a whẹ ezuzu no owhawho na.”

O rrọ bẹbẹ re a whẹ ezuzu no owhawho nọ o kẹre te oware wọhọ ogege ebọro-efa idu esa gbe egba esa (3,300) soso. Ọzae na ọ ta nọ: “Imasoi ọvo ma wo nọ e rẹ rẹrote owhawho evaọ ubrotọ mai na, fikiere o rrọ bẹbẹ re ma sai ru oria ulogbo utioye na fo. Oyejabọ nọ ma rẹ rọ vuẹ ahwo ẹsiẹvo evaọ ẹgbukpe re a kuobọgbe omai ru owhawho na fo.”

Epanọ A be rọ Whẹ, Hẹriẹ, je Ku Ezuzu na Kufiẹ

Isẹri Jihova na a rehọ eware iruo sa-sa ro ru iruo na wọhọ, eware nọ a re ku họ abọ, ekpa irọba, gbe ireki. A kwa ilolo, etaya imoto, ighẹgbe, eyọno, ebe, irọba gbe iduwo. Ọzae jọ nọ ọ rẹ rẹrote owhawho evaọ ubrotọ na nọ a re se Ihor Fedak ọ ta nọ: “Oria nọ Isẹri na a jọ ru iruo na o rrọ fuafo gaga.”

Isẹri Jihova na a hẹriẹ ezuzu na fihọ ọvuọ oria riẹ, dede nọ o gbahọ nọ a re ru ere he. A fi ilolo họ abọ rai sa, yọ ere ọvona a ru ebe gbe irọba na re. Onana u re ru ei lọhọ nọ a sae rọ rehọ ae ru eware efa. Nọ a tẹ hẹriẹ ae no, ekọmpene jọ nọ ọ rẹ wọ ezuzu ọ vẹ wọ ezuzu na vrẹ. Anwọ ukpe 2016 ze, Isẹri Jihova a be rọ rehọ igho obọrai hwosa kẹ ekọmpene nọ ọ rẹ wọ ezuzu nọ a be hae kwa kokohọ na. Fedak ọ ta nọ: “Me yere Isẹri Jihova gaga nọ a bi ro fiobọhọ kẹ omai. A be hai fiobọhọ kẹ omai ẹsikpobi.”

“Mẹ Rro Vi Ohwo nọ O re Ru Orufuọ Họ”

O rẹ were Isẹri Jihova gaga re a wobọ evaọ orufuọ ẹsiẹvo ẹgbukpe nọ a rẹ jọ owhawho na ru na. O rẹ were ae re a wobọ evaọ oware nọ o re fiobọhọ kẹ ẹwho na jẹ ruẹ nọ owhawho na o rrọ fuafo. Volker ọ ta oware nọ o rrọ Isẹri Jihova buobu eva. Ọ ta nọ: “Mẹ rro vi ohwo nọ o re ru orufuọ họ. Emamọ oware o rrọ re a fiobọhọ kẹ amọfa, yọ onana o rẹ wha evawere se omẹ.”

Anzhelika ọ ta nọ: “Rọkẹ omẹ, orọnikọ ohwo nọ ọ whẹ ezuzu na fihọ etẹe họ ẹme na ha, rekọ oware nọ o mae roja họ epanọ mẹ rẹ rọ whẹ ezuzu na no etẹe.” Lois nọ ọ kpako te ikpe 78 no ọ jọ usu ahwo nọ a ru orufuọ na. Ọ ta nọ: “Ukpenọ eva e rẹ dha owhẹ kpahe ezuzu nọ a gbolo fihọ otọ, o mai woma re whọ tọlọ iẹe gbolo kufiẹ.”

Wieslaw ọ ta nọ: “Ẹsikpobi ahwo a rẹ ruẹ omai nọ ma gba ota no be nyae ta usi uwoma. O make rrọ ere na, o rẹ were omai re ma ru iruo nọ i re fiobọhọ kẹ ahwo, o tẹ make rọnọ ma re ru owhawho fo hayo ru iruo efa jọ dede.”