Kpohọ eme nọ e riẹ eva

Omosasọ gbe Obufihọ Rọkẹ Ahwo nọ A be Mọ

Omosasọ gbe Obufihọ Rọkẹ Ahwo nọ A be Mọ

Ahwo nọ a be mọ a rẹ ruawa gaga, yọ awaọruọ rai ọ rẹ ga viere nọ a tẹ riẹ nọ a te rehọ ai kpohọ ẹsipito. Fikiere obe-usi jọ nọ a kere kpahe ahwo nọ a riẹ kpahe usiwo-imu ziezi o ta nọ: “Ekiakiẹ i dhesẹ nọ Ẹme Ọghẹnẹ nọ a rẹ rọ sasa ahwo nọ a be mọ oma u re ru oma rai sasa.” *

Fiki onana, Isẹri Jihova a rẹ rehọ Ẹme Ọghẹnẹ sasa ibe Ileleikristi rai nọ e be mọ oma je fiobọhọ kẹ ae evaọ idhere sa-sa. Ekpako ukoko Isẹri Jihova họ ahwo nọ a rẹ kobaro re a weze bru Isẹri Jihova nọ e be mọ. Rekọ eme a re ru otẹrọnọ Osẹri Jihova nọ ọ be mọ ọ rrọ ẹsipito nọ o thabọ gaga no oria nọ ọ be rria? Evaọ ikpewho jọ wariẹ akpọ na soso họ, Isẹri Jihova a ru ọruẹrẹfihọ ọrọ itu ahwo nọ a re se Patient Visitation Groups (PVG) nọ i re weze bru ahwo nọ oma o ga te he. Ekpako ukoko nọ e rọ itu nana a re weze kpohọ ẹsipito re a fiobọhọ kẹ Isẹri Jihova nọ e be mọ gbe ahwo uviuwou rai, te enọ e rrọ ahwo orẹwho na gbe enọ i no erẹwho efa ze. Ekpako ukoko nọ i bu te idu udhegberee (28,000) a rrọ itu PVG nọ i bu te odu ọvo gbe egba izii (1,900) evaọ unuakpọ ezeza. *

Oghẹrẹ vẹ itu ahwo PVG na a be rọ rehọ Ẹme Ọghẹnẹ sasa ahwo oma?

Ọkpako jọ nọ ọ rrọ omọvo utu PVG na nọ a re se William ọ ta nọ: “Edhere jọ nọ mẹ rọ sasa Isẹri Jihova gbe ahwo uviuwou rai nọ e rrọ Isẹri Jihova ha oma no họ, me weze bru rai, lele ae t’ẹme jẹ gaviezọ kẹ ae. Mẹ tuduhọ ae awọ inọ Jihova ọ riẹ ẹbẹbẹ rai, yọ ọ be daezọ rai. O rẹ were ohwo nọ ọ be mọ na gbe ahwo uviuwou riẹ gaga nọ a tẹ riẹ nọ a be hae lẹ roro ae.”

Ahwo buobu a ta epanọ itu PVG na a rọ tuduhọ ae awọ no. Joma ta kpahe eme nọ ahwo jọ evaọ obọ America a ta. Ahwo nọ a rrọ itu PVG evaọ America a bu te enwenọ idu ihrẹ (7,000).

  • Priscilla ọ ta nọ: “Wha kobiruo nọ wha ro weze bru ọsẹ mẹ evaọ obọ ẹsipito nọ okie o kie iei. Iweze rai i duobọte ọsẹ mẹ udu gaga! U gbe rie unu inọ ọruẹrẹfihotọ otiọye na ọ riẹ. Me roro nọ iweze rai na i ru nọ ẹyao ọsẹ mẹ ọ rọ kaki kpo.”

  • Ọmọtẹ jọ nọ a re se Ophilia, nọ oni riẹ o whu, ọ ta kẹ ohwo jọ nọ ọ rrọ utu ahwo PVG na inọ: “Iweze rai i fiobọhọ kẹ oni mẹ gaga! Ọ riẹ nọ Jihova o vi owhai ze. Wha kobiruo gaga nọ wha rọ rẹrote oni mẹ ziezi.”

  • Nọ a vuẹ ohwo jọ nọ ọ be mọ inọ edẹ jọ ọvo i kiọkọ kẹe re o te ti whu, o kẹ riẹ uye gaga te epanọ eva e gbẹ jẹ rọ were iẹe he. James, nọ ọ rrọ omọvo PVG na o weze bru rie jẹ rehọ eme nọ e rrọ Ahwo Filipai 4:6, 7 rọ sasa iẹe oma. James ọ ta nọ: “Nọ mẹ wariẹ weze bru ei evaọ okiokiọ riẹ, me muẹrohọ nọ oghẹrẹ nọ o je ru vẹre u nwene gaga. Ghelọ uyero riẹ na, u mu rie ẹro inọ Jihova o ti fiobọhọ kẹe, yọ ọ tubẹ tuduhọ omẹ awọ dede.”

Oghẹrẹ vẹ itu PVG na a re ro fiobọhọ kẹ ahwo nọ a weze bru?

Pauline, nọ ọzae riẹ o whu evaọ ẹsipito nọ o thabọ no uwou rai, o kere nọ: “Wha kobiruo gaga nọ wha ro fiobọhọ kẹ omai evaọ etoke yena nọ eware e jọ bẹbẹ kẹ uviuwou mai na. Nọ ma yo nọ wha te nyaze obọ ẹsipito evaọ aso yena dede nọ wha ti kpohọ iruo evaọ okiokiọ riẹ, o kẹ omai omosasọ. Wha kobiruo gaga nọ wha rọ ruẹrẹ oria họ kẹ omai ahwo ikpegbọvo soso evaọ uviuwou mai nọ ma rẹ sae kiẹzẹ evaọ aso yena, gbe epanọ wha jẹ rọ daoma rọ ifonu se re wha riẹ epanọ ma rrọ. Me yere Jihova gbe ukoko na gaga rọkẹ ọruẹrẹfihotọ nọ a ru re a ro fiobọhọ kẹ omai wo omosasọ.”

Nicki, Gayle, avọ Robin a wo asidẹnte evaọ oria nọ o rrọ emaele egba ivẹ (200) thabọ no oria nọ a jẹ rria. Nọ oware na o nwane via no, a tẹ rọ ifonu se Carlos nọ ọ rrọ omọvo utu PVG na re o kpobọ ẹsipito nyae hẹrẹ ae, yọ iraro riẹ a ro te ẹsipito na. Carlos ọ ta nọ, “Mẹ ta kẹ ae re a vuẹ omẹ oware kpobi nọ a gwọlọ nọ me ru kẹ ae, kẹsena me te kru ọmọ-arakọ Nicki kẹe re ọ sae nyae ruẹ edọkita.” Curtis nọ ọ rrọ utu PVG na avọ aye riẹ a tẹ jẹ nyaze re. Curtis avọ aye riẹ a jọ kugbe aimasa na euwa buobu bẹsenọ ahwo uviuwou rai a rọ nyaze. Ohwo jọ nọ ọ kpekpe ahwo uviuwou na oma ọ ta nọ: “Obọ nọ a fihọ kẹ aimasa na u ru rai wo omosasọ gaga. Oghẹrẹ nọ utu PVG na a ro fiobọhọ kẹ aimasa na u gbe Robin, oniọvo-ọmọtẹ Nicki unu gaga, ọnọ ọ rrọ Osẹri Jihova ha.”

^ edhe-ẹme 2 A rehọ ẹme nana no obe-usi nọ a re se The Joint Commission Journal on Quality and Patient Safety ze, onọ uzoẹme riẹ ọ ta nọ, “Addressing Patients’ Emotional and Spiritual Needs.” A kere i rie evaọ Akpegbivẹ 2003, Uko avọ 29, Ọrọ avọ  12, ẹwẹ-obe avọ 661.

^ edhe-ẹme 3 Wọhọ ekpako ukoko efa nọ e rrọ ukoko Isẹri Jihova, ekpako nọ e rrọ itu PVG a rẹ sẹro ahwo nọ a rrọ ikoko rai, wuhrẹ ae Ẹme Ọghẹnẹ je lele ai kpohọ usi uwoma. A rẹ hwa ae osa evaọ iruo nọ a bi ru hu, rekọ a be rọ unevaze ru iruo na.—1 Pita 5:2.