Kpohọ eme nọ e riẹ eva

Iticha Evaọ Philippines A Ruẹ Epanọ JW.ORG O Woma Te

Iticha Evaọ Philippines A Ruẹ Epanọ JW.ORG O Woma Te

Evaọ 2016, Isẹri Jihova a wo uvẹ-ọghọ nọ a ro dhesẹ oria itanẹte jw.org kẹ utu iticha jọ evaọ ubrotọ Zamboanga del Norte evaọ orẹwho Philippines. A dhesẹ epanọ ividio gbe izoẹme sa-sa nọ e rrọ jw.org i woma te rọkẹ ae. Isẹri Jihova na a kake nyabru utu ahwo nọ a wuzou isukulu evaọ ubrotọ na, enọ e rrọ okpẹwho esuo orẹwho na nọ a re se Dipolog City. Eware nọ a dhesẹ kẹ ahwo nọ a wuzou isukulu na evaọ jw.org e were rai te epanọ a ro zizie Isẹri Jihova na re a jariẹ evaọ egwae esa nọ a te gba kugbe iticha nọ i no eria sa-sa ze evaọ ubrotọ Zamboanga del Norte. A gwọlọ nọ Isẹri Jihova a dhesẹ eware nọ e rrọ jw.org evaọ iminiti ọgba rọkẹ ae.

Oghẹrẹ vẹ a ro dhesẹ eware na?

Isẹri Jihova na a dhesẹ ividio gbe izoẹme sa-sa nọ e rrọ jw.org kẹ iticha nọ e joma bu te egba esa (300) nọ e jọ egwae esa nọ a gba na. Uzoẹme jọ nọ o were iticha na gaga họ Dealing With Debt.” Ibuobu iticha na a ruẹ nọ orọnikọ emọ-isukulu rai ọvo eware nọ a dhesẹ na i ti fiobọhọ kẹ hẹ, rekọ te ae omarai re. Aikpobi a rehọ omobe-ovẹvẹ nọ uzoẹme riẹ o ta nọ Diẹse Ma Sae Jọ Ruẹ Iyo Enọ nọ I Wuzou Evaọ Uzuazọ? onọ o ta kpahe emamọ evuẹ buobu nọ i re fiobọhọ kẹ ohwo evaọ uzuazọ nọ e rrọ jw.org. Iticha jọ evaọ usu rai a jọ oria itanẹte jw.org na danlodu ividio sa-sa kẹ omarai.

Eware nọ a dhesẹ evaọ egwae esa na e were ahwo nọ a wuzou isukulu na gaga te epanọ a ro ru ọruẹrẹfihotọ re a wariẹ dhesẹ eware na kẹ ekohrẹ isukulu nọ i bu te egba ezeza (600) gbe iticha efa. Evaọ orọ avivẹ nana, eva e were ahwo na kpobi gaga re.

“Oria itanẹte na u bi fiobọhọ kẹ omai gaga”

Uwhremu na, iticha nọ Isẹri Jihova a dhesẹ eware jw.org kẹ na a ta epanọ oria itanẹte na u ro fiobọhọ kẹ ae. Iticha jọ ọ ta nọ: “Ma gwọlọ yere owhai gaga. Oria itanẹte na u bi fiobọhọ kẹ omẹ wuhrẹ emọ nọ e rrọ eklase mẹ.” Iticha ọfa jọ ọ ta nọ: “Mẹ jọ oria itanẹte na wuhrẹ eware buobu no, maero kọ epanọ mẹ sai ro thihakọ ebẹbẹ uzuazọ. Oria itanẹte na u bi fiobọhọ kẹ omai ekpako na re orọnikọ emaha na ọvo ho.”

Iticha nọ i bu vi egba esa gbe udhuvẹ gbikpe (350) evaọ usu ahwo nọ a dhesẹ eware jw.org kẹ na a ta nọ a gbẹ gwọlọ evuẹ efa. Isẹri Jihova na a tẹ kẹ ae ebe efa, a te je dhesẹ ehrẹ Ebaibol efa kẹ ae nọ a sai ro yeri uzuazọ.

Eva e were Isẹri Jihova gaga inọ a dhesẹ eware jw.org kẹ iticha nọ i bu vi odu ọvo (1000) evaọ Zamboanga del Norte, yọ a ruẹ eware buobu nọ a rẹ sai wuhrẹ evaọ eva riẹ. Eware nọ e rrọ jw.org e rẹ sai fiobọhọ kẹ iticha evaọ akpọ na soso riẹ oware nọ u fo, wo emamọ uruemu, jẹ riẹ ekpọvio nọ i no Ebaibol na ze. *

^ edhe-ẹme 9 Evaọ orẹwho Philippines, o rrọ owha iruo ahwo nọ a rrọ iwuhrẹ isukulu re a wuhrẹ emọ-isukulu epanọ a rẹ rọ riẹ obe gbe “epanọ a re ro wo emamọ uruemu, riẹ eware nọ Ọghẹnẹ o mukpahe gbe enọ e rẹ were iẹe, jẹ jọ emamọ ahwo.”​—The 1987 Constitution of the Republic of the Philippines, Article XIV, Section 3.2.