Fikinọ ahwo a je thuru whu gaga evaọ ubrotọ Mexico jọ nọ a re se Tabasco, Isẹri Jihova a te ru ọruẹrẹfihotọ re a whowho usi obọdẹ jọ evaọ emerae ivẹ evaọ ukpe 2017. A wariẹ ghale Awake! Ane 2014 nọ uzoẹme riẹ o ta nọ: Why Go On?​—Three Reasons to Keep Living.” Eva e were ahwo gaga fiki usi uwoma ota nana.

Obufihọ Evaọ Ẹruoke

Ọzae jọ nọ a re se Faustino nọ ọ rrọ Osẹri Jihova ọ ta usi uwoma kẹ aye jọ nọ ọ jẹ ruawa kpahe ọmọzae riẹ nọ ọ rrọ ikpe 22. Ọmọzae na ọ be mọ ẹyao ọkora nọ ọ rẹ da ohwo oma fia, yọ anwọ isiava na nọ ọ be gwọlọ epanọ o re ro kpe omariẹ no. Aye na ọ riẹ epanọ o re ro fiobọhọ kẹ ọmọ riẹ hẹ. Nọ Faustino ọ kẹ aye na Awake! na, aye na ọ tẹ ta nọ, “Oware nọ ọmọzae mẹ ọ gwọlọ obọnana ona.” Okiokiọ riẹ, Faustino o te weze bru ọmọzae aye na, je lele iei ta kpahe ehrẹ Ebaibol na nọ e rrọ Awake! na. Nọ o weze bru ei te okejọ no, ọ tẹ ruẹ nọ ọmọzae na o bi nwene. Faustino ọ ta nọ, “Enẹna ọ gbẹ be ruawa tere he yọ eva e be were iẹe.” Ofariẹ, o bi gbiku eware nọ o bi wuhrẹ kẹ oniọvo ọmọzae riẹ, ọnọ ọ jẹ mọ ẹyao ọkora ọvo na re.

Ọmọtẹ jọ nọ a re se Karla nọ ọ be rria ẹwho Huimanguillo, ọ rehọ Awake! na fiobọhọ kẹ ibe ọmọ-eklase riẹ jọ. Karla ọ ta nọ, “Me muẹrohọ nọ ọmọtẹ jọ nọ ọ rrọ eklase mẹ nọ ọ rrọ ikpe 14 ọ vọ avọ ọkora. Nọ mẹ nọe oware nọ o be thọ, ọ tẹ vuẹ omẹ epanọ eware e rrọ evaọ obọ uwou rai. Nọ me bi lele iei ta ẹme na, me te muẹrohọ nọ eka emela e rrọ obọ ẹkpẹlobọ riẹ.” Ọmọtẹ nana o je bru ela fihọ abọ gbe awọ riẹ. O roro nọ o wo erru hu yọ uzuazọ riẹ u fioka ha. Karla ọ tẹ kẹe Awake! na. Nọ ọmọtẹ na o sei no, ọ tẹ ta kẹ Karla nọ o wọhọ ẹsenọ a kere Awake! na kẹe. Avọ ovao riẹ nọ o rrọ ohwohwẹ, ọ tẹ ta kẹ Karla nọ enẹna ọ ruẹ vuhumu no inọ uzuazọ u gine wuzou gaga.

Evaọ ẹwho jọ nọ a re se Villahermosa, ọzae jọ ọ vọ avọ ọkora. A si rie no iruo no, yọ aye riẹ ọ dhẹ siẹe avọ emọ ba. Ọ tẹ lẹ Ọghẹnẹ re o fiobọhọ kẹe rekọ ọ riẹ oware nọ o re ru hu. Nọ ọ jẹ gwọlọ epanọ o re ro kpe omariẹ no, Isẹri Jihova ivẹ jọ nọ a re se Martín avọ Miguel a te kporo ẹthẹ riẹ. Nọ o rovie ẹthẹ riẹ, a tẹ kẹe Awake! na. Nọ ọzae na ọ ruẹ uzoẹme Awake! na, o tẹ jariẹ oma inọ Ọghẹnẹ ọ kẹ uyo olẹ riẹ no. Martín avọ Miguel a tẹ rehọ ẹruore nọ ọ rrọ Ebaibol na sasa iẹe oma. Nọ a zihe nọ emedẹ jọ e vrẹ no, a tẹ ruẹ nọ ọzae na ọ gbẹ be ruawa tere he yọ udu riẹ u totọ ziezi. Enẹna a bi wuhrẹ Ebaibol na kugbei isiava ẹkpoka.

A Ta Usi Uwoma kẹ Ahwo nọ A Rrọ Uwou-Odi

Evaọ etoke usi uwhowho obọdẹ na, Isẹri Jihova a kpohọ iwou-odi nọ e rrọ Tabasco re a rehọ Ebaibol na fiobọhọ kẹ ahwo nọ a rrọ uwou-odi riẹ nọ uzuazọ o rrọ ghaghae. Nọ a nyae ta usi uwoma evaọ iwou-odi na, a je dhesẹ ividio, kẹ evuẹ no Ebaibol na ze, jẹ ta kpahe oware nọ uzuazọ o rọ rrọ ghaghae wọhọ epanọ a dhesẹ evaọ Awake! na. Eva e were ahwo nọ a rrọ iwou-odi na gbe enọ i bi ru iruo evaọ etẹe. Wọhọ oriruo, ohwo jọ evaọ uwou-idi na ọ ta nọ: “Isiasa soso mẹ daoma re me kpe omamẹ no. Ahwo jọ a ta kẹ omẹ nọ Ọghẹnẹ ọ be daezọ mẹ rekọ a re jọ Ebaibol na dhesẹ onana kẹ omẹ ẹdẹvo ho. Eme rai e tuduhọ omẹ awọ gaga.”

Ahwo buobu a muẹrohọ usi uwoma nọ Isẹri Jihova a jẹ ta na. Ọzae jọ nọ ọ rrọ okere-obe rọkẹ omakpokpọ ọrọ ubrotọ na o jiri Isẹri Jihova gaga rọkẹ omodawọ rai re a fiobọhọ kẹ ahwo, yọ obe-usi jọ evaọ ubrotọ na o kere kpahe ewhowho usi na inọ, “A Nyai Fiobọhọ kẹ Ahwo nọ A Gwọlọ Thuru Whu.”