Isẹri Jihova a jiroro nọ a rẹ kwa oria nọ u wuzou iruo rai kpohọ oria ofa, fikiere evaọ amara Ahrẹ 2009, a tẹ dẹ otọ jọ evaọ okpẹwho New York. Otọ na o rro te ehẹkta 102 (koyehọ ewẹ-otọ 253), yọ o rehọ emaele 50 thabọ no Brooklyn evaọ New York, nọ a be jọ ru iruo anwọ ukpe 1909.

Isẹri Jihova nọ i bu te egba eree (800) a te jọ oria ọkpokpọ na ru iruo, yọ a te bọ uwou nọ ifisi e te jọ, uwou nọ a te jọ rẹrote iruẹru rai, gbe iwou-ehru ilogbo ene nọ a te rria. A te jẹ bọ uwou nọ a ti fi eware ikuigbe Isẹri Jihova họ.

Iwou nọ a te bọ na o te rehọ ehẹkta 45 evaọ otọ nọ a dẹ na, a vẹ te nya siọ abọ owhawho nọ o kiọkọ gbe abọ nọ ame ọ rrọ na ba. Ogege o te jọ otọ na bu tere he. Ukpoye, a te nya siọ ire nọ e rrọ otọ na ba re o jọ epọvo na kugbe eria nọ e wariẹ otọ na họ.

Ewena nọ e rẹ drọ iwou a ma omaa iwou na evaọ oghẹrẹ nọ a te gbẹ rọ raha igho buobu rọ rẹrote ai jẹ ruẹrẹ ae he, yọ iwou nọ a te bọ na i ti nwene okegbe na tere he. Wọhọ oriruo, a te kọ ẹbe nọ ọ rẹ kaki whu hu fihọ ehru iwou na, re ame-oso o gbe kporo no ehru iwou na ze buobu te raha otọ na ha, yọ ẹbe na u ti ru nọ iwou na e gbẹ rọ roro hayo dhẹ ga hrọ họ. A te bọ ifisi na evaọ oghẹrẹ nọ elo ọre o re ro lo fihọ ae ziezi. A te jẹ bọ iwou na evaọ oghẹrẹ nọ ame o gbe ti ro vru tere he.

Fikieme a rọ gwọlọ kwa kpohọ oria ofa? Oware jọ nọ o wha riẹ ze họ, iwou ogha Isẹri Jihova nọ e rrọ eria efa akpọ na a mu Ebaibol gbe ebe efa họ eprinti no, onọ a jẹ hae jọ obọ Brooklyn ọvo printi vẹre. Evaọ ukpe 2004, eware nọ a je ro printi ebe jẹ wọ ai kpohọ eria sa-sa, a kwa rai no Brooklyn kpobọ Wallkill evaọ New York, onọ o rehọ emaele 90 thabọ no Brooklyn.

A roro kpahe unuigho nọ a be hae raha re. Igho nọ a jẹ hae rọ rẹrote iwou gbe eware efa nọ e jọ obọ Brooklyn na o jọ buobu. Nọ orọnọ iwou ekpokpọ na e rrọ oria ovo yọ e rro tere he na, u ti ru araha kpotọ, a ve fi igho yena ba iruo usiuwoma ota na.

Utu egọmeti nọ u re kuenu kẹ ahwo nọ a be bọ iwou a te kiẹ otọ na riwi je kuenu kẹ omai no re ma te ti mu ebabọ họ. Otẹrọnọ eware e riẹ nya, ma ti mu ebabọ na họ evaọ 2013, yọ o te rehọ ikpe ene.

U te no uwou nọ a rẹ jọ printi eware nọ o rrọ Wallkill evaọ New York na no, Isẹri Jihova a wo uwou nọ a rẹ jọ ru isukulu sa-sa evaọ Patterson obọ New York re. A te je wo iwou ogha fihọ erẹwho buobu re. Isẹri Jihova nọ e rrọ akpọ na soso a bu vrẹ ima ihrẹ gbe idu egba isoi (7,500,000).