Ukoko ebabọ jọ nọ a riẹ gaga evaọ Britain o jiri Isẹri Jihova fiki epanọ a bi ro wuhrẹ eyae na epanọ a rẹ rọ dhẹ ekatapila ilogbo sa-sa nọ a bi ro ruiruo evaọ uwou ogha ọkpokpọ nọ a be bọ kẹle Chelmsford, Essex. A re se ukoko na Considerate Constructors Scheme * (CCS), yọ o ta nọ Isẹri Jihova họ ahwo nọ a be mae daoma kpaobọ re a wuhrẹ eyae na epanọ a re ru iruo ebabọ. A tẹ jẹ ta nọ oware nana nọ Isẹri Jihova a bi ru na yọ oware “okpokpọ.” Fikieme a ro jiri Isẹri Jihova te enẹ?

A tẹ ghale ahwo nọ a rrọ iruo ebabọ evaọ Britain kpohọ abọ udhusoi, eyae nọ e rrọ usu rai a te abọ ikpegbesa ha. Evaọ ọkiẹriwo jọ nọ ukoko Britain jọ o ru, umutho eyae jọ ọvo ae a gwọlọ nọ a re ru iruo evaọ ekọmpene ebabọ. Wo ohẹriẹ, a tẹ ghale ahwo nọ a bi ru iruo evaọ uwou ogha nọ o kẹle Chelmsford na kpohọ abọ udhusoi, abọ udhuvẹ yọ eyae. Rekọ evaọ usu ahwo nọ a be dhẹ ekatapila ilogbo, eyae nọ e rrọ usu rai a bu vrẹ abọ udhosa.

Eyae nọ i bi lele ezae ru iruo evaọ Chelmsford

Ẹvẹ eyae na a be sai ro ru iruo na? A bi wuhrẹ ai jẹ tha ae uke. Eware ivẹ nana yọ eware jọ nọ ukoko CCS na o gwọlọ nọ ekọmpene ebabọ kpobi u re ru. Ukoko na o rẹ tuduhọ ekọmpene ebabọ awọ re a “daoma ruẹ nọ a kẹ iruiruo rai adhẹẹ, riẹ ai ru ziezi, tuduhọ ae awọ, tha ae uke je wuhrẹ ai.” A rẹ rọ ere dhesẹ nọ iruo nọ iruiruo rai a bi ru e da rai ẹro fia.

A bi Wuhrẹ Eyae na re A Rehọ Ekatapila Ru Iruo

Jade yọ aye jọ nọ a bi wuhrẹ re ọ riẹ epanọ a rẹ rọ Ekatapila ru iruo gbe epanọ a rẹ dhẹ itipa ilogbo. Ọ ta nọ: “Me rẹro riẹ hẹ! Me je roro nọ mẹ sae rọ imoto ilogbo ru iruo vẹre he. Ẹsejọ iruo na e rẹ jọ bẹbẹ, rekọ a bi wuhrẹ omẹ ẹsikpobi yọ me bi wuhrẹ eware ekpokpọ.” Wọhọ Jade, Lucy ọ be rehọ ekatapila ru iruo re. Ọ ta nọ: “Nọ mẹ kake ziọ oria iruo na, me wo onaa iruo ọvo ho. Rekọ ẹdẹdẹ nọ mẹ rọ nyaze a ro mu omẹ họ ewuhrẹ. Anwọ oke yena ze, me lele itu isoi ru iruo no, fikiere a wuhrẹ omẹ eware buobu no!”

A bi wuhrẹ aye jọ epanọ a rẹ rọ ekatapila nana wọ eware

Orọnikọ epanọ a rẹ rọ rehọ ekatapila ru iruo ọvo eyae na a riẹ kpahe he. Eric nọ o wuzou utu jọ ọ ta nọ: “Ẹsibuobu eyae na a rẹ mae rẹrote eware nọ ma bi ro ru iruo na vi ezae na, yọ a rẹ kake riẹ nọ oware jọ o tẹ be thọ kugbe ẹjini hayo ekatapila nọ a bi ro ru iruo na jẹ tubẹ ta lahwe.”

Epanọ A be rọ Tha Eyae na Uke Evaọ Iruo Na

Carl nọ ọ be rẹrote itu sa-sa nọ e rẹ dhẹ ekatapila ọ ta nọ: “Eva e be were omẹ gaga evaọ oghẹrẹ nọ eyae na a bi ro wuhrẹ epanọ a rẹ dhẹ imoto ilogbo na. Evaọ ẹsejọ, mẹ rẹ kuvẹ re eyae na a dhẹ o tẹ make rọnọ ezae nọ e be dhẹ anwẹdẹ nọ i wo onaa ziezi a riẹ!”

Aye na ọ be rehọ ẹjini na kru ekpọ kugbe

Nọ enọ i wuzou itu na a te dhesẹ nọ a fievahọ ahwo nọ a rọ otọ rai ru iruo, onana u re fiobọhọ kẹ ai ru iruo na ududu. Ere o jọ kẹ aye jọ nọ a re se Therese. Ọ rẹ rehọ ekatapila ruiruo ziezi, yọ ọ riẹ nọ evaọ oria iruo itieye na, o gwọlọ nọ ohwo ọ rẹ yọroma ziezi re ọ sae whaha oware kpobi nọ o rẹ wha omonwa ze. Therese ọ ta nọ: “Nọ mẹ tẹ riẹ nọ ohwo nọ o wuzou utu iruo mai na o fievahọ omẹ, onana u re fiobọhọ kẹ omẹ ru vrẹ epanọ mẹ hae ti ru vẹre keme mẹ riẹ nọ ọ rrọ omẹ emu. Mẹ be rọ ẹgba mẹ kpobi ru iruo na keme mẹ riẹ nọ ahwo a rri oware nọ me bi ru na ghaghae!”

Abigail yọ aye ọfa jọ nọ ọ rẹ rehọ ekatapila ru iruo jẹ dhẹ imoto ilogbo. Oghẹrẹ nọ a bi ro lele iei ru iruo jẹ thae uke o be were iẹe gaga. Ọ ta nọ: “Ezae nọ ma gbe bi ru iruo na a bi rri omẹ kpokpotọ fikinọ mẹ aye he. A rẹ nabe romatotọ dhesẹ iruo na kẹ omẹ orọnikọ a re mi omẹ iruo na no ho. A rẹ kẹ omẹ uvẹ re me ru ẹkẹ abọ mẹ.”

Eyae na A rẹ Romatotọ Ru Iruo Na

U te no ekatapila nọ eyae na a re ro ru iruo evaọ Chelmsford no, a wuhrẹ eyae na epanọ a rẹ ma otọ, rẹrote otọ, ruẹrẹ ijini gbe imoto gbe epanọ a rẹ rọ eskafodu dikihẹ. Robert o lele eyae ru oghẹrẹ iruo sa-sa no. Ọ ta nọ “a rẹ tẹrovi iruo na jẹ gwọlọ muhọ ababọ okioraha, yọ a re muẹrohọ omoware osese kpobi.” Tom nọ o re ru iruo kugbe ahwo nọ a rẹ ma otọ ọ ta nọ: “Eyae nọ i bi ru iruo evaọ utu mai a re muẹrohọ otọ gaga. A rẹ gwọlọ nọ oware kpobi nọ a kẹ rai nọ a ru a re ru ei woma ziezi.”

Onana u ru nọ Fergus nọ o wuzou utu jọ ọ rọ ta avọ evawere nọ: “Eyae na a rẹ sai gine ru iruo ebabọ!”

^ edhe-ẹme 2 Ukoko nana nọ a bi se Considerate Constructors Scheme na yọ ukoko nọ o rẹ daoma ruẹ nọ ekọmpene nọ i re ru iruo ebabọ evaọ obọ Britain i bi wo ẹnyaharo.