Mẹ jẹ Hae Lẹ Evaọ Ehru Ure Oak
Aye jọ nọ a re se Rachel nọ ọ be rria Dominican Republic enẹna o gbiku uzuazọ riẹ. Ọ ta nọ, “Evaọ okenọ a yẹ omẹ, ahwo uviuwou mẹ a jẹ gọ Jihova. Rekọ o da omẹ gaga nọ evaọ okenọ mẹ jọ ikpe ihrẹ, ọsẹ mẹ o gbe je kpohọ ewuhrẹ hẹ, ọ tẹ jẹ wọso Isẹri Jihova gaga. Fikiere ọ tẹ jẹ daoma whaha omẹ re mẹ siọ Jihova ba ẹgọ. Wọhọ oriruo, ọ rẹ ta kẹ omẹ nọ mẹ tẹ siọ Jihova ba ẹgọ, ọ te dẹ ifonu kẹ omẹ, ọ te wha omẹ kpohọ oria ugheriwo jọ nọ a re se Disneyland, hayo kẹ omẹ ugho dede! Evaọ ẹsejọ, o re kpe omẹ ukpe ẹsọ sọ ozọ u ti mu omẹ re mẹ siọ Jihova ba ẹgọ. Ọ rẹ ta nọ o te kpe omẹ te epanọ mẹ gbẹ sae rọ ta ẹme hayo nya onya ha, o te jọ bẹbẹ kẹ omẹ re me kpohọ ewuhrẹ. Rekọ eware nana kpobi e whaha omẹ hẹ. Mẹ gba riẹ mu nọ me re kpohọ ewuhrẹ makọ epanọ eware i yoma te kẹhẹ.
“Oke kpobi nọ oni mẹ ọ tẹ rrọ uwou, ọsẹ mẹ ọ rẹ kawo obọ te omẹ hẹ. Ọ ta kẹ omẹ nọ o te kẹ oni mẹ uye gaga nọ mẹ tẹ vuẹe nọ ọ be hai kpe omẹ. Oke kpobi nọ oni mẹ ọ tẹ nọe kpahe emela nọ e rrọ omẹ oma, o re gu inoma. Ọ rẹ ta nọ ekareti nọ o bi wuhrẹ omẹ oye o be lẹliẹ emela jọ oma mẹ, rekọ mẹ tubẹ gwọlọ nọ o wuhrẹ omẹ hẹ.
“Evaọ oke yena, mẹ gbẹ maha yọ ozọ u je mu omẹ re mẹ vuẹ oni mẹ oware nọ ọsẹ mẹ o bi ru omẹ. Fikiere, Jihova me re horie eva mẹ kẹ. Mẹ rẹ nya kpohọ owhawho jọ nọ o jọ emu uwou mai evaọ Maryland, U.S.A, mẹ vẹ jọ obei oke krẹkri. Evaọ usu ire nọ e jọ owhawho na, u wo ure oak jọ nọ mẹ rẹ gwọlọ gadiẹ. Mẹ tẹ gadiẹ kpohọ ogha nọ u kiehọ omẹ oma, mẹ vẹ jọ etẹe horie eva mẹ kẹ Jihova. Mẹ rẹ lẹ se Jihova kpahe eware nọ e be kẹ omẹ uye, gbe oware nọ me ti ru kẹe nọ me te te ohwo no, otẹrọnọ ọ sẹro omẹ rite oke yena. Mẹ rẹ jẹ vuẹ Jihova kpahe oware nọ me ti ru evaọ akpọ ọkpokpọ na. Mẹ rẹ vuẹe kpahe ahwo uviuwou mẹ, epanọ ozọ u gbe ti ro mu omẹ hẹ, gbe epanọ eva e te were omẹ te.
“Oke kpobi nọ ọsẹ mẹ ọ tẹ be rọ eware gẹnyẹ omẹ hayo kpe omẹ re mẹ siọ Jihova ba ẹgọ, mẹ rẹ ruẹ oghẹrẹ nọ Jihova ọ rẹ rọ kẹ omẹ ẹgba jẹ sasa omẹ oma. O re fiobọhọ kẹ omẹ re mẹ talamu ei je kru ẹrọwọ mẹ.
“Mẹ họ-ame evaọ oke nọ mẹ jọ ikpe ikpe, me te mu ọkobaro họ nọ ikpe ivẹ e vrẹ no. Evaọ oke ọsosuọ, ọsẹ mẹ ọ riẹ hẹ inọ mẹ họ-ame je mu ọkobaro họ no. Rekọ nọ ọ riẹ, ọ bọwo omẹ ovao, agbotọ mẹ o te no ẹta.
“Inievo jọ evaọ ukoko na a jẹ ta nọ mẹ maha vi ohwo nọ o re ru iruo ọkobaro, yọ a jẹ ruawa nọ mẹ riẹ oware nọ mẹ gwọlọ ru na ha. Nọ oke o be nya na, mẹ tẹ ruẹ nọ izoge buobu nọ e jọ ukoko na evaọ okegbe mai a bi se egagọ Jihova gboja ha. Oware nọ a je roro kpahe kpobi họ, epanọ a re ro kpohọ epati jẹ reakpọ kuoma. Yọ oware nana nọ a je ru na o jẹ hai si omẹ urru! Ẹsejọ mẹ rẹ gwọlọ kuomagbe ae. Mẹ rẹ ta kẹ omamẹ nọ, ‘Kọ mẹ gbẹ tubẹ siọ usi uwoma ba re mẹ reakpọ kuoma wọhọ izoge ibe mẹ?’ Oke kpobi nọ me te wo iroro yena, me re horie eva mẹ kẹ Jihova.
“Nọ mẹ jọ oware wọhọ ikpe ikpegbisoi, ahwo ekọmpene jọ nọ a riẹ odẹ gaga a tẹ nyabru omẹ ze. A rẹ thueki eware osẹ, yọ a ta nọ a gwọlọ nọ me ru iruo kẹ ae evaọ ọfisi rai nọ ọ rrọ Milan, evaọ Italy. Eva e were omẹ gaga nọ a vuẹ omẹ nọ mẹ họ ohwo nọ ọ te hai dhesẹ eware osẹ rai kẹ ahwo. A ta nọ a te hai fi iwoho mẹ họ emagazini, yọ mẹ te hai ku iwu eghaghae họ dhesẹ kẹ ahwo. Evaọ oke nana yọ me ru ọkobaro oke-kpobi te ikpe esa no. Mẹ jẹ ta kẹ omamẹ nọ, ‘Mẹ tẹ rehọ iruo nana, me ti wo ugho nọ mẹ te rọ rẹrote omamẹ evaọ iruo ọkobaro na oke lelehie!’ Ọsẹ mẹ ọ dhẹ no uwou siọ omai ba, fikiere me je roro nọ mẹ sae jọ ugho na fiobọhọ kẹ oni mẹ re.
“Mẹ lẹ kpahe ẹme na. Me lele oni mẹ ta ẹme keme ọ rrọ ọkobaro te ikpe buobu no. Mẹ tẹ jẹ ta ẹme na kẹ ọkpako ukoko jọ nọ me fievahọ. Yọ wọhọ epanọ me re ru vẹre, me te je kpohọ oria ure mẹ na nyae lẹ kpahe ẹme na. Oria Ebaibol jọ nọ ọkpako ukoko na o dhesẹ kẹ omẹ oye Jihova ọ rọ kuyo olẹ mẹ. Oria na họ obe Ọtausiuwoma Na 5:4, nọ o ta nọ: ‘Oke kpobi nọ whọ ya eyaa kẹ Ọghẹnẹ, ru eyaa na gba. Ru oware nọ whọ ya na.’ Mẹ ya eyaa kẹ Jihova nọ mẹ te rọ uzuazọ mẹ kpobi gọe. Rekọ mẹ riẹ nọ mẹ tẹ rehọ iruo nana, u ti ru nọ usu mẹ kugbe Jihova o gbẹ te kpekpe tere he. Fikiere mẹ tẹ siọ iruo na.
“Ghelọ eware nọ e via kẹ omẹ evaọ oke emaha mẹ na, Jihova ọ sẹro mẹ keme me te ohwo no! Enẹna me wo ọzae no, odẹ riẹ Jaser. Ma yẹ ọmọzae nọ o te ikpe izii no, odẹ riẹ Connor. Jaser ọ rrọ ọkpako ukoko, yọ Connor ọ rrọ owhowho-uvie nọ ọ re họ-ame he. Me ru iruo odibọgba oke-kpobi na te enwenọ ikpe udhegbihrẹ no.
“Ẹsibuobu me re roro kpahe oke nọ mẹ jẹ hae rọ gadiẹ ure oak nọ o rrọ owhawho evaọ emu uwou mai, me ve horie eva mẹ kẹ Jihova oke krẹkri. Mẹ lẹ Jihova re o fiobọhọ kẹ omẹ, yọ o gine ru ere evaọ edhere nọ me rẹro riẹ hẹ. Ọ bọ omẹ ga, ọ sasa omẹ oma, yọ o fiobọhọ kẹ omẹ riẹ oware nọ me re ru. No emaha mẹ ze rite enẹna, Jihova o dhesẹ kẹ omẹ inọ ọye yọ ọsẹ nọ a rẹ ruẹ obọriẹ hẹ. Eva e were omẹ nọ mẹ rọ salọ inọ mẹ rẹ rọ eva mẹ kpobi gọe. Emamọ iroro mẹ jẹ na.”