Kpohọ eme nọ e riẹ eva

Ebaibol Na O Re Nwene Uzuazọ Ohwo

Oware nọ O Mae Rro nọ U Te Omẹ Obọ

Oware nọ O Mae Rro nọ U Te Omẹ Obọ
  • UKPE NỌ A YẸ OMẸ 1967

  • ORẸWHO MẸ FINLAND

  • IKU MẸ ETẸNISI EFA E JỌ IRUO MẸ

UZUAZỌ MẸ EVAỌ OKENỌ U KPEMU

Mẹ jọ ughe ẹwho jọ nọ a re se Tampere evaọ Finland whẹro. Ahwo uviuwou mẹ a kru egagọ ga tere he rekọ a se isukulu gbe emamọ uruemu gboja. Oni mẹ ohwo Germany, yọ okenọ mẹ jọ emaha mẹ jẹ hai kpobọ Germany nyae rria kugbe ọsẹ ologbo gbe oni ologbo mẹ.

Arozaha ọ were omẹ no emaha ze. Nọ mẹ rro ze no, mẹ tẹ jẹ romakẹ oghoghẹrẹ arozaha sa-sa, rekọ nọ me te ikpe ikpegbene no, mẹ tẹ jiroro nọ mẹ rẹ tẹrovi arozaha etẹnisi ọvo. Nọ mẹ jọ ikpe ikpegbezeza, me je wuhrẹ etẹnisi efa isiava hayo isiasa okpẹdẹ, ohwo jọ nọ ọ riẹ etẹnisi ẹfa ziezi o je wuhrẹ omẹ isiava okpẹdẹ, kẹsena mẹ ọvo o ve wuhrẹ evaọ owọwọ. Oghẹrẹ nọ arozaha na o re fiobọhọ kẹ ohwo ru eware sa-sa ẹsiẹvo o jẹ were omẹ oma gaga; nọ mẹ tẹ be fa etẹnisi, ọ rẹ lẹliẹ omẹ roro vẹrẹ je ru oma mẹ ga. Dede nọ o jẹ hae were omẹ re me kuomagbe egbẹnyusu mẹ, yọ mẹ jẹ hae da ebiẹ ẹsejọ, me wo ẹbẹbẹ idieda-thomawa hayo imu egaga erehọ edọvo ho. Etẹnisi efa họ oware nọ mẹ rọ karo evaọ uzuazọ mẹ.

Nọ mẹ jọ ikpe ikpegbihrẹ, mẹ jọ usu ahwo nọ a je lele amọfa sa-sa fa etẹnisi evaọ otọ ẹruọsa ogbẹgwae nọ a re se ATP. * Nọ mẹ kparobọ evaọ arozaha na unuẹse buobu no, a tẹ te riẹ omẹ odẹ evaọ orẹwho mẹ. Nọ me te ikpe udhegbivẹ no, mẹ jọ usu ahwo udhuvẹ-gbikpe nọ e mae riẹ etẹnisi ẹfa evaọ akpọ na soso.

Evaọ ikpe buobu me kpohọ erẹwho sa-sa evaọ akpọ na nyae fa etẹnisi. Mẹ ruẹ eria jọ nọ i woma gaga, rekọ me muẹrohọ re nọ ebẹbẹ buobu e rrọ akpọ na, ebẹbẹ wọhọ ozighi, imu egaga erehọ, gbe okegbe na nọ a be raha. Wọhọ oriruo, nọ ma kpobọ America, a ta kẹ omai inọ ma te eria jọ họ evaọ ikpewho jọ, fiki eware iyoma nọ a rẹ jarai ru gaga. Eware nana kpobi e jẹ kẹ omẹ uye. U te no ere no, dede nọ me je ru iruo nọ e were omẹ gaga, o jọ omẹ oma wọhọ nọ me bi yeri uzuazọ ufofe.

EPANỌ EBAIBOL NA O RO NWENE UZUAZỌ MẸ

Isẹri Jihova a mu Ebaibol họ ewuhrẹ kugbe ogbẹnyusu ọmọtẹ mẹ nọ a re se Sanna nọ mẹ avọ iẹe ma gbẹ rrọ uwou. O dina gbe omẹ unu inọ Sanna ọ gwọlọ gọ Ọghẹnẹ, rekọ mẹ whaha e riẹ ewuhrẹ na ha. Mai imava ma ruọ orọo evaọ 1990, kẹsena ọ tẹ họ-ame je zihe ruọ Osẹri Jihova evaọ ukpe nọ u lele i rie. Mẹ romakẹ egagọ ọvo ho, rekọ mẹ rọwo nọ Ọghẹnẹ ọ rrọ. Mẹ kareghẹhọ nọ oni ologbo mẹ nọ ọ rrọ ohwo Germany ọ jẹ hai se Ebaibol gaga, yọ o tube wuhrẹ omẹ epanọ a rẹ lẹ.

Ẹdẹjọ nọ mẹ avọ Sanna ma weze bru ọzae-avọ-aye jọ nọ a rrọ Isẹri Jihova, ọzae na nọ a re se Kari o te dhesẹ eruẹaruẹ Ebaibol nọ o ta kpahe “edẹ urere na.” (2 Timothy 3:1-5) kẹ omẹ. (2 Timoti 3:1-5) Onana u duobọte omẹ gaga. Agbẹta nọ eware i ro yoma te enẹ evaọ akpọ na. Ma nwane ta ẹme kpahe egagọ tere he evaọ ẹdẹ yena. Rekọ no umuo oke yena vrẹ, mẹ avọ Kari ma tẹ be hae ta ẹme kpahe Ebaibol na, yọ eware nọ me wuhrẹ i vẹ kẹ omẹ gaga. Fikinọ me re wo uvẹ tere he yọ mẹ jẹ hai kpohọ erẹ gaga, mẹ avọ Kari ma jẹ ruẹ uvẹ nọ ma rẹ rọ keria ta ẹme he, rekọ Kari ọ kpairoro vrẹ omẹ hẹ. Ọ jẹ hae kere iyo enọ nọ mẹ nọ evaọ etoke uwuhrẹ mai fihọ ileta vi se omẹ. Ebaibol na ọ kiyo enọ ididi kpobi nọ mẹ jẹ nọ kpahe uzuazọ, ẹmẹrera na mẹ tẹ te ruẹ ugogo ovuẹ nọ o rrọ Ebaibol na, inọ, Ọghẹnẹ ọ te rehọ Uvie riẹ ru ẹjiroro riẹ gba. Nọ me wuhrẹ nọ Jihova họ odẹ Ọghẹnẹ, jẹ ruẹ eware nọ o ru kẹ omai no, onana u duobọte omẹ gaga. (Olezi 83:18) Oware nọ o mai duobọte omẹ họ idhe ẹtanigbo na. Uyoyou oye o wọ Ọghẹnẹ ru onana orọnikọ thakpinọ a rọ oware jọ hwosa oware nọ o raha hayo ru oware nọ uzi o ta ọvo ho. (Jọn 3:16) Me wuhrẹ re inọ mẹ sae jọ ogbẹnyusu Ọghẹnẹ jẹ rria bẹdẹ bẹdẹ evaọ aparadase nọ udhedhẹ o te jọ. (Jemis 4:8) Mẹ tẹ nọ omamẹ nọ, “Ẹvẹ mẹ sai ro dhesẹ nọ eware nana e da omẹ ẹro?”

Me te roro didi kpahe oghẹrẹ uzuazọ nọ me bi yeri. Mẹ jọ Ebaibol wuhrẹ nọ ẹkẹ evawere e mae rrọ, yọ mẹ gwọlọ nọ mẹ rẹ nyae vuẹ amọfa kpahe eware nọ me bi wuhrẹ na. (Iruẹru Ikọ 20:35) Whaọ, etẹnisi efa họ okọ mẹ, yọ iruo na e rẹ wọ omẹ kpohọ erẹ evaọ oware wọhọ edẹ egba ivẹ (200) evaọ ẹgbukpe. Oware nọ o mae jọ uviuwou mẹ oja kpobi họ, epanọ mẹ rẹ rọ riẹ etẹnisi fa ziezi, kpohọ eria sa-sa, jẹ kọ okọ etẹnisi na. Mẹ riẹ nọ u fo nọ me re nwene oghẹrẹ nọ me bi yeri uzuazọ mẹ.

Mẹ riẹ nọ mẹ tẹ siọ etẹnisi efa nọ ọ be kẹ omẹ igho buobu ba fikinọ mẹ gwọlọ gọ Ọghẹnẹ, ahwo buobu a ti rri rie nọ oware ugheghẹ. Rekọ uvẹ nọ mẹ rẹ rọ riẹ Jihova ziezi je wo uzuazọ ebẹdẹ bẹdẹ o ghare vi oware kpobi nọ etẹnisi efa o te kẹ omẹ, fikiere o jọ bẹbẹ kẹ omẹ tere he re mẹ riẹ oware nọ me re ru. Mẹ tẹ jọ udu mẹ ta nọ mẹ te gaviezọ kẹ eme nọ amọfa a te ta ha, mẹ ọvo mẹ rẹ jiroro oware nọ me re ru. Oria Ebaibol nọ o mai fiobọhọ kẹ omẹ tehe ezọ di kẹ eme nọ ahwo a be ta họ Olezi 118:6 nọ o ta nọ: “Jihova ọ rrọ abọ mẹ; ozọ u re mu omẹ hẹ. Eme ohwo ọ rẹ sai ru omẹ?”

Oke yena ahwo jọ a ta kẹ omẹ nọ a gwọlọ nọ me lele ai ru iruo etẹnisi efa evaọ ikpe buobu, inọ a te hwa omẹ igho buobu. Rekọ, mẹ jiroro oware nọ me ti ru no, fikiere mẹ rọwo ho, ukuhọ riẹ mẹ tẹ seba ẹfa evaọ otọ ẹruọsa ogbẹgwae ATP na. Mẹ ruabọhọ uwuhrẹ Ebaibol mẹ, kẹsena evaọ Ahrẹ 2, 1994, mẹ tẹ họ-ame je zihe ruọ Osẹri Jihova.

IRERE NỌ ME WO NO

Orọnikọ oware okpẹtu jọ nọ o via kẹ omẹ oye o lẹliẹ omẹ muhọ eroro kpahe Ọghẹnẹ hẹ. Yọ mẹ sae nwane ta nọ mẹ jẹ gwọlọ uzẹme na ha. O jọ omẹ oma nọ eware e jẹ riẹ nya kẹ omẹ, gbe nọ oware ovo o kare omẹ hẹ. Rekọ, idudhe na, me te duku uzẹme nọ o rrọ Ebaibol na. Me wuhrẹ nọ uzuazọ u wo uvi ẹjiroro, yọ enẹna me wo evawere vi epaọ anwẹdẹ kpobi no. Ma kẹle ohwohwo gaga enẹna vi epaọ anwẹdẹ no evaọ uviuwou mẹ yọ ma bi wo okugbe. Yọ eva e be were omẹ gaga inọ emezae esa mẹ a bi lele oriruo mẹ, orọnikọ orọ etẹnisi efa ha, rekọ orọ Oleleikristi.

Mẹ gbẹ be fa etẹnisi. Evaọ ikpe buobu ze na, etẹnisi efa e gbẹ rrọ okọ mẹ. Wọhọ oriruo, me re wuhrẹ ahwo epanọ a rẹ fa etẹnisi, me te je wuzou oria jọ nọ a rẹ jọ fa etẹnisi. Rekọ mẹ gbẹ be rehọ oyena karo evaọ uzuazọ họ. Okenọ u kpemu, mẹ jẹ hai wuhrẹ etẹnisi euwa buobu koka koka re mẹ sae jọ ohwo ọsosuọ. Rekọ enẹna nọ mẹ rrọ ọtausiuwoma oke kpobi na, eva e be were omẹ inọ mẹ be rehọ oke mẹ wuhrẹ amọfa eware nọ Ebaibol ọ ta, enọ i nwene uzuazọ mẹ na. Usu okpekpe nọ mẹ be daoma wo kugbe Jihova Ọghẹnẹ, gbe ẹruore obọdẹ uzuazọ nọ o rrọ obaro tha nọ me bi wuhrẹ amọfa kpahe, eye họ eware nọ e be mae kẹ omẹ evawere.—1 Timoti 6:19.

^ edhe-ẹme 10 ATP (Association of Tennis Professionals) yọ ogbẹgwae nọ o rẹ rẹrote etẹnisi efa evaọ erẹwho sa-sa. Ae a rẹ kpọ arozaha etẹnisi ọrọ ezae nọ i re lele ohwohwo fa evaọ eria sa-sa. Ogbẹgwae ATP na u wo ọruẹrẹfihotọ nọ ahwo nọ a riẹ ẹfa ziezi a rẹ rọ nyae fa evaọ erẹwho sa-sa, yọ a wo okerefihotọ epanọ ohwo ọ be riẹ fa te gbe osa nọ a rẹ hwae. Epanọ ohwo ọ kparobọ te oye a re ro dhesẹ oria nọ o mu evaọ akpọ soso.