Kpohọ eme nọ e riẹ eva

EBAIBOL NA O RE NWENE UZUAZỌ OHWO

“Me Wo Ofu-Ọkpoo”

“Me Wo Ofu-Ọkpoo”
  • Ukpe Nọ A Yẹ Omẹ: 1975

  • Orẹwho Mẹ: Mexico

  • Iku Mẹ: Ofu-ọkpoo; uwou-odi

UZUAZỌ MẸ EVAỌ OKENỌ U KPEMU

A yẹ omẹ evaọ ẹwho ọsese jọ nọ a re se San Juan Chancalaito evaọ Chiapas, obọ Mexico. Mẹ yọ ohwo orua nọ a re se Chol, nọ u no uyẹ Maya ze. Emọ ikpegbivẹ ọsẹgboni mẹ a yẹ, yọ mẹ họ ọrọ avọ isoi. Nọ mẹ gbẹ jọ ọmaha, Isẹri Jihova e jẹ hai wuhrẹ Ebaibol kugbe omẹ avọ inievo mẹ. Rekọ u yoma gaga inọ me je lele ithubro Ebaibol ho.

Nọ me te ikpe ikpegbesa no, mẹ tẹ jẹ rehọ imu egaga je mu uji họ etho. Mẹ tẹ kwa no uwou, yọ oria ovo o jẹ hae gba omẹ hẹ. Nọ me te ikpe ikpegbezeza no, me te mu iruo họ evaọ ọgbọ nọ a rẹ jọ kọ ige. Mẹ jọ etẹe ru iruo te enwenọ ukpe ovo. Ẹdẹjọ nọ ma jẹ rọ okọ fa ige buobu nyae zẹ, utu ofa jọ nọ o rrọ iruo evona nọ a gwọlọ nọ ma rẹ zẹ vi ae omarai hi a tẹ wọ igbeke ze te họre omai evaọ ethẹ na. Nọ a jẹ sa omai, mẹ tẹ la ro ame, diwi ototọ lafi ofẹ ofa ethẹ na. Kẹsena, mẹ tẹ dhẹ kpobọ America.

Nọ mẹ jọ obọ America, me mu eki imu egaga evona họ, yọ onana o jẹ hae wha uye se omẹ ẹsibuobu. Nọ me te ikpe ikpegbizii no, a te mu omẹ je bruoziẹ kpe omẹ inọ mẹ yọ oji gbe inọ mẹ jẹ te gwọlọ kpe ohwo. Kẹsena a te mu omẹ fihọ uwou-odi, mẹ tẹ jẹ jọ uwou-odi na kuomagbe otu ugbarugba jọ jẹ hai ru ozighi. Fikiere, otu egọmeti nọ o wuzou iwou-odi a te si omẹ no etẹe kpohọ uwou-odi nọ a rẹ mae jọ rou ohwo evaọ Lewisburg, Pennsylvania.

Uruemu mẹ u te je dhe eyeyoma nọ mẹ make jọ uwou-odi Lewisburg na. Fikinọ me si eka nọ a re ro vuhu otu ugbarugba fihọ oma, o jẹ hae bẹ vievie he re me kuomagbe utu nọ u wo oka yena. Mẹ tẹ jẹ hai ru ozighi vi epaọ anwẹdẹ, jẹ hai dhe ẹhẹhọre. Ẹdẹjọ utu mai avọ utu ugbarugba ofa u te kie ohọre evaọ ogba nọ a jọ fi omai họ uwou-odi na. Ohọre na o jọ gaga, ekpọ nọ a rẹ rọ fa oghẹrẹ ebọro ọgaga jọ gbe eware nọ a rẹ rọ wọ iwheti ma jẹ rọ họre. Ahwo nọ a be rẹrote uwou-odi na a te se etiẹgase fihọ omai rọ fa ohọre na. Kẹsena otu egọmeti nọ o wuzou iwou-odi a tẹ wariẹ rehọ omẹ kpohọ uwou-odi ofa nọ a re mu egbulegbu nọ e mai yoma fihọ. Me wo ofu-ọkpoo, yọ mẹ jẹ hai zue eme họ gaga. Me re kpe amọfa ukpe igbabọ noke toke. Onana o jẹ hae were omẹ oma. Udu ọ jẹ hai brukpe omẹ vievie he.

EPANỌ EBAIBOL NA O RO NWENE UZUAZỌ MẸ

Evaọ uwou-odi nọ a fi omẹ họ uwhremu na, mẹ ọvo ọ jẹ hae jọ oria enwenọ okpẹdoke soso, fikiere mẹ tẹ jẹ hai se Ebaibol ro le oke haro. Uwhremu na, omọvo ahwo nọ a re rou uwou-odi na ọ tẹ kẹ omẹ obe na, Whọ Sae Ria Bẹdẹ Bẹdẹ eva Aparadase ọ Otọakpọ. * Nọ me je se obe nana nọ a kere no Ebaibol ze na, mẹ jẹ hae kareghẹhọ eware nọ Isẹri Jihova a je wuhrẹ omẹ evaọ okenọ mẹ gbẹ jọ ọmaha. Kẹsena me te je roro kpahe epanọ uzuazọ mẹ u yoma te no fiki ozighi nọ me bi ru na. Me roro kpahe ahwo uviuwou mẹ re. Nọ orọnọ inievo emetẹ ivẹ mẹ a zihe ruọ Isẹri Jihova no na, o tẹ ziọ omẹ iroro nọ, ‘inievo mẹ nana a te rria bẹdẹ bẹdẹ.’ Mẹ tẹ nọ omamẹ nọ, ‘Kọ fikieme mẹ gbẹ rọ rria bẹdẹ bẹdẹ hẹ?’ Oke oyena mẹ rọ gbaemu nọ, me re nwene uzuazọ mẹ.

Rekọ mẹ riẹ kẹ omamẹ nọ, mẹ ọvo mẹ sai ru inwene nana ha ababọ obufihọ. Fikiere mẹ tẹ kake lẹ se Jihova Ọghẹnẹ jẹ yare nọ jọ o fiobọhọ kẹ omẹ. Kẹsena me te kere se uwou ogha Isẹri Jihova nọ o rrọ America inọ mẹ gwọlọ ohwo nọ o re wuhrẹ Ebaibol kugbe omẹ. Uwou ogha u te ru ọruẹrẹfihotọ re ohwo jọ nọ ọ rrọ ukoko nọ o kẹle omẹ ọ nyaze ti fiobọhọ kẹ omẹ. Oke yena, otu nọ o wuzou uwou-odi a kuvẹ hẹ re omọfa nọ ọ rrọ ohwo uviuwou mẹ hẹ ọ nyaze te ruẹ omẹ. Fikiere, Osẹri Jihova jọ evaọ ukoko nọ o kẹle omai o te je vi ileta uduotahawọ se omẹ, gbe ebe nọ a kere no Ebaibol ze. Enana i fiobọhọ kẹ omẹ gbaemu nọ me re gine nwene.

Enwene ologbo jọ nọ me ru họ, mẹ jiroro nọ me re siomano utu ugbarugba nọ mẹ rrọ anwọ ikpe buobu ze na. Ọnọ o wuzou utu ugbarugba mai na ọ jọ uwou-odi na re. Fikiere nọ ma jọ arozaha oma-urujaja ẹdẹjọ, mẹ tẹ vuẹe nọ mẹ gwọlọ zihe ruọ Osẹri Jihova. U gbe omẹ unu gaga nọ ọ kpahe kẹ omẹ inọ: “Ru ere, otẹrọnọ uzẹme whọ be ta na. Mẹ rẹ sae whaha oreva Ọghẹnẹ hẹ. Rekọ otẹrọnọ whọ be fake gwọlọ no utu na, whọ riẹ oware nọ u re noi ze.”

Etoke ikpe ivẹ nọ i lele i rie, ahwo nọ a be rẹrote uwou-odi na a tẹ be jọ omamẹ muẹrohọ emamọ inwene. Onana u te ru nọ a jẹ rọ kẹ omẹ uvẹ eware jọ vi epaọ anwẹdẹ. Wọhọ oriruo, a gbe je fi egbregba họ omẹ abọ họ nọ a te bi su omẹ no uwou-odi nyae họ. Ọzae jọ nọ o je rou omai ọ tubẹ nyabru omẹ ze ẹdẹjọ jẹ tuduhọ omẹ awọ nọ, mẹ ruabọhọ inwene nọ me bi ru na. Ukpe urere nọ mẹ jọ uwou-odi na, ahwo nọ a wuzou na a rehọ omẹ kpohọ oria ofa jọ kẹle uwou-odi na nọ a rẹ jọ fiẹrohọ ohwo tere he. Kẹsena a te ti siobọno omẹ evaọ 2004 jẹ rọ omoto nọ ọ rẹ wọ ahwo uwou-odi wọ omẹ zihe kpobọ Mexico. Ikpe ikpe mẹ jọ uwou-odi.

Nọ me te Mexico, mẹ tẹ gwọlọ Ọgwa Uvie Isẹri Jihova. Ewu uwou-odi me fihọ kpohọ ewuhrẹ ọsosuọ nọ mẹ nya, keme ewu nọ ọ dina woma evaọ usu iwu mẹ kpobi ọye. Dede nọ ewu nọ me fihọ gbe oghẹrẹ nọ oma mẹ o jọ u woma ha, Isẹri Jihova a dede omẹ rehọ ziezi. Uwowou nọ a dhesẹ kẹ omẹ u ru udu te omẹ otọ, je ru omẹ riẹ nọ Ileleikristi uzẹme mẹ rrọ kugbe no na. (Jọn 13:35) Nọ ewuhrẹ na o kuhọ no, ekpako ukoko na a te ru ọruẹrẹfihotọ nọ ohwo jọ ọ rẹ hae rọ nyaze ti wuhrẹ Ebaibol na kugbe omẹ. Mẹ họ-ame ukpe nọ u lele i rie, koyehọ Azie 3, 2005. Enẹ me ro zihe ruọ Osẹri Jihova.

Evaọ Ọvo 2007 me te zihe ruọ ọgbodibo oke-kpobi, koyehọ Osẹri Jihova nọ ọ rẹ rọ euwa udhosa gbikpe wuhrẹ amọfa Ebaibol na kamara kamara. Kẹsena evaọ 2011, me te kpohọ Isukulu Ebaibol Rọkẹ Inievo-Emezae nọ E re Rọo Ho (nọ a bi se Isukulu Rọkẹ Etausiuwoma Uvie Na enẹna). Isukulu nana i fiobọhọ kẹ omẹ gaga nọ mẹ be sai ro iruo sa-sa nọ a kẹ omẹ evaọ ukoko na.

Enẹna, o be were omẹ re me wuhrẹ amọfa epanọ a rẹ rọ rria dhedhẹ

Evaọ 2013, mẹ avọ Pilar aye oyoyou mẹ na ma tẹ ruọ orọo. Ọ rẹ rọ emiehwẹ ta nọ, o be hae jọ bẹbẹ kẹe re ọ rọwo nọ me gine yeri oghẹrẹ uzuazọ nọ me re gbiku riẹ kẹe na evaọ okenọ u kpemu. Me ri dhesẹ oghẹrẹ uruemu nọ me wo oke ọsosuọ na ẹdẹvo ho. Oghẹrẹ ohwo nọ mẹ rrọ nẹnẹ na, o kẹ omẹ avọ aye mẹ imuẹro gaga inọ Ebaibol na o gine wo ẹgba nọ o re ro nwene ohwo.—Ahwo Rom 12:2.

IRERE NỌ ME WO NO

Ẹme Jesu nọ ọ rrọ Luk 19:10 ọ jọ omamẹ rugba. Jesu ọ ta nọ: “[Mẹ] nyaze te gwọlọ je siwi enọ i vru.” Uzuazọ mẹ u koko oma họ no enẹna. Yọ mẹ gbẹ be họre ahwo ho. Me bi yere Ọghẹnẹ gaga kẹ Ebaibol na. Me bi yeri obọdẹ uzuazọ, yerikugbe amọfa dhedhẹ, yọ mai wuzou na, me wo emamọ usu kugbe Jihova, Ọghẹnẹ nọ ọ kẹ omẹ uzuazọ na.

[ẸME-OBOTỌ]

^ edhe-ẹme 13 Nọ obe nọ Isẹri Jihova a kere, rekọ a gbe bi printi riẹ enẹna ha. Obe nọ a be mai ro wuhrẹ ahwo enẹna họ, Eme Ebaibol na Ọ rẹ Sai Wuhrẹ Omai?