EBAIBOL NA O RE NWENE UZUAZỌ OHWO
Mẹ avọ Ọsẹ Mẹ Ma Ruẹrẹhọ No
UKPE NỌ A YẸ OMẸ: 1954
ORẸWHO MẸ: Philippines
IKU MẸ: Mẹ kwa no uwou fiki ọsẹ nọ ọ jẹ lahiẹ omai
UZUAZỌ MẸ EVAỌ OKENỌ U KPEMU
Ahwo buobu a jẹ hae ziọ ugheriwo evaọ oria jọ nọ ame o re jo hwẹ no igbehru ze nọ o kẹle ẹwho Pagsanjan obọ Philippines. Oria nana ọsẹ mẹ, Nardo Leron ọ jọ whẹro, yọ uviuwou oyogbe o no ze. Ofruriọ egọmeti, otu iporisi, gbe oria iruo riẹ u ru nọ eva e jẹ hae rọ dhae ẹsikpobi.
Ọsẹgboni mẹ a je ru iruo gaga re a sae yọrọ omai emọ eree nọ a yẹ. A jẹ hae kake jọ uwou hu, obọ igbehru a jẹ hae mae jọ be rẹrote ekakọ. Ẹsibuobu, mẹ avọ Rodelio oniọvo-ọmọzae mẹ ma jẹ hae rẹrote omamai, yọ ohọo o jẹ hai kpe omai gaga. Nọ ma jọ emaha, uvẹ nọ ma jẹ hae rọ zaharo o jariẹ tere he. Ọmọ kpobi nọ ọ jọ uwou na te ikpe ihrẹ no o re ru iruo evaọ ọgbọ ekakọ, ọ rẹ wọ owha ibio egbẹgbẹdẹ rọ nya edhere igbehru. Owha na o tẹ gbẹdẹ vi ẹwọ, kọ esi ma re si rie.
Ọsẹ mai ọ jẹ hai kpe omai gaga, rekọ o rẹ mae da omai nọ o te bi kpe oni mai. Ma jẹ hae daoma whaha iẹe, rekọ ma ga tei hi. Mẹ avọ Rodelio ma tẹ lẹlẹ gba ẹgwae inọ ma ti kpe ọsẹ mai no nọ ma tẹ rro ze no. Dodokọ me wo ọsẹ nọ o you omai.
Ukpe nọ ọsẹ mẹ o je kpe omai na u dhe omẹ uzou te epanọ mẹ rọ dhẹ no uwou nọ mẹ jọ ikpe ikpegbene. Iyẹrẹ mẹ jẹ rria evaọ omoke jọ, kẹsena me te mu ige họ evovo. Uwhremu na mẹ tẹ jẹ hae rọ okọ fa ahwo nọ e ziọ ugheriwo kpohọ oria nọ ame o re jo hwẹ no igbehru ze na.
Nọ ikpe jọ e vrẹ no, me te mu yunivasiti họ evaọ Manila. Rekọ fikinọ mẹ jẹ hai zihe kpobọ Pagsanjan kẹ iruo evaọ urere oka kpobi, me je wo uvẹ se obe tere he. Uzuazọ mẹ o tẹ te tahaku no, ige e gbẹ jẹ sai ru omẹ kpairoro vrẹ ebẹbẹ mẹ hẹ. Fikiere me te mu imu egaga iyoma efa họ erehọ, eyehọ methamphetamines, cocaine, gbe heroin. Imu egaga avọ ọfariẹ-ogbe usu, yọ ere o jọ kẹ omẹ. Uvuhu, okienyẹ, gbe uye-oruẹ e da oria kpobi fia. Me mukpahe egọmeti keme o jọ omẹ oma nọ egọmeti ọ wha uye nana kpobi ze na. Mẹ tẹ nọ Ọghẹnẹ nọ, “Fikieme uzuazọ o rọ rrọ enẹ?” Rekọ mẹ jọ egagọ sa-sa nọ mẹ nya no ruẹ uyo na ha. Fikiere mẹ tẹ jẹ rehọ imu egaga efa sa-sa rọ kpairoro.
Evaọ 1972, emọ isukulu a jẹ wọso egọmeti evaọ obọ Philippines. Me kuomagbe utu rai jọ, kẹsena ozighi o te du lahwe. A mu ahwo buobu, emerae jọ nọ i lele i rie a te fi isoja họ oria kpobi.
Uwhremu na mẹ tẹ wariẹ mu iyẹrẹ họ ẹria, fiki ozọ inọ me kuomagbe utu ọwọsuọ na. Re mẹ sae ruẹ ugho nọ mẹ rẹ rọ dẹ imu egaga nọ mẹ jẹ rehọ na, me te mu uji họ etho, kẹsena me te je lele edafe gbe ahwo nọ a no erẹwho efa ze bru-igberẹ re a kẹ omẹ ugho. Mẹ jẹ daezọ uwhu dede he.
Oke nana yọ Isẹri Jihova a bi wuhrẹ Ebaibol na kugbe oni mẹ gbe oniọvo-ọmọzae mẹ ọrọ ọmaha. Onana u ru eva dha ọsẹ mẹ gaga, ọ tẹ mahe ebe rai. Rekọ a seba ghele he, kẹsena a te zihe ruọ Isẹri Jihova.
Ẹdẹjọ, Osẹri Jihova jọ ọ ta ẹme kẹ ọsẹ mẹ kpahe eyaa Ọghẹnẹ nọ e rrọ Ebaibol, inọ oke o be tha nọ a te rọ jọ akpọ na soso ruẹ uvioziẹ. (Olezi 72:12-14) Eyaa nana e were ọsẹ mẹ te epanọ ọ rọ jiroro nọ o re wuhrẹ haro. Nọ ọ kiẹ Ebaibol na, ọ ruẹ nọ orọnikọ Ọghẹnẹ ọ te rọ egọmeti riẹ si okienyẹ notọ ọvo ho rekọ o fi izi họ nọ i re ru ohwo jọ emamọ ọzae gbe emamọ ọsẹ. (Ahwo Ẹfisọs 5:28; 6:4) U gbe kri hi, tei te inievo mẹ nọ i kiọkọ a te zihe ruọ Isẹri Jihova. Fikinọ me thabọ no uwou, mẹ riẹ onana kpobi hi.
EPANỌ EBAIBOL NA O RO NWENE UZUAZỌ MẸ
Evaọ 1978 mẹ tẹ kwa kpobọ Australia. Rekọ evaọ orẹwho nana nọ o jọ dhedhẹ yọ ọruẹriọ ọ dafia na, udu u te omẹ otọ ghele he. Mẹ gbẹ jẹ da idi thomawa, jẹ rehọ imu egaga. Ubrobọ urere ukpe yena, Isẹri Jihova a tẹ nyaze uwou mẹ. Oware nọ a dhesẹ kẹ omẹ evaọ Ebaibol na kpahe akpọ nọ udhedhẹ o te jọ o were omẹ, rekọ mẹ jẹ gwọlọ kuomagbe ai hi.
Nọ omoke jọ o vrẹ no, me te zihe kpobọ Philippines jẹ jọ obei umutho eka jọ. Inievo mẹ a tẹ vuẹ omẹ nọ ọsẹ mai o nwene gaga no, rekọ oware nọ o ru omai na o gbẹ jẹ kẹ omẹ uye gaga, fikiere mẹ tẹ jẹ kẹnoma kẹe.
Oniọvo-ọmọtẹ mẹ ọrọ ọmaha ọ rọ Ebaibol na dhesẹ kẹ omẹ oware nọ uye-oruẹ gbe okienyẹ e rọ vọ akpọ na te enẹ. U gbe omẹ unu gaga epanọ ọmọtẹ ikpe ikpegbọ nọ ọ re riẹ oware ovo ho ọ rọ kuyo enọ mẹ kpobi. Taure me te ti zihe, ọsẹ mẹ ọ tẹ kẹ omẹ obe na, Whọ Sae Ria Bẹdẹ Bẹdẹ eva Aparadase ọ Otọakpọ. a Ọ tẹ vuẹ omẹ nọ: “Whọ gbẹ dhẹ gwọlọ ifue he. Obe nana u ti fiobọhọ kẹ owhẹ ruẹ oware nọ whọ be gwọlọ.” Ọ tẹ ta kẹ omẹ nọ mẹ gwọlọ Isẹri Jihova nọ me te zihe kpobọ Australia.
Me ru lele ẹme nọ ọsẹ mẹ ọ ta na, kẹsena mẹ tẹ ruẹ Ọgwa Uvie Isẹri Jihova kẹle oria nọ mẹ jẹ rria evaọ Brisbane. Mẹ tẹ ta nọ jọ a hai wuhrẹ Ebaibol kugbe omẹ. Eruẹaruẹ Ebaibol wọhọ Daniẹl uzou avọ 7 gbe Aizaya uzou avọ 9 i ru omẹ ruẹ nọ egọmeti Ọghẹnẹ nọ o wo ogbekuo vievie he na o ti su omai evaọ obaro. Me wuhrẹ nọ ma ti wo omaweromẹ evaọ Aparadase otọakpọ. Mẹ gwọlọ nọ Ọghẹnẹ ọ rẹ jẹ omẹ rehọ, rekọ me vuhumu nọ mẹ rẹ kpọ ofu mẹ, whaha imu egaga erehọ gbe udi nọ a rẹ da vrẹ oma, jẹ siọ igberẹ-ibro ba. Mẹ tẹ fa usu no ọmọtẹ nọ ma gbẹ jọ uwou, je siobọno ikpehre eware nọ e reria omẹ obọ no. Nọ me bi fievahọ Jihova vi epaọ anwẹdẹ na, mẹ tẹ lẹ sei re o fiobọhọ kẹ omẹ ru inwene nọ i kiọkọ.
Ẹmẹrera na me te ti vuhumu nọ eware nọ me bi wuhrẹ na e rẹ sai gine nwene ohwo. Ebaibol na ọ ta nọ, ma tẹ daoma ziezi ma sai wo “uruemu okpokpọ.” (Ahwo Kọlọsi 3:9, 10) Nọ mẹ be daoma ru onana, mẹ tẹ ruẹ nọ o sae ginẹ jọnọ ọsẹ mẹ o nwene no wọhọ epanọ me yo na. Ukpenọ mẹ gbẹ dheva kẹe, mẹ tẹ jẹ gwọlọ epanọ me re ro ru udhedhẹ kugbei. Ukuhọ riẹ mẹ tẹ rọvrẹ ọsẹ mẹ, je si omukpahọ nọ me wo kẹe anwọ oke emaha ze no eva.
IRERE NỌ ME WO NO
Nọ mẹ gbẹ jọ uzoge, mẹ jẹ hai lele amọfa yeri uzuazọ nọ o rẹ wha ọraha se ohwo. Unuovẹvẹ Ebaibol na u rugba evaọ omamẹ, ekpehre usu u su omẹ thọ. (1 Ahwo Kọrint 15:33) Rekọ mẹ jọ udevie Isẹri Jihova mu obọdẹ egbẹnyusu nọ a re fievahọ no, yọ a fiobọhọ kẹ omẹ nọ mẹ rọ rrọ emamọ ohwo enẹna. Mẹ tẹ jẹ jọ udevie rai ruẹ Loretta nọ ọ rrọ aye oyoyou mẹ. Mai imava ma be ta kẹ amọfa epanọ Ebaibol na ọ sai ro fiobọhọ kẹ ae.
Nọ mẹ avọ aye mẹ gbe egbẹnyusu mai jọ ma jẹ re emu kugbe
Ebaibol na o fiobọhọ kẹ ọsẹ mẹ zihe ruọ oghẹrẹ ohwo nọ me roro nọ ọ rẹ sae jọ ẹdẹvo ho, ọzae oyoyou ọ rrọ kẹ oni mẹ enẹna, ọ tẹ jẹ rrọ Oleleikristi nọ ọ gwọlọ udhedhẹ je wo omaurokpotọ. Nọ mẹ avọ ọsẹ mẹ ma ruẹ ẹro nọ mẹ họ-ame no evaọ 1987, ọ tẹ gba omẹ. Onana yọ oware nọ o ri ru ẹdẹvo ho anwẹnọ a ro yẹ omẹ!
Ọsẹgboni mẹ a kuomagbe ta usi uwoma Uvie na kẹ amọfa vrẹ ikpe ọgbagbisoi. Uwhremu na a riẹ ọsẹ mẹ wọhọ ọzae nọ o wo osegboja, nọ o wo ọdawẹ, nọ o re fiobọhọ kẹ amọfa. Evaọ etoke nana, me te ti wo adhẹẹ kẹe ziezi je you rie. Eva e tẹ jẹ were omẹ inọ ọsẹ mẹ ọna! O whu evaọ 2016, yọ mẹ rẹ kareghẹhọ iẹe avọ evawere, keme mẹ riẹ nọ mẹ avọ iẹe ma ru inwene ilogbo evaọ uruemu mai fiki ehrẹ Ebaibol nọ ma fihọ iruo. Me gbe mukpahe iẹe vievie he. U te no ere no, eva e be were omẹ gaga nọ me ro duku Jihova Ọghẹnẹ, Ọsẹ obọ odhiwu mẹ nọ ọ ya eyaa inọ o ti ku ebẹbẹ iviuwou kpobi họ.
a Onọ Isẹri Jihova a kere, rekọ a gbe bi printi riẹ hẹ.