U wo emamọ edhere jọ nọ Isẹri Jihova a sai ro wuhrẹ owhẹ Ebaibol na nọ who re ro wo erere noi ze ziezi. Ma te bi wuhrẹ Ebaibol na kugbe owhẹ, u ti fiobọhọ kẹ owhẹ:

•   Wo evawere evaọ uzuazọ

•   Jọ ogbẹnyusu Ọghẹnẹ

•   Wuhrẹ oghẹrẹ nọ Ebaibol na ọ ta nọ akpọ na ọ te jọ evaọ obaro

Evaọ ẹwẹ-obe nana

•  Ẹvẹ a re ru obe-uwuhrẹ Ebaibol?

•  Kọ mẹ te hwa ugho fihọ uwuhrẹ na?

•  Kọ ẹvẹ uwuhrẹ na u re kri te?

•  Oghẹrẹ vẹ me re ro muhọ?

•  Kọ mẹ sai wuhrẹ ẹsiẹvo rọ dawo epanọ uwuhrẹ na o te jọ?

•  Nọ mẹ tẹ rọwo nọ a wuhrẹ Ebaibol na kugbe omẹ, kọ a te gba omẹ họ nọ mẹ rẹ jọ omọvo Isẹri Jihova?

•  Kọ mẹ sai se Ebaibol obọmẹ evaọ oke uwuhrẹ na?

•  Kọ mẹ sai zizie amọfa re a kuomagbe omẹ evaọ uwuhrẹ na?

•  Kọ otẹrọnọ Isẹri Jihova a je wuhrẹ Ebaibol na kugbe omẹ evaọ oke jọ nọ o vrẹ, mẹ sae wariẹ muhọ?

•  Kọ wha wo idhere efa nọ ohwo ọvo ọ sai ro wuhrẹ omobọ riẹ Ebaibol na?

 Ohwo jọ o ti fiobọhọ kẹ owhẹ re whọ riẹ eware nọ e rrọ evaọ Ebaibol na, yọ no uzoẹme ruọ uzoẹme wha ti ro ru onana. Obe nọ uzoẹme riẹ o rrọ Reawere Uzuazọ Bẹdẹ Bẹdẹ! wha ti ro ru onana. Whọ te rọ ẹmẹrera jọ obe nana wuhrẹ oware nọ Ebaibol na ọ ta gbe epanọ o sai ro fiobọhọ kẹ owhẹ evaọ uzuazọ. Iviena rri ividio nana re whọ riẹ eware efa.

 Ijo. Oware nọ Jesu ọ ta kẹ ilele riẹ nọ a ru oye ma bi lele. Ọ ta nọ: “Ọvọvẹ a kẹ owhai, wha kẹ ọvọvẹ.” (Matiu 10:8) Ma be hwa ahwo mai nọ a bi wuhrẹ amọfa Ebaibol na osa ha. Yọ ma re mi owhẹ ugho tao ho re ma tẹ te kẹ owhẹ Ebaibol hayo obe Reawere Uzuazọ Bẹdẹ Bẹdẹ! na.

 Iwuhrẹ hayo izoẹme udhosa (60) e rrọ oma uwuhrẹ na soso. Whẹ ọvo whọ sae jiroro epanọ wha re wuhrẹ kri te. Rekọ ahwo buobu a rẹ gwọlọ nọ a wuhrẹ uzoẹme soso re evaọ ẹkpoka hayo bu vrẹ ere.

1.  1. Kere eme fihọ efọmo na evaọ jw.org. Oware nọ ma te rehọ evuẹ ra nọ who ti kere fihọ etẹe na ru kpobi họ, ma ti ru re ohwo jọ o se hayo nyabru owhẹ ze wọhọ epanọ whọ yare na.

2.  2. Ohwo nọ o ti wuhrẹ owhẹ o ti se hayo nyabru owhẹ ze. Ohwo nọ o ti wuhrẹ owhẹ na ọ te vuẹ owhẹ epanọ uwuhrẹ nọ o te kẹ owhẹ erere na o te jọ. Ọ te jẹ kẹ uyo onọ kpobi nọ who wo.

3.  3. Te owhẹ te ohwo nọ o ti wuhrẹ owhẹ na, wha te jiroro epanọ wha ti ro ru ei. Wha sai wuhrẹ ovao-dhe-ovao, hayo evaọ ifonu, use nọ a rẹ jọ ruẹ ohwo evaọ ividio (video call), ileta nọ a re kere se ohwohwo, hayo email. Oware wọhọ auwa ọvo uwuhrẹ ọvuọvo u re kri te, rekọ uwuhrẹ na o sae kpẹre hayo theri vrẹ ere wọhọ epanọ who wo oke te.

 Ee. Whọ sai kere eme fihọ efọmo nọ ọ rrọ jw.org na. Okenọ ohwo nọ o ti wuhrẹ owhẹ o te se owhẹ hayo nyabru owhẹ ze, whọ sae ta kẹe inọ whọ gwọlọ wuhrẹ ẹsiẹvo rọ dawo epanọ uwuhrẹ na o te jọ sọ o te were owhẹ. Ọyomariẹ ọ te rehọ ibroshọ Reawere Uzuazọ Bẹdẹ Bẹdẹ! na nọ u wo iwuhrẹ esa ro muhọ kugbe owhẹ re whọ ruẹ sọ uwuhrẹ na o te were owhẹ.

 Ijo. O rẹ were omai Isẹri Jihova re ma wuhrẹ ahwo Ebaibol na, rekọ ma rẹ gba ohwo ọvo họ vievie he re o kuomagbe egagọ mai. Ukpoye, ma rẹ rọ adhẹẹ vuẹ ohwo oware nọ Ebaibol na ọ ta, keme ma riẹ nọ ohwo kpobi o wo udu nọ ọ rẹ rọ salọ oware nọ ọ rẹ rọwo.​—1 Pita 3:15.

 Ee. Whọ sai se Ebaibol kpobi nọ u je owhẹ. O make rọnọ o rẹ were omai re ma se Ebaibol Efafa Akpọ Ọkpokpọ ọrọ Ikereakere Efuafo Na fikinọ ọ rrọ vevẹ jẹ rrọ gbagba na, ma riẹ nọ ahwo buobu a rẹ gwọlọ se Ebaibol nọ a mae riẹ.

 Ee. Whọ sai zizie uviuwou ra soso gbe egbẹnyusu ra nọ i je owhẹ re a kuomagbe owhẹ evaọ uwuhrẹ na.

 Ee. Uzẹme riẹ họ, obe okpokpọ nọ ma bi ro wuhrẹ ahwo obọnana o te lẹliẹ uwuhrẹ na were owhẹ vi epanọ o jọ evaọ okenọ u kpemu keme a kere i rie evaọ oghẹrẹ nọ o rẹ mai ro fiobọhọ kẹ ahwo evaọ oke mai nana. O wo iwoho gbe ividio vi ebe nọ ma je ro wuhrẹ ahwo anwẹdẹ. Yọ whọ te ruẹ nọ o wọhọ epaọ imava nọ e be ta ẹme kugbe.

 Ee. Dede nọ o rẹ mae lọhọ kẹ ahwo buobu re a wuhrẹ ziezi nọ ohwo jọ o te bi fiobọhọ kẹ ae, o rẹ mae were ahwo jọ re ae ọvo a mu omobọ rai họ ewuhrẹ tao. Ma jọ oria Eware Uwuhrẹ Ebaibol nọ o rrọ oria Itanẹte mai nana wo eware sa-sa nọ whọ sai ro wuhrẹ Ebaibol na, yọ aikpobi ọvọvẹ. Eria nana nọ i wo izoẹme sa-sa na họ:

•   Online Bible Study Lessons (Uwuhrẹ Ebaibol Evaọ Itanẹte). Evaọ iwuhrẹ nana nọ e wọhọ epaọ imava nọ e be ta ẹme kugbe na, whọ te ruẹ iyo enọ jọ nọ i wuzou gaga evaọ uzuazọ. Enọ wọhọ: Ono họ Ọghẹnẹ? Fikieme ma be rọ ruẹ uye, emuemu ọ tẹ jẹ rrọ akpọ na? Kọ Ọghẹnẹ o ti ku uye-oruẹ họ ẹdẹ jọ?

•   Ividio nọ A Ru No Ebaibol Ze. A jọ ividio ekpẹkpẹe nana ta ẹme kpahe iwuhrẹ Ebaibol nọ i wuzou.

•   Enọ nọ Ebaibol Ọ Kẹ Iyo Rai. A jọ etenẹ na kẹ iyo enọ buobu nọ i wobọ kugbe Ebaibol na.

•   Eria Ebaibol nọ A Ru Vẹ. Who ti wuhrẹ otofa eme nọ e rrọ eria Ebaibol jọ nọ ahwo a riẹ gaga.