Okẹ unevaze ma bi ro ru iruo usiuwoma ota mai, yọ obọ Isẹri Jihova igho nana e be mai no ze. Ma rẹ jọ oria iwuhrẹ mai mi azọhọ họ, yọ ma rẹ hwa abọvo-abakpe he. (Matiu 10:7, 8) Ukpoye, ma wo ekpẹti nọ ma re fi okẹ unevaze fihọ evaọ eria egagọ mai. A re woro odẹ ohwo nọ ọ kẹ okẹ hẹ, yọ a re kere odẹ fihọ okẹ hẹ.

Oware jọ nọ u bi fiobọhọ kẹ omai ruẹ ugho ru oware nọ ma gwọlọ ru họ, ma wo isu-egagọ nọ ma rẹ hwosa ha. U te no ere no, a rẹ hwa Isẹri Jihova osa ha rọkẹ usiuwoma ota n’uwou ruọ uwou, yọ iwou egagọ mai e rẹ rro gahrọ họ.

Igho kpobi nọ a ro ru okẹ unevaze nọ a vi kpohọ uwou ogha Isẹri Jihova, a rẹ rehọ ae fiobọhọ kẹ ahwo nọ eware okpẹtu e via kẹ, je ro fiobọhọ kẹ imisiọnare mai gbe esẹro jọ evaọ ukoko Isẹri Jihova nọ i re no ikoko ruọ ikoko nyai fiobọhọ kẹ inievo mai, yọ a rẹ jẹ rọ igho na bọ iwou egagọ mai evaọ erẹwho nọ igho e rrọ tere he, je printi Ebaibol gbe ebe mai efa.

Omomọvo ọ rẹ jiroro kẹ omariẹ sọ o re ru unevaze rọkẹ ẹruorote ọgwa uvie, rọkẹ iruo akpọ-soso, hayo rọkẹ ivẹ na. Ukoko kpobi o rẹ niyẹrẹ noke toke kẹ ahwo nọ a rrọ ukoko na kpahe oware nọ a rehọ ugho unevaze na ru.