Kpohọ eme nọ e riẹ eva

Kọ Ohwo Ọ Sai No Egagọ Isẹri Jihova kẹ Omariẹ?

Kọ Ohwo Ọ Sai No Egagọ Isẹri Jihova kẹ Omariẹ?

 Ee. Ohwo ọ sai no egagọ Isẹri Jihova kẹ omariẹ evaọ idhere ivẹ:

  •   Ọ sae kere obe hayo rọ unu tae. Ohwo ọ rẹ sai kere ileta hayo rọ unu ta nọ ọ gbẹ gwọlọ jọ Osẹri Jihova ha.

  •   Uruemu ohwo. Ohwo ọ rẹ sai ru oware nọ u dhesẹ nọ ọ gbẹ gwọlọ jọ Osẹri Jihova ha. (1 Pita 5:9) Wọhọ oriruo, ọ sai kuomagbe egagọ ọfa je dhesẹ via vevẹ inọ egagọ yena ọ gwọlọ jọ enẹna.​—1 Jọn 2:19.

Kọ ẹvẹ kpahe ohwo nọ ọ gbẹ be ta usi uwoma ha yọ o bi kpohọ iwuhrẹ Isẹri Jihova ha? Kọ a re rri ohwo yena wọhọ ohwo nọ o no egagọ Isẹri Jihova no?

 Ijo, ma re rri rie ere he. Re ohwo o no egagọ na kẹ omariẹ u wo ohẹriẹ no ohwo nọ ẹrọwọ riẹ o bi whrehe no. Evaọ ẹsibuobu, ahwo nọ a gbe bi kpohọ iwuhrẹ tere he hayo nọ a seba no evaọ omoke jọ yọ ahwo nọ udu u whrehe no orọnikọ a siọ orọwọ rai no ho. Ma rẹ daoma tuduhọ ahwo otiọye na awọ viukpenọ ma re le ae no oma. (1 Ahwo Tẹsalonika 5:14; Jud 22) Otẹrọnọ ohwo na ọ gwọlọ obufihọ, ekpako ukoko na họ ahwo nọ a rẹ mai fiobọhọ kẹe re ọ wariẹ kruga.​—Ahwo Galesha 6:1; 1 Pita 5:1-3.

 O make rrọ ere na, ekpako na a wo udu nọ a rẹ rọ gba ohwo ọvo họ họ nọ ọ tẹ gwọlọ no egagọ Isẹri Jihova. Ohwo kpobi o wo udu nọ ọ rẹ rọ jiroro kẹ omobọ riẹ kpahe egagọ nọ ọ gwọlọ jọ. (Joshua 24:15) Ma riẹ nọ ohwo kpobi nọ ọ be gọ Ọghẹnẹ o re ru ere no udu ze.​—Olezi 110:3; Matiu 22:37.