Kpohọ eme nọ e riẹ eva

Fikieme Isẹri Jihova A ro Nwene Iwuhrẹ Rai Jọ?

Fikieme Isẹri Jihova A ro Nwene Iwuhrẹ Rai Jọ?

 No otọ avọ otọ ze, Ebaibol na ma rẹ rehọ iwuhrẹ mai no ze, fikiere nọ oghẹrẹ nọ ma wo otoriẹ Ikereakere na u te vẹ vi epanọ o jọ, ma re nwene eware jọ nọ ma rọwo. a

 Inwene itienana e rọwokugbe ẹme nọ Ebaibol na ọ ta evaọ obe Itẹ 4:18 inọ: “Edhere ikiẹrẹe na ọ wọhọ elo ohiohiẹ nọ ọ rẹ rọ ẹmẹrera dhe evevẹ, bẹsenọ uvo o rẹ bẹre ze ziezi.” Wọhọ epanọ eria kpobi o re vẹ nọ ọre ọ tẹ be va ze na, ere ọvona Ọghẹnẹ ọ rẹ rọ ẹmẹrera fiobọhọ kẹ omai re ma wo otoriẹ uzẹme na vẹvẹ evaọ ẹruoke riẹ. (1 Pita 1:10-12) Wọhọ epanọ a ruẹaro riẹ evaọ Ebaibol na, Ọghẹnẹ o bi rovie uzẹme na via kpata kpata evaọ “oke urere na.”​—Daniẹl 12:4.

 Nọ oghẹrẹ nọ ma wo otoriẹ Ikereakere na u te nwene, u re gbe omai unu hu yọ o rẹ kẹ omai uye gbe he. Evaọ oke anwae, idibo Ọghẹnẹ a wo eriwo ọthọthọ re, yọ a ru inwene.

  •   Mosis ọ jẹ gwọlọ nọ o re siwi orẹwho Izrẹl ikpe 40 taure oke Ọghẹnẹ o te ti te.​—Iruẹru Ikọ 7:23-25, 30, 35.

  •   Evaọ oke ọsosuọ, ikọ Jesu a wo otoriẹ eruẹaruẹ nọ e ta kpahe uwhu gbe ẹkparomatha Mesaya na ha.​—Aizaya 53:8-12; Matiu 16:21-23.

  •   Ileleikristi ikpe-udhusoi ọsosuọ jọ a wo eriwo ọthọthọ kpahe okenọ “ẹdẹ Jihova” ọ te rọ ze.​—2 Ahwo Tẹsalonika 2:1, 2.

 Uwhremu na, Ọghẹnẹ ọ kpọ eriwo ọthọthọ rai vi, yọ ma lẹ nọ ọ te gbẹ hai ru epọvo na kẹ omai re.​—Jemis 1:5.

a Ma rẹ ko inwene nọ ma ru evaọ oghẹrẹ nọ ma wo otoriẹ Ebaibol na dhere he. Ukpoye, ma re kere ai lahwe nọ ahwo kpobi a rẹ ruẹ vevẹ. Wọhọ oriruo, rri uzoẹme na “Beliefs Clarified” (Iwuhrẹ nọ Ma Ru Vẹ) evaọ uwou-ebe itanẹte mai.