Hoppa beint í efnið

Hoppa í efnisyfirlit

Þú getur lifað að eilífu á jörðinni

Þú getur lifað að eilífu á jörðinni

HVÍLÍKAR FRAMTÍÐARHORFUR! Skapari okkar hefur lofað okkur eilífu lífi hérna á jörðinni. Mörgum finnst þó erfitt að trúa því. Þeir segja að allir deyi fyrr eða síðar og að það sé eðlilegur gangur lífsins. Aðrir trúa að eilíft líf sé mögulegt en ekki hér á jörð. Þeir trúa að fólk hljóti eilíft líf þegar það deyr og fer til himna. Hvað heldur þú?

Áður en þú svarar því gætir þú hugleitt svör Biblíunnar við þessum þrem spurningum: Hvað var maðurinn gerður til að lifa lengi? Hver var upphafleg fyrirætlun Guðs með mannkynið og jörðina? Hvers vegna deyr fólk?

MAÐURINN ER EINSTAKUR

Maðurinn er einstök sköpun í lífríki jarðar. Hvernig? Biblían segir að aðeins maðurinn hafi verið skapaður í „mynd“ Guðs. (1. Mósebók 1:26, 27) Það þýðir að manninum voru gefnir eiginleikar sem endurspegla eiginleika Guðs svo sem kærleika og réttlæti.

Þar að auki var manninum gefinn hæfileiki til að rökhugsa og þekkja rétt frá röngu auk löngunar til að eignast samband við Guð. Við veltum fyrir okkur mikilleika alheimsins og öðrum undrum sköpunarverksins. Við höfum líka unun af tónlist, ljóðum og annarri list. Og maðurinn er umfram allt fær um að tilbiðja skapara sinn. Slíkir eiginleikar gera manninn frábrugðinn öllum öðrum lifandi verum á jörðinni.

Hefði Guð gefið okkur alla þessa einstöku eiginleika og að því er virðist takmarkalausa möguleika á að þroska þá og efla ef hann ætlaði okkur einungis að lifa í stuttan tíma? Sannleikurinn er sá að Guð hefur gefið okkur þessa einstöku eiginleika til þess að við getum notið lífsins að eilífu hér á jörðinni.

UPPHAFLEG FYRIRÆTLUN GUÐS

Sumir segja að Guð hafi aldrei ætlað manninum að lifa á jörðinni að eilífu. Þeir halda því fram að jörðin hafi verið gerð til þess að vera tímabundið heimili, staður þar sem menn yrðu reyndir og þeir sem stæðust prófið fengju að lifa með Guði að eilífu á himnum. En væri Guð þá ekki ábyrgur fyrir allri illskunni og því slæma sem gerist á jörðinni? Það væri í algerri mótsögn við eiginleika hans. Biblían lýsir Guði á þennan hátt: „Allir hans vegir [eru] réttlátir. Hann er trúfastur  Guð og svikalaus, réttlátur og hreinlyndur.“ – 5. Mósebók 32:4.

Biblían segir skýrt frá upphaflegri fyrirætlun Guðs með jörðina: „Himinninn er himinn Drottins en jörðina gaf hann mannanna börnum.“ (Sálmur 115:16) Guð gerði jörðina til þess að vera fagurt, varanlegt heimili fyrir manninn og hann fyllti jörðina öllu sem við þurfum til að geta lifað innihaldsríku lífi að eilífu. – 1. Mósebók 2:8, 9.

„Himinninn er himinn Drottins en jörðina gaf hann mannanna börnum.“ – Sálmur 115:16.

Tilgangur Guðs með mannkynið kemur líka skýrt fram í Biblíunni. Hann sagði við fyrstu mannhjónin: „Fyllið jörðina, gerið ykkur hana undirgefna og ríkið yfir ... öllum dýrum sem hrærast á jörðinni.“ (1. Mósebók 1:28) Þau fengu þann heiður að fá að annast paradísina sem þau bjuggu í og áttu að stækka hana þar til hún næði um allan heim. Adam, Evu og afkomendum þeirra stóð ekki til boða umbun á himnum heldur eilíft líf á jörðinni.

HVERS VEGNA DEYJUM VIÐ?

En af hverju deyjum við þá? Í Biblíunni lesum við að einn af englum Guðs, síðar kallaður Satan djöfullinn, hafi gert uppreisn og reynt að eyðileggja fyrirætlun Guðs í Edengarðinum. Hvernig gerði hann það?

Satan fékk Adam og Evu, forfeður okkar, til liðs við sig í uppreisn gegn Guði. Satan hélt því fram að Guð væri að meina þeim um eitthvað gott – réttinn til að ákveða sjálf hvað sé rétt og hvað sé rangt. Þau ákváðu að fylgja Satan að máli og snúa baki við Guði. Hver var afleiðingin? Þau dóu að lokum, rétt eins og Guð hafði sagt. Þar með glötuðu þau voninni um að lifa að eilífu í Paradís á jörð. – 1. Mósebók 2:17; 3:1-6; 5:5.

Uppreisn Adams og Evu hefur haft slæmar afleiðingar fyrir alla menn allt fram til okkar daga. Í orði Guðs segir: „Syndin kom inn í heiminn með einum manni [Adam] og dauðinn með syndinni. Þannig er dauðinn runninn til allra manna.“ (Rómverjabréfið 5:12) Við deyjum því ekki vegna fyrirfram ákveðinnar og óskiljanlegrar áætlunar Guðs heldur vegna þess að við erfðum synd og dauða frá foreldrum mannkyns.

ÞÚ GETUR LIFAÐ AÐ EILÍFU Á JÖRÐINNI

Uppreisnin í Edengarðinum kom ekki í veg fyrir að upphafleg fyrirætlun Guðs með mannkynið og jörðina næði fram að ganga. Fullkomin réttlætiskennd og kærleikur fékk Guð til að finna leið til þess að leysa okkur úr fjötrum syndar og dauða. Páll postuli sagði: „Laun syndarinnar er dauði en náðargjöf Guðs er eilíft líf í Kristi Jesú, Drottni vorum.“ (Rómverjabréfið 6:23) Í kærleika sínum „gaf [Guð] einkason sinn [Jesú Krist] til þess að hver sem á hann trúir glatist ekki heldur hafi eilíft líf“. (Jóhannes 3:16) Með því að bjóða sig fúslega fram sem lausnarfórn, endurheimti Jesús allt það sem Adam glataði. *

Bráðlega verður loforð Guðs um paradís á jörð að veruleika. Þú getur öðlast þessa framtíðarvon ef þú tekur til þín þessi orð Jesú: „Gangið inn um þrönga hliðið. Því að vítt er hliðið og vegurinn breiður sem liggur til glötunar og margir þeir sem þar fara inn. Hve þröngt er það hlið og mjór sá vegur er liggur til lífsins og fáir þeir sem finna hann.“ (Matteus 7:13, 14) Framtíð þín er í þínum höndum. Hvað ætlar þú að gera?

^ gr. 17 Hægt er að fá frekari upplýsingar um hvaða gagn við getum haft af lausnargjaldinu í 5. kafla bókarinnar Hvað kennir Biblían? Bókin er gefin út af Vottum Jehóva og er fáanleg á www.jw.org/is.