Matteus 9:1–38

  • Jesús læknar lamaðan mann (1–8)

  • Jesús kallar Matteus (9–13)

  • Spurning um föstu (14–17)

  • Dóttir Jaírusar; kona snertir yfirhöfn Jesú (18–26)

  • Jesús læknar blinda og mállausa (27–34)

  • Uppskeran mikil en verkamennirnir fáir (35–38)

9  Hann steig um borð í bátinn, hélt yfir vatnið og kom til heimaborgar sinnar.  Þá komu menn til hans með lamaðan mann á börum. Þegar Jesús sá trú þeirra sagði hann við lamaða manninn: „Hertu upp hugann, barnið mitt. Syndir þínar eru fyrirgefnar.“  Nokkrir fræðimenn hugsuðu með sér: „Maðurinn guðlastar.“  Jesús vissi hvað þeir voru að hugsa og sagði: „Hvers vegna hugsið þið illt í hjörtum ykkar?  Hvort er auðveldara að segja: ‚Syndir þínar eru fyrirgefnar,‘ eða: ‚Stattu upp og gakktu‘?  En til að þið vitið að Mannssonurinn hefur vald á jörð til að fyrirgefa syndir ...“ og síðan segir hann við lamaða manninn: „Stattu upp, taktu börurnar og farðu heim.“  Hann stóð þá upp og fór heim til sín.  Þegar fólkið sá þetta varð það óttaslegið og lofaði Guð sem gaf mönnum slíkt vald.  Á leið sinni þaðan kom Jesús auga á mann sem hét Matteus en hann sat á skattheimtustofunni. Jesús sagði við hann: „Fylgdu mér.“ Hann stóð þá upp og fylgdi honum. 10  Síðar, þegar Jesús var að borða* í húsi hans, komu margir skattheimtumenn og syndarar og borðuðu* með honum og lærisveinum hans. 11  En þegar farísearnir sáu það sögðu þeir við lærisveinana: „Af hverju borðar kennari ykkar með skattheimtumönnum og syndurum?“ 12  Jesús heyrði þetta og sagði: „Heilbrigðir þurfa ekki á lækni að halda heldur þeir sem eru veikir. 13  Farið og hugleiðið hvað þetta merkir: ‚Ég vil sjá miskunnsemi en ekki fórnir.‘ Ég kom ekki til að kalla réttláta heldur syndara.“ 14  Lærisveinar Jóhannesar komu þá til hans og spurðu: „Hvers vegna föstum við og farísearnir en lærisveinar þínir ekki?“ 15  Jesús svaraði þeim: „Vinir brúðgumans hafa varla ástæðu til að syrgja meðan brúðguminn er hjá þeim. En sá dagur kemur að brúðguminn verður tekinn frá þeim og þá fasta þeir. 16  Enginn saumar bót af óþæfðu efni á gamla flík því að nýja bótin hleypur og rifan á flíkinni verður þá enn stærri. 17  Menn láta ekki heldur nýtt vín á gamla vínbelgi. Ef það er gert springa þeir, vínið fer til spillis og belgirnir eyðileggjast. Menn láta öllu heldur nýtt vín á nýja belgi og þá varðveitist hvort tveggja.“ 18  Meðan Jesús var að segja þeim þetta kom forstöðumaður nokkur, kraup fyrir honum* og sagði: „Dóttir mín er vafalaust dáin núna en komdu og leggðu hönd þína yfir hana, þá lifnar hún aftur.“ 19  Jesús stóð þá upp og fór með honum ásamt lærisveinunum. 20  Kona sem hafði haft stöðugar blæðingar í 12 ár kom nú að honum aftan frá og snerti kögrið á yfirhöfn hans 21  því að hún hugsaði með sér: „Ef ég aðeins snerti yfirhöfn hans læknast ég.“ 22  Jesús sneri sér við og þegar hann kom auga á hana sagði hann: „Hertu upp hugann, dóttir. Trú þín hefur læknað þig.“ Og konan varð samstundis heil heilsu. 23  Jesús kom nú í hús forstöðumannsins og sá flautuleikarana og fólkið í uppnámi. 24  Þá sagði hann: „Farið út. Stúlkan er ekki dáin heldur sofandi.“ Fólkið hló þá að honum. 25  Um leið og fólkið var farið út gekk hann inn til stúlkunnar og tók um hönd hennar og hún reis á fætur. 26  Fréttirnar af þessu bárust að sjálfsögðu út um allt héraðið. 27  Þegar Jesús fór þaðan eltu hann tveir blindir menn og kölluðu: „Miskunnaðu okkur, sonur Davíðs.“ 28  Jesús fór inn í hús og blindu mennirnir komu til hans. Hann spurði þá: „Trúið þið að ég geti læknað ykkur?“ Þeir svöruðu: „Já, Drottinn.“ 29  Þá snerti hann augu þeirra og sagði: „Verði ykkur að trú ykkar,“ 30  og þeir fengu sjónina. Jesús gaf þeim síðan þessi ströngu fyrirmæli: „Gætið þess að enginn fái að vita þetta.“ 31  En þegar þeir voru komnir út sögðu þeir frá honum úti um allt héraðið. 32  Þegar þeir voru að fara kom fólk til hans með mállausan mann sem var haldinn illum anda. 33  Eftir að illi andinn hafði verið rekinn út gat mállausi maðurinn talað. Mannfjöldinn var furðu lostinn og sagði: „Aldrei hefur nokkuð þessu líkt sést í Ísrael.“ 34  En farísearnir sögðu: „Hann rekur út illu andana með hjálp höfðingja illu andanna.“ 35  Jesús fór nú um allar borgirnar og þorpin og kenndi í samkunduhúsum, boðaði fagnaðarboðskapinn um ríkið og læknaði fólk af hvers kyns sjúkdómum og meinum. 36  Þegar hann sá mannfjöldann kenndi hann í brjósti um fólkið því að það var hrjáð og hrakið eins og sauðir án hirðis. 37  Hann sagði þá við lærisveinana: „Uppskeran er mikil en verkamennirnir fáir. 38  Biðjið því herra uppskerunnar að senda verkamenn til uppskeru sinnar.“

Neðanmálsgreinar

Eða „lá til borðs“.
Eða „lágu til borðs“.
Eða „sýndi honum lotningu“.