Matteus 24:1–51

  • TÁKN UM NÆRVERU KRISTS (1–51)

    • Stríð, hungursneyðir, jarðskjálftar (7)

    • Boða þarf fagnaðarboðskapinn (14)

    • Mikil þrenging (21, 22)

    • Tákn Mannssonarins (30)

    • Fíkjutréð (32–34)

    • Eins og dagar Nóa (37–39)

    • Haldið vöku ykkar (42–44)

    • Trúi þjónninn og illur þjónn (45–51)

24  Jesús var á leið frá musterinu þegar lærisveinarnir komu til hans og sýndu honum byggingar musterisins.  Þá sagði hann: „Sjáið þið allt þetta? Trúið mér, hér mun ekki standa steinn yfir steini heldur verður allt rifið niður.“  Meðan hann sat á Olíufjallinu og lærisveinarnir voru einir með honum komu þeir að máli við hann og spurðu: „Segðu okkur, hvenær gerist þetta og hvert verður tákn þess að þú sért nærverandi* og að lokaskeið þessarar heimsskipanar* sé hafið?“  Jesús svaraði þeim: „Gætið þess að láta engan blekkja ykkur  því að margir munu koma í mínu nafni og segja: ‚Ég er Kristur,‘ og blekkja marga.  Þið munuð frétta af stríðsátökum í grennd og í fjarska. Gætið þess að skelfast ekki því að þetta þarf að gerast en endirinn er samt ekki kominn.  Þjóð mun ráðast gegn þjóð og ríki gegn ríki. Það verða hungursneyðir og jarðskjálftar á einum stað eftir annan.  Allt er þetta upphaf fæðingarhríðanna.*  Þá mun fólk ofsækja ykkur og drepa og allar þjóðir munu hata ykkur vegna nafns míns. 10  Margir munu einnig falla frá trúnni og svíkja og hata hver annan. 11  Margir falsspámenn koma fram og blekkja marga 12  og þar sem illskan magnast mun kærleikur flestra kólna. 13  En sá sem er þolgóður* allt til enda mun bjargast. 14  Og fagnaðarboðskapurinn um ríkið verður boðaður um alla jörðina til að allar þjóðir fái að heyra hann, og síðan kemur endirinn. 15  Þegar þið sjáið viðurstyggðina sem veldur eyðingu og Daníel spámaður talar um standa á helgum stað (sá sem les þetta sýni dómgreind) 16  þá flýi þeir sem eru í Júdeu til fjalla. 17  Sá sem er uppi á þaki fari ekki niður til að sækja eigur sínar í húsinu 18  og sá sem er úti á akri snúi ekki aftur til að ná í yfirhöfn sína. 19  Þetta verða skelfilegir dagar fyrir barnshafandi konur og þær sem eru með barn á brjósti. 20  Biðjið að þið þurfið ekki að flýja að vetri til né á hvíldardegi 21  því að þá verður svo mikil þrenging að annað eins hefur ekki gerst frá upphafi heims allt til þessa og gerist aldrei aftur. 22  Ef þessir dagar yrðu ekki styttir myndi enginn bjargast en vegna hinna útvöldu verða þeir styttir. 23  Ef einhver segir við ykkur: ‚Sjáið! Hér er Kristur,‘ eða: ‚Þarna er hann,‘ þá skuluð þið ekki trúa því. 24  Falskristar og falsspámenn munu koma fram og gera mikil tákn og undur til að blekkja jafnvel hina útvöldu ef hægt er. 25  Ég hef varað ykkur við. 26  Ef fólk því segir við ykkur: ‚Hann er í óbyggðunum!‘ þá skuluð þið ekki fara þangað, eða: ‚Hann er innst inni í húsinu!‘ þá trúið því ekki. 27  Nærvera* Mannssonarins verður eins og elding sem leiftrar frá austri til vesturs. 28  Þar sem hræið er þar safnast ernirnir. 29  Strax eftir þrengingu þessara daga mun sólin myrkvast og tunglið ekki skína, stjörnurnar falla af himni og kraftar himnanna nötra. 30  Þá birtist tákn Mannssonarins á himni og allar þjóðir* jarðar harma og kveina, og þær sjá Mannssoninn koma á skýjum himins með mætti og mikilli dýrð. 31  Og hann sendir út engla sína með sterkum lúðurblæstri og þeir safna saman hans útvöldu úr áttunum* fjórum, frá öðrum endimörkum himins til hinna. 32  Lærið af þessari líkingu um fíkjutréð: Um leið og ungu greinarnar mýkjast og laufið springur út vitið þið að sumar er í nánd. 33  Eins skuluð þið vita þegar þið sjáið allt þetta að hann er í nánd, við dyrnar. 34  Trúið mér, þessi kynslóð líður alls ekki undir lok fyrr en allt þetta gerist. 35  Himinn og jörð líða undir lok en orð mín líða alls ekki undir lok. 36  Enginn veit þann dag og stund, hvorki englarnir á himnum né sonurinn heldur aðeins faðirinn. 37  Nærvera* Mannssonarins verður eins og dagar Nóa. 38  Dagana fyrir flóðið átu menn og drukku, kvæntust og giftust fram til þess dags sem Nói gekk inn í örkina, 39  og þeir gáfu engan gaum að því sem var að gerast fyrr en flóðið kom og sópaði þeim öllum burt. Þannig verður við nærveru Mannssonarins. 40  Þá verða tveir menn á akri, annar verður tekinn og hinn skilinn eftir. 41  Tvær konur mala í handkvörn, önnur verður tekin og hin skilin eftir. 42  Haldið því vöku ykkar því að þið vitið ekki hvaða dag Drottinn ykkar kemur. 43  En eitt skuluð þið vita: Ef húseigandinn vissi hvenær um nóttina* þjófurinn kæmi myndi hann vaka og ekki láta brjótast inn í hús sitt. 44  Verið þið sömuleiðis viðbúnir, því að Mannssonurinn kemur þegar þið eigið ekki von á því. 45  Hver er eiginlega hinn trúi og skynsami* þjónn sem húsbóndinn hefur sett yfir vinnuhjú sín til að gefa þeim mat á réttum tíma? 46  Sá þjónn er glaður ef húsbóndi hans sér hann gera það þegar hann kemur. 47  Trúið mér, hann setur hann yfir allar eigur sínar. 48  En ef þjónninn reynist illur og segir í hjarta sínu: ‚Húsbónda mínum seinkar,‘ 49  og hann fer að berja samþjóna sína og borða og drekka með drykkjumönnum, 50  þá kemur húsbóndi hans á degi sem hann á ekki von á og stund sem hann býst ekki við. 51  Hann refsar þá þjóninum harðlega og rekur hann út til hræsnaranna. Þar mun hann gráta og gnísta tönnum.

Neðanmálsgreinar

Sjá orðaskýringar, „nærvera“.
Eða „aldar“. Sjá orðaskýringar.
Eða „hörmunganna; þjáninganna“.
Eða „hefur verið þolgóður“.
Sjá orðaskýringar.
Orðrétt „allir ættbálkar“.
Orðrétt „frá vindunum“.
Sjá orðaskýringar.
Eða „á hvaða næturvöku“.
Eða „hyggni“.