Markús 13:1–37

  • LOKASKEIÐ HEIMSSKIPANAR (1–37)

    • Stríð, jarðskjálftar, hungursneyðir (8)

    • Boða þarf fagnaðarboðskapinn (10)

    • Mikil þrenging (19)

    • Koma Mannssonarins (26)

    • Líking af fíkjutrénu (28–31)

    • Haldið vöku ykkar (32–37)

13  Þegar hann var á leið út úr musterinu sagði einn af lærisveinunum við hann: „Kennari, sjáðu! Hvílíkir steinar og hvílíkar byggingar!“  En Jesús sagði við hann: „Sérðu þessar miklu byggingar? Hér mun ekki standa steinn yfir steini heldur verður allt rifið niður.“  Þegar hann sat á Olíufjallinu með musterið í augsýn og Pétur, Jakob, Jóhannes og Andrés voru einir með honum spurðu þeir hann:  „Segðu okkur, hvenær gerist þetta og hvert verður táknið um að allt þetta sé að líða undir lok?“  Jesús sagði þeim þá: „Gætið þess að láta engan blekkja ykkur.  Margir munu koma í mínu nafni og segja: ‚Ég er hann,‘ og blekkja marga.  Og þegar þið fréttið af stríðsátökum í grennd og í fjarska skuluð þið ekki skelfast. Þetta þarf að gerast en endirinn er samt ekki kominn.  Þjóð mun ráðast gegn þjóð og ríki gegn ríki. Það verða jarðskjálftar á einum stað eftir annan og einnig hungursneyðir. Þetta er upphaf fæðingarhríðanna.*  En þið skuluð gæta ykkar. Menn munu draga ykkur fyrir dómstóla, ykkur verður misþyrmt í samkunduhúsum og þið verðið leiddir fyrir landstjóra og konunga vegna mín, til að bera vitni fyrir þeim. 10  Auk þess þarf fyrst að boða öllum þjóðum fagnaðarboðskapinn. 11  Þegar þeir taka ykkur og draga fyrir rétt hafið þá ekki áhyggjur af því hvað þið eigið að segja. Segið það sem ykkur verður gefið á þeirri stundu því að það eruð ekki þið sem talið heldur heilagur andi. 12  Bróðir mun framselja bróður til dauða og faðir barn sitt, og börn rísa gegn foreldrum sínum og fá þá líflátna. 13  Allir munu hata ykkur vegna nafns míns. En sá sem er þolgóður* allt til enda mun bjargast. 14  En þegar þið sjáið viðurstyggðina sem veldur eyðingu standa þar sem hún á ekki að vera (sá sem les þetta sýni dómgreind) þá flýi þeir sem eru í Júdeu til fjalla. 15  Sá sem er uppi á þaki fari ekki niður og inn í hús sitt til að sækja neitt 16  og sá sem er úti á akri snúi ekki aftur til að ná í yfirhöfn sína. 17  Þetta verða skelfilegir dagar fyrir barnshafandi konur og þær sem eru með barn á brjósti. 18  Biðjið að þetta gerist ekki að vetri til 19  því að þetta verða slíkir þrengingardagar að annað eins hefur ekki gerst allt til þessa síðan Guð byrjaði að skapa og gerist aldrei framar. 20  Ef Jehóva* hefði ekki stytt þessa daga myndi enginn bjargast. En vegna þeirra sem hann hefur útvalið hefur hann stytt þá. 21  Og ef einhver segir við ykkur: ‚Sjáið! Hér er Kristur,‘ eða: ‚Sjáið! Þarna er hann,‘ þá skuluð þið ekki trúa því. 22  Falskristar og falsspámenn munu koma fram og gera tákn og undur til að leiða hina útvöldu afvega ef hægt er. 23  Gætið ykkar því. Ég hef sagt ykkur allt fyrir fram. 24  En á þessum dögum, eftir þessa þrengingu, mun sólin myrkvast og tunglið ekki skína, 25  stjörnurnar falla af himni og kraftarnir á himnum nötra. 26  Þá mun fólk sjá Mannssoninn koma í skýjum með miklum mætti og dýrð. 27  Hann sendir þá út englana og safnar saman sínum útvöldu úr áttunum* fjórum, frá endimörkum jarðar til endimarka himins. 28  Lærið af þessari líkingu um fíkjutréð: Um leið og ungu greinarnar mýkjast og laufið springur út vitið þið að sumar er í nánd. 29  Eins skuluð þið vita þegar þið sjáið þetta gerast að hann er í nánd, við dyrnar. 30  Trúið mér, þessi kynslóð líður alls ekki undir lok fyrr en allt þetta gerist. 31  Himinn og jörð líða undir lok en orð mín líða alls ekki undir lok. 32  Enginn veit þann dag eða stund, hvorki englarnir á himnum né sonurinn heldur aðeins faðirinn. 33  Hafið augun opin, verið vakandi, því að þið vitið ekki hvenær tíminn er kominn. 34  Það er eins og þegar maður fer úr landi og yfirgefur hús sitt. Hann felur þjónum sínum umráðin, hverjum sitt verk að vinna, og segir dyraverðinum að halda vörð. 35  Haldið því vöku ykkar þar sem þið vitið ekki hvenær húsbóndinn kemur, hvort heldur síðla dags, um miðnætti, fyrir dögun* eða snemma morguns, 36  til að hann finni ykkur ekki sofandi þegar hann kemur allt í einu. 37  En það sem ég segi ykkur segi ég öllum: Haldið vöku ykkar.“

Neðanmálsgreinar

Eða „hörmunganna; þjáninganna“.
Eða „hefur verið þolgóður“.
Sjá orðaskýringar.
Orðrétt „frá vindunum“.
Orðrétt „þegar haninn galar“.