Jóhannes 17:1–26

  • Síðasta bæn Jesú með postulunum (1–26)

    • Að kynnast Guði veitir eilíft líf (3)

    • Kristnir menn tilheyra ekki heiminum (14–16)

    • „Orð þitt er sannleikur“ (17)

    • „Ég hef kunngert þeim nafn þitt“ (26)

17  Eftir að hafa sagt þetta leit Jesús til himins og bað: „Faðir, stundin er komin. Veittu syni þínum dýrð til að hann geti gert þig dýrlegan.  Þú hefur fengið honum vald yfir öllum mönnum svo að hann veiti öllum sem þú hefur gefið honum eilíft líf.  Til að hljóta eilíft líf þurfa þeir að kynnast þér,* hinum eina sanna Guði, og þeim sem þú sendir, Jesú Kristi.  Ég hef verið þér til dýrðar á jörðinni með því að ljúka verkinu sem þú fólst mér að vinna.  Og nú, faðir, veittu mér dýrð við hlið þér, þá dýrð sem ég hafði hjá þér áður en heimurinn varð til.  Ég hef opinberað* nafn þitt þeim mönnum sem þú gafst mér úr heiminum. Þeir voru þínir og þú gafst mér þá og þeir hafa haldið* orð þitt.  Núna vita þeir að allt sem þú gafst mér er frá þér  því að ég hef sagt þeim það sem þú sagðir mér. Þeir hafa tekið við því og vita með vissu að ég kom sem fulltrúi þinn og þeir trúa að þú hafir sent mig.  Ég bið fyrir þeim. Ég bið ekki fyrir heiminum heldur fyrir þeim sem þú hefur gefið mér því að þeir eru þínir, 10  og allt mitt er þitt og þitt er mitt og ég hef hlotið heiður meðal þeirra. 11  Ég er ekki lengur í heiminum því að ég kem til þín en þeir eru í heiminum. Heilagi faðir, gættu þeirra vegna nafns þíns sem þú gafst mér, svo að þeir séu eitt* eins og við erum eitt.* 12  Meðan ég var hjá þeim gætti ég þeirra vegna nafns þíns sem þú gafst mér, og ég hef verndað þá og enginn þeirra hefur glatast nema sonur glötunarinnar til að ritningarstaðurinn rættist. 13  En nú kem ég til þín og ég segi þetta í heiminum til að þeir fyllist gleði minni. 14  Ég hef gefið þeim orð þitt en heimurinn hefur hatað þá því að þeir tilheyra ekki heiminum rétt eins og ég tilheyri ekki heiminum. 15  Ég bið þig ekki að taka þá úr heiminum heldur að gæta þeirra fyrir hinum vonda. 16  Þeir tilheyra ekki heiminum rétt eins og ég tilheyri ekki heiminum. 17  Helgaðu* þá með sannleikanum. Orð þitt er sannleikur. 18  Ég sendi þá í heiminn eins og þú sendir mig í heiminn. 19  Ég helga mig fyrir þá svo að þeir séu einnig helgaðir vegna sannleikans. 20  Ég bið ekki aðeins fyrir þeim heldur líka fyrir þeim sem trúa á mig vegna orða þeirra 21  svo að þeir séu allir eitt eins og þú, faðir, ert sameinaður mér og ég sameinaður þér. Þannig séu þeir líka sameinaðir okkur til að heimurinn geti trúað að þú hafir sent mig. 22  Ég hef veitt þeim dýrðina sem þú veittir mér til að þeir séu eitt eins og við erum eitt, 23  ég sé sameinaður þeim og þú sameinaður mér svo að þeir séu fullkomlega sameinaðir.* Þá getur heimurinn séð að þú sendir mig og að þú elskar þá eins og þú elskar mig. 24  Faðir, ég vil að þeir sem þú gafst mér séu hjá mér þar sem ég er, svo að þeir sjái dýrðina sem þú hefur veitt mér því að þú elskaðir mig áður en heimurinn var grundvallaður. 25  Réttláti faðir, heimurinn hefur ekki kynnst þér en ég þekki þig og þeir sem þú gafst mér hafa komist að raun um að þú sendir mig. 26  Ég hef kunngert þeim nafn þitt og mun kunngera það svo að þeir sýni sama kærleika og þú sýndir mér og ég sé sameinaður þeim.“

Neðanmálsgreinar

Eða „afla sér þekkingar um þig“.
Eða „kunngert“.
Eða „hlýtt“.
Eða „samhuga; sameinaðir“.
Eða „samhuga; sameinaðir“.
Eða „Aðgreindu“.
Eða „eitt“.