1. Tímóteusarbréf 6:1–21

  • Þrælar sýni húsbændum sínum virðingu (1, 2)

  • Falskennarar og ást á peningum (3–10)

  • Leiðbeiningar til þjóns Guðs (11–16)

  • Verið rík að góðum verkum (17–19)

  • Gættu þess sem þér er trúað fyrir (20, 21)

6  Þeir sem eru þrælar* skulu sýna eigendum sínum fulla virðingu til að nafni Guðs og kenningu verði aldrei lastmælt.  Og þrælar sem eiga trúaða húsbændur eiga ekki að sýna þeim virðingarleysi bara vegna þess að þeir eru bræður. Þeir ættu að vera enn fúsari að þjóna þeim því að það eru elskaðir trúbræður sem njóta góðs af þjónustu þeirra. Haltu áfram að kenna þetta og áminna um það.  Ef einhver kennir eitthvað annað og er ekki sammála hinum heilnæmu* leiðbeiningum sem koma frá Drottni okkar Jesú Kristi né þeirri kenningu sem sýnir hvernig við eigum að þjóna Guði  þá hefur hann ofmetnast og skilur ekki neitt. Hann er heltekinn af* þrætum og rökræðum um orð. Þetta ýtir undir öfund, erjur, róg,* tortryggni  og stöðugar deilur um smámuni, deilur manna sem hafa spillt hugarfar og skilja ekki lengur sannleikann. Þeir líta á guðræknina sem leið til að hagnast.  Og auðvitað er mikill ávinningur að því að vera guðrækinn ef maður er líka nægjusamur.  Við tókum ekki neitt með okkur inn í heiminn og getum ekki heldur tekið neitt með okkur þaðan.  Ef við höfum mat og fatnað* skulum við því láta okkur það nægja.  En þeir sem ætla sér að verða ríkir falla í freistni og snöru og láta undan alls kyns heimskulegum og skaðlegum girndum sem steypa mönnum í tortímingu og glötun. 10  Ást á peningum er rót alls konar ógæfu. Sökum hennar hafa sumir villst frá trúnni og valdið sjálfum sér* miklum þjáningum. 11  En þú, þjónn Guðs, forðastu þetta. Leggðu heldur rækt við réttlæti, guðrækni, trú, kærleika, þolgæði og mildi. 12  Berstu hinni góðu baráttu trúarinnar. Haltu fast í vonina um eilífa lífið sem þú varst kallaður til og þú vitnaðir um opinberlega í viðurvist margra votta. 13  Ég segi þér frammi fyrir Guði, sem viðheldur öllu lífi, og Kristi Jesú, sem vitnaði með prýði frammi fyrir Pontíusi Pílatusi, 14  að halda boðorðið lýtalaust og óaðfinnanlega þar til Drottinn okkar Jesús Kristur birtist. 15  Hann, hinn hamingjusami og eini valdhafi, birtist þegar tíminn er kominn. Hann er konungur konunga og Drottinn drottna. 16  Hann einn er ódauðlegur og býr í ljósi sem enginn getur nálgast, og enginn maður hefur séð hann né getur séð hann. Honum sé heiður og eilífur máttur. Amen. 17  Segðu* þeim sem eru ríkir í núverandi heimsskipan* að vera ekki hrokafullir* og binda ekki von sína við hverfulan auð heldur við Guð sem sér okkur ríkulega fyrir öllu sem við njótum. 18  Segðu þeim að gera gott, vera ríkir að góðum verkum, vera örlátir og fúsir til að gefa öðrum af því sem þeir eiga. 19  Þannig safna þeir sér öruggum sjóði sem er góð undirstaða fyrir framtíðina svo að þeir geti haldið fast í vonina um hið sanna líf. 20  Tímóteus, gættu þess sem þér var trúað fyrir og hlustaðu ekki á innantómar orðræður sem gera lítið úr því sem er heilagt né á mótsagnir hinnar rangnefndu „þekkingar“. 21  Sumir hafa farið að flíka slíkri þekkingu og snúið baki við trúnni. Megi einstök góðvild Guðs vera með ykkur.

Neðanmálsgreinar

Orðrétt „þrælar undir oki“.
Eða „gagnlegu“.
Eða „hefur sjúklegan áhuga á“.
Eða „lastmæli“.
Eða „húsaskjól“. Orðrétt „það sem skýlir“.
Eða „stungið sjálfa sig út um allt með“.
Eða „Skipaðu“.
Eða „á núverandi öld“. Sjá orðaskýringar.
Eða „miklir með sig“.