1. Þessaloníkubréf 3:1–13

  • Páll bíður óþreyjufullur í Aþenu (1–5)

  • Tímóteus flytur hughreystandi fréttir (6–10)

  • Bæn fyrir Þessaloníkumönnum (11–13)

3  Þegar við* vorum orðnir óþreyjufullir að bíða töldum við best að vera einir eftir í Aþenu  og sendum Tímóteus, bróður okkar og þjón* Guðs við boðun fagnaðarboðskaparins um Krist, til að styrkja ykkur* í trúnni og hughreysta  svo að enginn léti haggast í þessum raunum. Þið vitið sjálf að við getum ekki umflúið þær.*  Þegar við vorum hjá ykkur sögðum við ykkur fyrir að við myndum verða fyrir erfiðleikum og þannig hefur líka farið eins og þið vitið.  Þegar ég þoldi ekki óvissuna lengur sendi ég Tímóteus til að heyra hvort þið væruð enn trúföst því að ég var hræddur um að freistarinn kynni að hafa freistað ykkar og erfiði okkar væri orðið til einskis.  En nú er Tímóteus nýkominn frá ykkur með gleðilegar fréttir af trúfesti ykkar og kærleika. Hann segir að þið minnist okkar ávallt með hlýju og að þið þráið að sjá okkur eins og við þráum að sjá ykkur.  Þess vegna, bræður og systur, hafið þið með trúfesti ykkar verið okkur til hughreystingar í öllum þjáningum* okkar og raunum.  Við fáum nýjan kraft* þegar þið fylgið Drottni staðfastlega.  Hvernig getum við sýnt Guði hve þakklátir við erum fyrir ykkur og þá miklu gleði sem við njótum ykkar vegna frammi fyrir honum? 10  Dag og nótt biðjum við eins innilega og við getum að fá að sjá ykkur augliti til auglitis* og bæta úr því sem vantar upp á trú ykkar. 11  Megi Guð okkar og faðir og Drottinn okkar Jesús gera okkur kleift að koma til ykkar. 12  Og megi Drottinn láta kærleika ykkar hvert til annars og til allra manna vaxa, já, fylla hjörtu ykkar, rétt eins og við elskum ykkur. 13  Þá getur hann styrkt hjörtu ykkar svo að þau verði óaðfinnanleg og heilög frammi fyrir Guði okkar og föður við nærveru Drottins Jesú og allra hans heilögu.

Neðanmálsgreinar

Eða „ég“. Hugsanlegt er að Páll tali um sjálfan sig í fleirtölu.
Eða hugsanl. „samverkamann“.
Eða „gera ykkur staðföst“.
Eða „okkur var ætlað þetta“.
Orðrétt „allri neyð“.
Orðrétt „Við lifum“.
Orðrétt „sjá andlit ykkar“.