Hoppa beint í efnið

Hoppa í efnisyfirlit

Að læra að vinna vel er eins og að þjálfa líkamann. Það er gagnlegt núna og í framtíðinni.

 FYRIR UNGLINGA

11: Vinnusemi

11: Vinnusemi

HVAÐ FELUR HÚN Í SÉR?

Þeir sem eru vinnusamir reyna ekki að koma sér undan vinnu heldur njóta þess að vinna vel til að sjá fyrir sér og aðstoða aðra. Og það gera þeir jafnvel þó að vinnan sé ekki hátt skrifuð.

HVERS VEGNA ER VINNUSEMI MIKILVÆG?

Maður þarf að axla margs konar ábyrgð í lífinu hvort sem manni líkar það betur eða verr. Nú á dögum eru margir ófúsir að vinna hörðum höndum. Að vera vinnusamur kemur sér því vel fyrir mann á margan hátt. – Prédikarinn 3:13.

„Ég hef komist að raun um að manni líður vel og er ánægður með sjálfan sig ef maður er duglegur. Vegna þessarar innri gleði kann ég núna vel að meta vinnu. Gott vinnusiðferði byggir einnig upp gott mannorð.“ – Reyon.

MEGINREGLA: „Allt erfiði færir ágóða.“ – Orðskviðirnir 14:23.

ÞAÐ SEM ÞÚ GETUR GERT

Vendu þig á að hafa jákvætt viðhorf til vinnu með því að fylgja eftirfarandi ráðum.

Leggðu þig fram um að læra að vinna vel. Gerðu þitt besta hvort sem þú ert að vinna húsverkin, heimavinnuna eða ert á vinnustað. Þegar þú hefur náð góðum tökum á ákveðnu verkefni skaltu reyna að vinna það enn betur eða hraðar. Því færari sem þú verður þeim mun ánægjulegri verður vinnan.

MEGINREGLA: „Sjáir þú mann vel færan í verki sínu mun hann veita konungum þjónustu sína en ekki þjóna ótignum mönnum.“ – Orðskviðirnir 22:29.

Sjáðu heildarmyndina. Ef þú sinnir verkefnum þínum vel gagnast það nánast alltaf öðrum líka. Til dæmis léttir þú undir með öðrum í fjölskyldunni ef þú ert duglegur að gera húsverkin sem þér eru falin.

MEGINREGLA: „Sælla er að gefa en þiggja.“ – Postulasagan 20:35.

Gerðu meira en ætlast er til. Í stað þess að gera eins lítið og þú kemst upp með skaltu gera meira en krafist er af þér. Þá ert þú með stjórnina í eigin lífi. Þú er ekki látinn gera meira heldur ákveður þú að gera meira. – Matteus 5:41.

MEGINREGLA: „Velgjörð þín skyldi ekki koma eins og af nauðung heldur af fúsum vilja.“ – Fílemonsbréfið 14.

Gættu jafnvægis. Þeir sem eru vinnusamir eru hvorki letingjar né vinnufíklar. Þeir reyna að gæta jafnvægis og njóta bæði vinnu og frítíma.

MEGINREGLA: „Betri er hnefafylli af ró en báðar hendur fullar af striti og eftirsókn eftir vindi.“ – Prédikarinn 4:6.