Stillingar skjálesara

Veldu tungumál

Hoppa í undirvalmynd

Hoppa í efnisyfirlit

Hoppa beint í efnið

Vottar Jehóva

íslenska

VAKNIÐ! MAÍ 2014

 GÓÐ RÁÐ HANDA FJÖLSKYLDUNNI | UNGLINGAR

Að taka við leiðréttingu

Að taka við leiðréttingu

VANDINN

„Þegar einhver leiðréttir mann er hann í rauninni að segja að maður sé að gera eitthvað sem er ekki í lagi. Ég veit ekki um neinn sem finnst gaman að vera sagt til syndanna.“ – Amy, 17 ára. *

Sá sem hafnar leiðréttingu er eins og flugmaður sem hunsar leiðbeiningar frá flugturni. Afleiðingarnar geta verið skelfilegar.

Finnst þér erfitt að taka við leiðréttingu frá foreldrum þínum, kennurum eða öðrum fullorðnum? Þá gæti þessi grein verið fyrir þig.

ÞAÐ SEM ÞÚ ÆTTIR AÐ VITA

Allir þurfa á leiðréttingu að halda af og til.

„Öll hrösum við margvíslega.“ – Jakobsbréfið 3:2.

„Það er engin skömm að því að vera leiðréttur þegar manni verður á.“ – Jessica.

Að fá leiðréttingu þýðir ekki að maður sé misheppnaður.

„Drottinn agar þann sem hann elskar og lætur þann son finna til sem hann hefur mætur á.“ – Orðskviðirnir 3:12.

„Þegar fólk leiðréttir mig reyni ég að hugsa um hvað það sýnir mér mikla umhyggju, vegna þess að það er ekki auðvelt að leiðrétta aðra.“ – Tamara.

Að taka við leiðréttingu gerir þig að betri manneskju.

„Hlustið á hvatningu mína, svo að þér verðið vitrir.“ – Orðskviðirnir 8:33.

„Leiðréttingar eru nauðsynlegar til að við getum tekið framförum. Þær hjálpa okkur að sjá sjálf okkur með augum annarra og að halda slæmum venjum í skefjum – venjum sem við vissum jafnvel ekki að við hefðum tamið okkur.“ – Deanne.

 HVAÐ ER TIL RÁÐA?

Líttu hlutlaust á málið. Þegar við erum leiðrétt eigum við það til að móðgast. En það er gott að reyna að líta hlutlaust á málið í stað þess að fara í vörn. Settu þig í spor þess sem gefur ráðin og ímyndaðu þér að þú sért að leiðrétta einhvern annan, til dæmis yngra systkini. Geturðu þá ekki séð eitthvað jákvætt við ráðin? Reyndu að taka við leiðréttingunni á þeim nótum. – Ráðlegging Biblíunnar: Prédikarinn 7:9.

„Stundum reiðist maður svo mikið yfir gagnrýni að það gleymist að hún er vel meint og að það er ekki verið að reyna að særa mann heldur hjálpa manni til að verða betri manneskja.“ – Theresa.

Vertu auðmjúkur. Láttu ekki stolt verða til þess að þú hafnir leiðréttingu. En misstu ekki heldur kjarkinn þó að þú þurfir að bæta þig á einhverju sviði. Auðmýkt getur hjálpar þér að forðast báðar öfgarnar. Mundu að leiðréttingin, sem þig svíður hvað mest undan, er kannski leiðréttingin sem þú þarft hvað mest á að halda. Ef þú hafnar henni einhverra hluta vegna missirðu af tækifæri til að þroskast. – Ráðlegging Biblíunnar: Orðskviðirnir 16:18.

Leiðréttingin, sem þig svíður hvað mest undan, er kannski leiðréttingin sem þú þarft hvað mest á að halda.

„Að taka leiðréttingum er mikilvægur þáttur í að vaxa úr grasi og þroskast. Ef við lærum ekki að taka við leiðréttingum kemur það okkur í koll seinna meir.“ – Lena.

Vertu þakklátur. Þó að þú eigir erfitt með að taka einhverri leiðréttingu er gott að þakka þeim sem gaf hana. Hann var örugglega að hugsa um hvað þér er fyrir bestu og vill að þér vegni vel. – Ráðlegging Biblíunnar: Sálmur 141:5.

„Það er alltaf viðeigandi að þakka fyrir gefin ráð, ekki síst ef þú þurftir á þeim að halda. Og jafnvel þó að þú hafir ekki þurft þau geturðu sagt ráðgjafanum að þú sért þakklátur fyrir það sem hann lagði á sig þín vegna.“ – Carla.

^ gr. 4 Sumum nöfnum í þessari grein er breytt.