Adán i Evapas Taita Diusta mana uiaskamandaka, paikunata wañui chaiarka (Génesis 3:6, 23)

Evaka kulebrata uiaspami chi sachamanda mikuita mikurka. Nispaka, Adanta karagrirka mikungapa, nigpika Adanpasmi mikurka.

Paikuna mikuura Diusta mana uiarkakunachu. Chita ruraskamanda Diuspa ñawipi jiru ruraimi karka.Chimandami Dius paikunata Edenmanda llugsichispa kacharka.

Chi punchauramandaka, paikuna i paikunapa wambrakunapas iapa llakiikunami iukai kallarirka. Nigpika, rukuiaspami paikunata wañui chaiarka. Mana awa suma luarma ñi infiernoma rirkakunachu. Chillapimi limpu tukurirkakuna.

 Wañuskakunaka ñi imapas mana rurai pudinkunachu, mana kagpi alpa ñutu tukunkuna (Génesis 3:19)

Tukuikuna Adanpa wambrakunami kanchi. Chimandami nukanchitapas wañui chaiá. Wañuskakuna mana kawai ñi uiai ñi imapas rurai pudinkunachu. Paikuna puñunakugsinami ka (Juan 11:11-14).

Jeobá mana munarkachu jentekuna wañuchukuna. Mana unaillapi wañuskakunatami kaugsachingapa ka. Paikuna Diustami uiagpika, mana wañuspa diltudupa kaugsangapa kankuna.