Mapan iti linaonna

Mapan iti segundario a pagpilian

Dagiti Saksi ni Jehova

Iloko

Ania ti Watch Tower Bible and Tract Society?

Ania ti Watch Tower Bible and Tract Society?

Ti Watch Tower Bible and Tract Society of Pennsylvania ket saan nga agganansia a korporasion (nonprofit) a nabuangay idi 1884 iti sidong dagiti linteg ti Commonwealth of Pennsylvania, U.S.A. Daytoy a korporasion ti us-usaren dagiti Saksi ni Jehova a mangsuporta iti sangalubongan a trabahoda, a pakairamanan ti pannakaipablaak dagiti Biblia ken naibatay iti Biblia a publikasion.

Sigun iti legal a dokumento a nakailanadan dagiti naited a pagalagadan, ti panggep ti korporasion ket “mainaig iti relihion, edukasion, ken panangtulong kadagiti tattao,” nangnangruna iti “panangikasaba ken panangisuro iti ebanghelio maipapan iti Pagarian ti Dios babaen ti panangituray ni Kristo Jesus.” Ti panagbalin a miembro iti daytoy a korporasion ket babaen ti imbitasion laeng, saan ket a naibatay iti kaadu ti naidonar ti maysa a tao. Dagiti miembro ken direktor ti korporasion tumultulongda iti Bagi a Manarawidwid dagiti Saksi ni Jehova.

Dagiti Agtitinnulong a Legal a Korporasion

Malaksid iti Watch Tower Bible and Tract Society of Pennsylvania, adu pay dagiti legal a korporasion dagiti Saksi ni Jehova iti nagduduma a pagilian. Dadduma kadagitoy ti nangiraman iti naganda kadagiti termino a kas iti “Watch Tower,” “Watchtower,” wenno ti patarus ti maysa kadagitoy.

Sipud idi nabuangay dagitoy a nagduduma a legal a korporasion, adu ti naaramidanmin, kas iti sumaganad:

  • Panagsurat ken panagipablaak. Nakaipablaakkamin iti agarup 220 a milion a Biblia ken agarup 40 a bilion a naibatay iti Biblia a publikasion iti nasurok a 700 a lengguahe. Babaen ti website a jw.org, libre a mabasa dagiti tattao ti Biblia online iti nasurok a 120 a lengguahe ken maammuanda dagiti sungbat dagiti saludsod maipapan iti Biblia a kas iti “Ania ti Pagarian ti Dios?”

  • Edukasion. Addaankami iti nagduduma nga eskuelaan a nairanta para iti instruksion a naibatay iti Biblia. Kas pagarigan, sipud 1943, nasuroken a 8,000 a Saksi ni Jehova ti nabenepisiaran iti napasnek a panagadal ken pannakasanay manipud iti Watchtower Bible School of Gilead. Dayta ti nakatulong kadakuada nga agserbi kas misionero wenno mangpabileg ken mangpatibker iti trabahomi iti intero a lubong. Kada lawas, minilion a tattao a pakairamanan dagiti saan a Saksi ti umaw-awat iti instruksion kadagiti gimong a maar-aramid kadagiti kongregasionmi. Mangyur-urnoskami met kadagiti klase para kadagiti saan a makabasa ken nakaaramidkami iti maysa a libro iti 110 a lengguahe a mangisuro kadagiti tattao nga agbasa ken agsurat.

  • Panangsaranay. Mangipapaaykami iti material a tulong kadagiti nadidigra—gapuanan man daytoy ti tao kas iti panagiinnibus ti puli idi 1994 idiay Rwanda, wenno natural a kalamidad kas iti ginggined idi 2010 idiay Haiti.

Nupay adun ti nagapuanan babaen kadagitoy a korporasion, ti trabahomi ket saan nga agpannuray iti aniaman kadagitoy. Addaan ti tunggal Kristiano iti personal a responsabilidad a mangitungpal iti bilin ti Dios nga ikasaba ken isuro ti naimbag a damag. (Mateo 24:14; 28:19, 20) Mamatikami a supsuportaran ti Dios ti trabahomi ken agtultuloy nga isu ti “mangpadakkel iti dayta.”—1 Corinto 3:6, 7.

Ammuem ti Ad-adu Pay

SIASINO ITA DAGITI MANGAR-ARAMID ITI PAGAYATAN NI JEHOVA?

Kasano a Maisursurat ken Maipatpatarus Dagiti Literatura Dagiti Saksi ni Jehova?

Mangpatpataudkami kadagiti literatura iti nasurok a 750 a lengguahe. Apay nga ar-aramidenmi daytoy?