Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Pilpiliten Kadi Dagiti Saksi ni Jehova Dagiti Tattao a Mangsukat iti Relihionda?

Pilpiliten Kadi Dagiti Saksi ni Jehova Dagiti Tattao a Mangsukat iti Relihionda?

Saanmi nga ar-aramiden dayta. Dinakamat ti kangrunaan a magasinmi a Ti Pagwanawanan: “Saan nga umiso a piliten dagiti tattao a suktanda ti relihionda.” * Saanmi a pilpiliten dagiti tattao gapu kadagiti sumaganad a rason:

  • Saan a pinilit ni Jesus dagiti tattao nga awatenda dagiti sursurona. Ammona a bassit laeng ti umawat iti mensahena. (Mateo 7:13, 14) Idi naitibkol ti sumagmamano nga adalanna gapu iti imbagana, pinalubosanna ida a pumanaw imbes a pilitenna ida nga agtalinaed.Juan 6:60-62, 66-68.

  • Insuro ni Jesus dagiti pasurotna a saanda a piliten ti sabsabali a baliwanda ti pammatida. Imbes a pilitenda dagiti tattao nga umawat iti naimbag a damag maipapan iti Pagarian, nagbirok dagiti adalanna kadagiti mayat a dumngeg ken umawat. Mateo 10:7, 11-14.

  • Awan serserbina ti pannakakomberte a napilpilit, ta ti laeng awaten ti Dios ket ti naimpusuan a panagdayaw.Deuteronomio 6:4, 5; Mateo 22:37, 38.

Panangkomberte kadi ti trabahomi?

Agpayso nga ipakpakaammomi ti mensahe ti Biblia “agingga iti kaadaywan a paset ti daga,” iti man “publiko ken iti binalaybalay,” kas imbilin ti Biblia. (Aramid 1:8; 10:42; 20:20) Ken kas kadagiti nagkauna a Kristiano, maak-akusarkami no dadduma iti illegal a panangkomberte. (Aramid 18:12, 13) Ngem saan nga agpayso dagita nga akusasion. Saanmi nga ipilpilit dagiti patpatienmi iti siasinoman. Imbes ketdi, mamatikami a masapul a maikkan dagiti tattao iti gundaway a gumun-od iti pannakaammo tapno makaaramidda iti desision.

Saanmi a pilpiliten dagiti tattao a suktanda ti relihionda. Saanmi met nga us-usaren ti relihion tapno makiramankami iti aktibidad iti politika wenno mangmangted iti material wenno pagimbagan iti kagimongan tapno laeng makaawiskami kadagiti baro a miembro. Naiduma dayta kadagiti agkunkuna a Kristiano ngem dida raraemen ni Kristo gapu iti panangaramidda kadagita a bambanag. *

Adda kadi kalintegan ti maysa a tao a suktan ti relihionna?

Pinanawan ni propeta Abraham ti relihion dagiti kabagianna

Adda. Ipakita ti Biblia nga adda kalintegan dagiti tattao a mangsukat iti relihionda. Nairekord ditoy ti adu a saan a nangsurot iti relihion dagiti kabagianda ken isuda a mismo ti nagdesision a dayawenda ti pudno a Dios. Ti sumagmamano kadakuada ket da Abraham, Ruth, sumagmamano a tattao iti Atenas, ken ni apostol Pablo. (Josue 24:2; Ruth 1:14-16; Aramid 17:22, 30-34; Galacia 1:14, 23) Mabasa met iti Biblia nga adda kalintegan ti maysa a mangaramid iti saan a nainsiriban a desision a mangpanaw iti panagdaydayaw nga anamongan ti Dios.1 Juan 2:19.

Ti kalintegan a mangsukat iti relihion ket suportaran ti Universal Declaration of Human Rights, nga inawagan ti United Nations a “pundasion ti internasional a linteg mainaig iti kalintegan ti tao.” Ibagbaga ti dokumento a ti amin ket addaan iti “wayawaya a mangsukat iti relihion wenno pammatina” ken “mangsapul, mangawat ken mangiranud iti impormasion ken kapanunotan,” agraman dagiti narelihiosuan nga ideya. * Siempre, kakuykuyog dagitoy a kalintegan ti obligasion a mangraem iti kalintegan ti sabsabali nga agtalinaed iti pammatida ken saan a panangawat kadagiti ideya a saanda nga anamongan.

Ti kadi panagsukat iti relihion ket saan a panagraem kadagiti tradision wenno kostumbre ti pamilia?

Saan met. Iparparegta ti Biblia a maikari a marespeto ti amin, aniaman ti relihionda. (1 Pedro 2:17) Kanayonanna, tungtungpalen dagiti Saksi ni Jehova ti bilin nga adda iti Biblia a raemen dagiti nagannak, uray no sabali ti pammatida.—Efeso 6:2, 3.

Ngem saan nga amin ket umanamong iti ibagbaga ti Biblia. Kuna ti maysa a babai a dimmakkel iti Zambia: “Iti lugarmi, ti panagsukat iti relihion . . . ket maibilang a di kinamatalek, panangliput iti pamilia ken iti komunidad.” Naipasango ti babai iti kastoy a situasion idi tin-edyer pay. Isu ket nakipagadal iti Biblia kadagiti Saksi ni Jehova, ken di nagbayag, nagdesision a suktanna ti relihionna. Kunana: “Sangkaibaga dagiti dadakkelko a kaguradak unay ken napaay ti ninamnamada kaniak. Narigat daytoy, yantangay napateg kaniak ti anamong dagiti dadakkelko. . . . Ti pangngeddengko nga agbalin a matalek ken Jehova imbes a kadagiti narelihiosuan a tradision dina kaipapanan a saanak a matalek iti pamiliak.” *

^ par. 2 Kitaem ti Enero 1, 2002, a ruar Ti Pagwanawanan, panid 12, parapo 15.

^ par. 8 Kas pagarigan, idi agarup 785 C.E., inruar ni Charlemagne ti bilin a mapapatay ti siasinoman a taga-Saxony a di agpabautisar kas Kristiano. Maysa pay, ti Peace of Augsburg, a pinirmaan ti aglablaban a grupo ti Holy Roman Empire idi 1555 C.E., a masapul a Romano Katoliko wenno Lutheran ti agturay iti tunggal teritoria ken masapul a kasta met ti relihion ti amin nga iturayanda. Dagidiay saan a sumurot iti relihion ti agturay ket maikalikagum nga umakar iti sabali a lugar.

^ par. 11 Ti kasta a kalintegan ket nairaman iti African Charter on Human and Peoples’ Rights, iti American Declaration of the Rights and Duties of Man, iti 2004 Arab Charter on Human Rights, iti ASEAN (Association of Southeast Asian Nations) Human Rights Declaration, iti European Convention on Human Rights, ken iti International Covenant on Civil and Political Rights. Ngem uray kadagiti pagilian a mangibagbaga nga ipapaayda dagiti kasta a kalintegan, nagduduma ti aktual a panangipatungpalda kadagita.

^ par. 14 Jehova ti nagan ti pudno a Dios a naipakaammo iti Biblia.

Ammuem ti Ad-adu Pay

Pagsisinaen Kadi Wenno Pabilgen Dagiti Saksi ni Jehova Dagiti Pamilia?

Maakusaran no dadduma dagiti Saksi ni Jehova a pagsisinaenda dagiti pamilia. Ngem talaga kadi a dagiti Saksi ti pagtaudan ti di panagkikinnaawatan?

Ania ti Mapasamak Kadagiti Relihion?

Dumtengto ngata ti panawen nga agkaykaysa ti amin nga agdaydayaw iti maymaysa a pudno a Dios?