Kas Saksi ni Jehova, ikagumaanmi a pabilgen dagiti pamiliami ken ti pamilia dagiti kaarrubami. Raraemenmi ti Dios kas ti Nangaramid iti urnos ti pamilia. (Genesis 2:21-24; Efeso 3:14, 15) Iti Biblia, isursurona dagiti prinsipio a nakatulongen iti adu a tattao iti intero a lubong a maaddaan iti nabileg ken naragsak a panagasawa.

No Kasano nga Iparparegta Dagiti Saksi ni Jehova ti Nabileg a Pamilia

Ar-aramidenmi ti amin a kabaelanmi a mangyaplikar iti balakad ti Biblia, ta daytoy ti tumulong kadakami nga agbalin a nasaysayaat nga asawa a lalaki, asawa a babai, ken nagannak. (Proverbio 31:10-31; Efeso 5:22–6:4; 1 Timoteo 5:8) Ti sirib nga agtaud iti Biblia ket makatulong tapno agballigi dagiti pamilia uray agduduma ti relihionda. (1 Pedro 3:1, 2) Usigem ti kinuna dagiti saan a Saksi a nagbalin a Saksi ni Jehova ti assawada:

  • “Kanayonkami nga agapa ken makapadismaya ti umuna nga innem a tawenmi nga agassawa. Ngem idi nagbalin a Saksi ni Jehova ni Ivete, nagbalinen a nadungngo ken naanus. Gapu iti panagbalbaliwna, saankami met la a nagsina.”—Clauir, taga-Brazil.

  • “Binusorko ni lakayko a Chansa idi nakipagadal iti Biblia kadagiti Saksi ni Jehova, gapu ta ti ammok pagsisinaenda ti pamilia. Ngem sipud idin, naamirisko a talaga a nakatulong ti Biblia iti relasionmi nga agassawa.”—Agness, taga-Zambia.

Iti ministeriotayo, ipakitatayo kadagiti kaarrubatayo no kasano a makatulong ti panangyaplikar iti sirib a linaon ti Biblia tapno

Ti kadi panangbaliw iti relihion ti pagapaan ti agassawa?

Pudno a mapasamak dayta no dadduma. Kas pagarigan, naammuan ti panagsirarak ti kompania a Sofres idi 1998 a 1 iti kada 20 nga agassawa a maysa laeng kadakuada ti Saksi ti addaan iti nakaro a problema idi nagbalin a Saksi ti asawana.

Impadto ni Jesus a dagiti mangsurot iti pannursurona ket agririri ti pamiliada no dadduma. (Mateo 10:32-36) Kuna ti historiador a ni Will Durant nga iti panangituray ti Imperio ti Roma, “Napabasol dagiti Kristiano a pagsisinaenda dagiti pamilia.” * Kasta met laeng ti maipabpabasol kadagiti Saksi ni Jehova ita. Ngem kayat kadi a sawen daytoy a dagiti Saksi ti pakaigapuan ti di panagkikinnaawatan?

European Court of Human Rights

Iti desision maipapan iti panangakusar kadagiti Saksi ni Jehova a pagsisinaenda dagiti pamilia, kuna ti European Court of Human Rights a dagiti saan a Saksi a miembro ti pamilia ti masansan a pakaigapuan ti riri gapu ta saanda nga “awaten ken raemen ti wayawaya ti kapamiliada a mangalagad iti relihionna.” Innayon pay ti Korte: “Gagangay a mapasamak daytoy iti amin nga agassawa a nagduma ti relihionda ken karaman kadagita dagiti Saksi ni Jehova.” * Ngem uray no maidumduma dagiti Saksi ni Jehova gapu iti relihionda, ikagkagumaanda latta a suroten ti balakad ti Biblia: “Dikay subadan ti dakes iti dakes iti asinoman. . . . No mabalin, agingga a makapagpannuray kadakayo, makikappiakayo iti amin a tattao.”—Roma 12:17, 18.

No apay a patien dagiti Saksi ni Jehova a makiasawada laeng iti kapammatianda

Sursuroten dagiti Saksi ti kuna ti Biblia a makiasawa ‘laeng iti Apo,’ kayatna a sawen, makiasawa laeng iti kapammatianna. (1 Corinto 7:39) Daytoy a bilin ket naibatay iti Biblia ken praktikal. Kas pagarigan, kuna ti artikulo iti Journal of Marriage and Family idi 2010 a “dagiti agassawa nga agpada ti relihionda, ar-aramidda, ken patpatienda” ket natibtibker ti relasionda. *

Ngem saan nga iparparegta dagiti Saksi kadagiti kapammatianda a makisinada iti asawada a saan a Saksi. Kuna ti Biblia: “No ti asinoman a kabsat a lalaki addaan iti di mamati nga asawa, ket kaskasdi isu umanamong a makipagnaed kenkuana, saanna koma a panawan; ket ti maysa a babai nga addaan iti di mamati nga asawa, ket kaskasdi isu umanamong a makipagnaed kenkuana, saanna koma a panawan ti asawana a lalaki.” (1 Corinto 7:12, 13) Tungtungpalen dagiti Saksi ni Jehova daytoy a bilin.

^ par. 17 Kitaen ti Caesar and Christ, panid 647.

^ par. 18 Kitaen ti desision iti kaso a Jehovah’s Witnesses of Moscow and Others v. Russia, panid 26-27, parapo 111.

^ par. 20 Kitaen ti Journal of Marriage and Family, Volume 72, Number 4, (August 2010), panid 963.