Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Adda Kadi Bukod a Biblia Dagiti Saksi ni Jehova?

Adda Kadi Bukod a Biblia Dagiti Saksi ni Jehova?

Iti panangadal dagiti Saksi ni Jehova iti Biblia, adu a patarus ti us-usarenda. Ngem kadagiti lengguahe a nakaipatarusan ti Biblia, ad-adda nga us-usarenmi ti Baro a Lubong a Patarus ti Nasantuan a Kasuratan gapu iti panangusarna iti nagan ti Dios, kinaumisona, ken kinalawagna.

  • Pannakausar ti nagan ti Dios. Ti dadduma nga agipabpablaak iti Biblia, saanda a pinadayawan ti rumbeng a mapadayawan. Kas pagarigan, iti maysa a patarus ti Biblia, nailista ti nasurok a 70 a nagan ti tattao a nakatulong iti pannakaipablaakna. Ngem inikkat a namimpinsan dayta a patarus ti Biblia ti nagan ti Autorna—ni Jehova a Dios!

    Maisupadi iti dayta, ti Baro a Lubong a Patarus insublina ti nagan ti Dios iti rinibu a nakausaranna iti orihinal a teksto ken saan a naipakaammo ti komite a nangipablaak iti dayta a patarus.

  • Umiso. Saan nga amin a patarus ket umiso ti panangipatarusna iti orihinal a mensahe ti Biblia. Kas pagarigan, iti maysa a patarus, kastoy ti mabasa iti Mateo 23:15: “Asikayo pay, dakayo a mamaestro iti Linteg ken dakayo a Fariseo! Aginsisingpetkayo! Ballasiwenyo dagiti taaw ken sursorenyo dagiti dagdaga tapno makaawiskayo iti maysa a pasurot; ket no adda mapasurotyon pagbalinenyo nga ad-adda ti pannakaikarina iti infierno ngem dakayo.” Nupay kasta, iti orihinal a teksto, nausar ti termino a “Gehenna [a ti literal a kaipapananna ket Ginget ti Hinnom],” saan nga “infierno.” Idi un-unana, ti Ginget ti Hinnom ket adda iti asideg ti Jerusalem. Ditoy ti pakaibellengan dagiti basura idi kaaldawan ni Jesus. Nabatad nga inusar ni Jesus ti sao a Gehenna a mangiladawan iti naan-anay a pannakadadael nga ibunga ti pannakaukom manipud iti Dios. Nalabit inusar dagiti paraipatarus ti sao nga “infierno” gapu ta patienda a matutuok iti agnanayon dagiti nadangkes idiay umap-apuy nga impierno. Ngem saan nga isursuro dayta ti Biblia. Gapuna, kastoy ti kuna ti Baro a Lubong a Patarus: “Asikayo pay, eskriba ken Fariseo, a managinsisingpet! agsipud ta ballasiwenyo ti baybay ken ti namaga a daga tapno aramidenyo ti maysa a proselita, ket inton agbalinen a kasta pagbalinenyo nga agpaay iti Gehenna a mamindua nga ad-adda ngem iti bagbagiyo.”

  • Nalawag. Ti nasayaat a patarus ket saan laeng nga umiso no di ket nalawag ken nalaka a maawatan. Kitaentayo ti maysa a pagarigan. Iti Mateo 5:3, inusar ni Jesus ti sasao a ti literal a kaipapananna ket “nagasat dagiti mangbigbig a napanglawda iti imatang ti Dios.” Gapu ta saan a nalawag ti kaipapanan dayta iti moderno nga Ingles, inusar ti Baro a Lubong a Patarus dagiti sasao a nalaka a maawatan. Kunana a “naragsak dagidiay sipapanunot iti naespirituan a kasapulanda.”

Malaksid iti panangusarna iti nagan ti Dios, umiso, ken nalawag, adda sabali pay a nakaidumaan ti Baro a Lubong a Patarus: Libre a maiwarwaras daytoy. Kas resultana, minilionen ti makabasa iti Biblia iti bukodda a lengguahe—uray kadagidiay saan a makabael a gumatang iti Biblia.

Ammuem ti Ad-adu Pay

Apay nga Inaramid Dagiti Saksi ni Jehova ti Baro a Lubong a Patarus?

Apay a naisangsangayan daytoy a patarus ti Sao ti Dios?

Ti Nakaitalkan ti Panangipatarus iti Sagrado a Sasao ti Dios—Roma 3:2

Adu a patarus ti Biblia ti inusar dagiti Saksi ni Jehova iti napalabas a siglo. Apay nga impatarusda ti Biblia iti moderno nga Ingles?